Namrata bora Dead incident:Cm Tweets
চুবুৰীয়া মেঘালয়ৰ নংপোত যোৱা বুধবাৰে পুৱতি নিশা সংঘটিত হয় এক পথ দুৰ্ঘটনাত নম্ৰতা বৰা নামৰ গুৱাহাটী উচ্চ ন্যায়ালয়ৰ এগৰাকী যুৱ অধিবক্তাৰ কৰুণ মৃত্যু হয় ৷ ৰহস্যজনকভাবে একেখন বাহনত যোৱা ৪ জন বন্ধ- বান্ধৱীৰ কোনো আঘাত নোপোৱাকৈ ৰক্ষা পৰা বিষয়টোক লৈ তীব্ৰ প্ৰতিক্ৰিয়া সৃষ্টি হয় ৷ এআইইউডিএফৰ এজন বিধায়কৰ পুত্ৰ আন্নায়াতুল ৱাদুদে দুৰ্ঘটনাগ্ৰস্ত বাহন খন চলোৱা অভিযোগ কৰি ইতিমধ্যে দিছপুৰ থানাত গোচৰ তৰে নম্ৰতা বৰাৰ পিতৃয়ে ৷ তেওঁ এইয়া এক হত্যাকাণ্ড বুলি অভিযোগ কৰি সমস্ত বিষয়টোত মুখ্যমন্ত্ৰী ড:হিমন্ত বিশ্ব শৰ্মাৰ হস্তক্ষেপৰ বাবে কাতৰ আহ্বান জনায় ৷
অৱশেষত আজি মুখ্যমন্ত্ৰীয়ে সামাজিক মাধ্যমযোগে সদৰি কৰে যে যোৱা ৪ জুন, বুধবাৰে পুৱতি নিশা নংপো আৰক্ষী থানাৰ সমীপত সংঘটিত শোকাৱহ ঘটনাটিৰ বিষয়ত দৃষ্টি নিক্ষেপ কৰিবলৈ মই মেঘালয়ৰ মুখ্যমন্ত্ৰী কনৰাড চাংমাক অনুৰোধ জনাইছোঁ।
এ এছ-০১ ই ভি-৯৫৭৮ পঞ্জীয়ন নম্বৰযুক্ত এখন বাহন দুৰ্ঘটনাগ্ৰস্ত হোৱাৰ ফলত নম্ৰতা বৰা নামৰ এগৰাকী যুৱতীৰ দুৰ্ভাগ্যজনকভাৱে মৃত্যু হয়, আনহাতে আন চাৰিজন সহযাত্ৰীয়ে সামান্য আঘাতহে পায়। নংপো আৰক্ষী থানাত এই সন্দৰ্ভত এক গোচৰ ৰুজু কৰা হৈছে। তথাপি শোকসন্তপ্ত পৰিয়ালবৰ্গ আৰু শুভাকাংক্ষীসকলে উত্থাপন কৰা উদ্বেগৰ প্ৰতি লক্ষ্য ৰাখি মই অনুৰোধ জনাইছোঁ যে ঘটনাৰ সৈতে জড়িত সকলো তথ্য পোহৰলৈ আনিবলৈ এগৰাকী জ্যেষ্ঠ আৰক্ষী বিষয়াৰ দ্বাৰা এক উচিত আৰু নিৰপেক্ষ তদন্ত সম্পাদন কৰা হওক।
আনহাতে শেহতীয়া খবৰ অনুসৰি নম্ৰতা বৰাক হত্যা কৰাৰ অভিযোগ তুলি ৪ বন্ধু-বান্ধৱীৰ বিৰুদ্ধে গোচৰ ৰুজু কৰিছিল নম্ৰতাৰ পিতৃয়ে ৷ এই গোচৰ ৰুজুৰ পিছতেই বিধায়ক পুত্ৰ আন্নায়াতুল ৱাদুদ সহ ৪ যুৱক-যুৱতীৰ আত্মগোপন কৰে ৷
# আন্নায়াতুল ৱাদুদৰ স’তে চিনাকি নাছিল নম্ৰতাৰ : পিতৃৰ দাবী,একাংশই ‘লাভ জেহাদ’ আখ্যা দিয়াত অসন্তুষ্ট পৰিয়াল
নম্রতা বৰাৰ দুর্ঘটনাজনিত মৃত্যুৰ ঘটনাক একাংশই ‘লাভ জেহাদ’ আখ্যা দিয়াত তেওঁৰ পৰিয়াল অসন্তুষ্ট হৈছে। ঘটনাটোৰ স’তে ‘লাভ জেহাদ’ৰ বিষয়টো অস্বীকাৰ কৰি নম্ৰতাৰ পিতৃ ৰমেন কুমাৰ বৰাই ‘দৈনিক অগ্রদূত’ৰ আগত কয়, ‘এইটো ‘লাভ জেহাদ’ৰ ঘটনা নহয়। হিন্দু যুৱ-ছাত্ৰ পৰিষদৰ কাৰ্যক আমি বেয়া পাইছো।
একাংশ সংবাদ মাধ্যমে ঘটনাটো ‘লাভ জেহাদ’ত পৰিণত কৰিবলৈ বিচাৰিছে যদিও তেনে নহয়। আন্নায়াতুল ৱাদুদ নামৰ যুৱকজন নম্রতাৰ চিনাকি নাছিল। একাংশ সংবাদ মাধ্যমে যিদৰে মোৰ মৃত ছোৱালীজনীক লৈ বাতৰি কৰিছে, তাক লৈ আমি দুখ পাইছো।’
# প্রজ্ঞাই মাজনিশা ফোন কৰি মাতি নিছিল নম্রতাক
কন্যাৰ মৃত্যুত ম্রিয়মাণ হৈ থকা নম্রতাৰ পিতৃয়ে যোৱা চাৰি জুনৰ নিশা কি ঘটিছিল সেই বিষয়েও কিছু তথ্য প্রকাশ কৰে। তেওঁ কয় যে ঘটনাৰ দিনা নিশা ফোন কৰি নম্রতাক তেওঁৰ বান্ধৱী প্রজ্ঞাই মাতি নিয়ে। সেই মর্মে নম্রতা নিশা এপার্টমেণ্টৰ পৰা ওলাই যায়। উক্ত নিশা তেওঁলোকৰ স’তে মেঘালয়লৈ যোৱা কেইজনৰ অন্যতম মৃগাংকৰ স’তে প্ৰজ্ঞাৰ প্ৰেমৰ সম্পৰ্ক আছে বুলিও নম্রতাৰ পিতৃয়ে কয়। আনহাতে, ৱাদুদ বিবাহিত হোৱাৰ লগতে দুই সন্তানৰ পিতৃ আৰু তেওঁৰ স’তে গায়ত্রী (নম্রতাৰ স’তে ঘটনাৰ নিশা মেঘালয়লৈ গৈছিল) ৰ সম্পৰ্ক আছে বুলি লোকজনে কয়।
ঘটনাৰ বিষয়ে তেওঁ আৰু কয়, ‘ৱাদুদৰ গুৱাহাটীৰ কাহিলীপাৰাত অৱস্থিত ‘হোম স্টেত ঘটনাৰ দিনা গায়ত্রী, প্রজ্ঞা আৰু মৃগাংকই আইপিএলৰ ফাইনেল খেল টেলিভিছনত চায়। পাছত নিশা প্রজ্ঞাই মৃগাংকৰ ফোনৰে নম্রতালৈ ফোন কৰি তেওঁক মাতি নিয়ে। নম্ৰতাৰ স’তে কেবল প্রজ্ঞা আৰু মৃগাংকৰহে চিনাকি আছিল।’ এই তথ্যসমূহ তেওঁ নম্রতাৰ বন্ধুৰ পৰা জানিব পাৰিছে বুলি জনায়। তেওঁ আৰু কয় যে ইতিমধ্যে সমগ্র ঘটনা সন্দর্ভত আৰক্ষী থানাত এজাহাৰ দাখিল কৰা হৈছে আৰু আৰক্ষীয়ে ঘটনাৰ তদন্ত অব্যাহত ৰাখিছে।
আনহাতে শুকুৰবাৰে নম্রতাৰ গোলাঘাটৰ কমাৰগাঁওস্থিত ঘৰত তেওঁৰ তিলনি সম্পন্ন কৰা হয়। এই কথা উল্লেখ কৰি তেওঁৰ পিতৃয়ে লগতে কয়, ‘আজি তাইৰ তিলনি। তাইৰ আত্মাই যেন শান্তি পায় আৰু প্রকৃত ঘটনা পোহৰলৈ আহে তাকে কামনা কৰো।’ যুৱতী অধিবক্তাগৰাকীৰ মৃত্যুত বৃহত্তৰ কমাৰগাঁও অঞ্চলত চেপা উত্তেজনা বিৰাজ কৰিছে। ঘটনাৰ প্ৰকৃত কাৰণ পোহৰলৈ অহাটো কামনা কৰিছে স্থানীয় ৰাইজেও।