Sunita Williams:
পৃথিৱীলৈ উভতি অহাৰ দিন চমু চাপিছে সুনীতা উইলিয়ামছ আৰু বুচ উইলম’ৰৰ । নাছাই তেওঁলোকক আনিবলগীয়া মহাকাশযানৰ উৎক্ষেপণৰ তাৰিখ ঘোষণা কৰিছে। ইয়াৰ পূৰ্বে, ক্ৰু-১০ মহাকাশযানখন ২৫ মাৰ্চত সুনীতাক আনিবলৈ মহাকাশলৈ উৰা মৰাৰ সিদ্ধান্ত লোৱা হৈছিল ।
কিন্তু মঙলবাৰে নিশা (স্থানীয় সময় অনুসৰি) আমেৰিকাৰ মহাকাশ সংস্থাটোৱে কয় যে তেওঁলোকে ক্ৰু-১০ৰ উৎক্ষেপণৰ তাৰিখ আগুৱাই আনিছে। উল্লেখ্য যে,মহাকাশযানখন অহা ১২ মাৰ্চত উৎক্ষেপণ কৰা হ’ব । এতিয়াৰ বাবে নাছাই সেই লক্ষ্যৰ দিশে আগবাঢ়িছে।
অৱশ্যে নাছাই এইটোও জনাইছে যে ক্ৰু-১০ অভিযান আৰম্ভ কৰাৰ আগতে সামান্য কাম বাকী আছে। মহাকাশলৈ যাবলৈ সাজু হোৱা মহাকাশযানখনক এতিয়াও প্ৰমাণপত্ৰ দিয়া হোৱা নাই। ১২ মাৰ্চৰ পূৰ্বে সংস্থাটোৰ পৰা সেই প্ৰমাণপত্ৰ লাভ কৰাৰ প্ৰচেষ্টা চলি আছে।
সুনীতাৰা বৰ্তমান ক্ৰু-৯ মহাকাশযানত আছে। সুনীতা আৰু বুচৰ উপৰিও নাছাৰ মহাকাশচাৰী নিক হগ আৰু ৰছকছমছৰ মহাকাশচাৰী আলেকজেণ্ডাৰ গৰ্বুনভ মহাকাশযানখনত আছে। যেতিয়া ক্ৰু-১০: মহাকাশত উপনীত হ’ব, ক্ৰু-৯ৰ এই চাৰিজন মহাকাশচাৰীয়ে নতুন মহাকাশযানত উঠিব। সেই প্ৰক্ৰিয়াটো সম্পূৰ্ণ হোৱাৰ পাছতে, ক্ৰু-১০ সুনীতাৰ স’তে পৃথিৱীলৈ ৰাওনা হ’ব।
ক্ৰু-১০ মহাকাশযানখন অৱশ্যে খালী হৈ মহাকাশলৈ নাযায়। নাছাৰ হৈ এন মেকক্লেইন আৰু নিকোল আয়াৰ্ছ, জাপানৰ হৈ টাকুয়া অনিছি আৰু ৰাছিয়াৰ হৈ কিৰিল পেস্কোভ ক্ৰু-১০ত মহাকাশলৈ যাব। সুনীতা আৰু বুচ যোৱা বছৰৰ জুন মাহত মাত্ৰ আঠ দিনৰ বাবে মহাকাশলৈ যায়। কিন্তু যান্ত্ৰিক বিজুতিৰ বাবে তেওঁলোকে মহাকাশযানখনলৈ ঘূৰি আহিব নোৱাৰিলে। সুনীতা প্ৰায় আঠ মাহ ধৰি আন্তৰ্জাতিক মহাকাশ কেন্দ্ৰৰ মহাকাশত আবদ্ধ হৈ আছে।
কিছুদিনৰ আগতে আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্পে স্পেচএক্সৰ প্ৰতিষ্ঠাপক এলন মাস্কক সুনীতাৰ উভতি অহাৰ বিষয়ে বিবেচনা কৰিবলৈ নিৰ্দেশ দিয়ে। তাৰ পাছতে, ক্ৰু-১০-ৰ আৰম্ভণিৰ তাৰিখ আগবঢ়োৱা হৈছে বুলি ধাৰণা কৰা হয়।