চালছ ডাৰউইনৰ বিবর্তনবাদ সমগ্র বিশ্বতে বন্দিত। অথচ উনবিংশ শতিকাৰ সেই তত্ত্বই সম্প্রতি প্রত্যাহ্বানৰ সন্মুখীন হৈছে। মহান বিজ্ঞানীজনৰ প্ৰতি এই প্রত্যাহ্বান সৃষ্টি কৰিছে একাংশ চীনা বিজ্ঞানীয়ে।
সম্প্রতি এক গৱেষণাত দাবী কৰা হৈছে যে অর্জিত বৈশিষ্ট্যসমূহে ক্ৰম পৰিৱৰ্তন নঘটোৱাকৈয়ে বংশগতিক প্ৰভাৱিত কৰিব পাৰে। বিজ্ঞান পত্রিকা ‘চেল’ত প্রকাশ পাইছে উক্ত গৱেষণাপত্র। ‘চাইনিজ একাডেমী অৱ ছায়েন্সেছ’ৰ গৱেষকসকলে সেই গৱেষণা পত্ৰত জনাইছে যে শীতৰ প্রকোপত ধানগছৰ প্রতিক্রিয়া পৰীক্ষ কৰিয়েই তেওঁলোক এই সিদ্ধান্তলৈ আহিছে।
গৱেষণাত দেখা গৈছে যে শীত প্রবাহৰ চিকাৰ হোৱা ধানগছসমূহে পাঁচ প্রজন্ম ধৰি অতি কম তাপমাত্ৰাৰ স’তে অভিযোজিত সহনশীলতা অর্জনত সক্ষম হৈছে।
লগতে এই প্রক্রিয়াটোৱে ডাৰউইনবাদৰ কেন্দ্ৰবিন্দুত থকা জিনগত পৰিৱৰ্তনসমূহক এৰাই গৈছে। অর্থাৎ পৰিৱেশগত বাধাৰ ক্ষেত্রত অন্তর্নিহিত ডিএনএৰ ক্ৰম পৰিৱৰ্তন নঘটোৱাকৈয়ে বংশগত পৰিৱৰ্তন আনিব পাৰে।
প্রসংগক্রমে উনবিংশ শতিকাত ডাৰউইন আৰু লেমাৰ্কৰ বিবৰ্তনৰ তত্ত্ব নতুনকৈ আলোচনাত উঠি আহিছে এই সাম্প্রতিক গৱেষণাপত্ৰত। দুই বিজ্ঞানীয়ে দুই পথৰ সন্ধান দিছিল।
ডাৰউইনে তেওঁৰ বিবর্তনবাদৰ ভিত্তিৰূপে জিনগত বৈচিত্র্যৰ কথা কৈছিল। আনহাতে, লেমাৰ্কৰ দাবী আছিল যে জীৱবোৰে বাচি থকাৰ যি বৈশিষ্ট্য অর্জন কৰে, সেয়া অন্য এজনলৈ স্থানান্তৰিত কৰিব পাৰে।
অর্থাৎ এই ক্ষেত্রত চীনা বিজ্ঞানীসকলৰ গৱেষণাই ডাৰউইন নহয়, বৰঞ্চ লেমাৰ্কৰ তত্ত্বকেই প্রতিষ্ঠা কৰিছে।
বিভিন্ন পক্ষই এই গৱেষণাক ‘যুগান্তকাৰী’ আখ্যা দিব বিচাৰিছে। ধাৰণা কৰা হৈছে যে বংশগতি সম্পর্কে ইমানদিনৰ ধাৰণাত সুদূৰপ্ৰসাৰী প্ৰভাৱ পেলাব পাৰে এই পৰীক্ষাই। প্ৰজন্মৰ পাছত প্রজন্ম ধৰি কিদৰে জীৱৰ বৈশিষ্ট্য সঞ্চালিত হয়, তাক লৈ থকা পুৰণি ধাৰণাক এই গৱেষণাই নতুনকৈ পোহৰ পেলাব বুলিয়ে ধাৰণা কৰা হৈছে।