Kabul :অদূৰ ভৱিষ্যতে বিশ্বৰ প্ৰথমখন আধুনিক চহৰ হিচাবে ‘জলশূন্য চহৰ’ হোৱাৰ পথত আফগানিস্তানৰ ৰাজধানী কাবুল ।
মাৰ্চি কৰ্পছ অৰ্গেনাইজেচন নামৰ এটা সংস্থাৰ এক প্ৰতিবেদনত এনে চাঞ্চল্যকৰ দাবী উত্থাপন হৈছে।
প্ৰতিবেদনত কোৱা হৈছে, কাবুলৰ ভূগৰ্ভস্থ পানীৰ মাত্ৰা যোৱা এক দশক নামি গৈ ৩০ মিটাৰ হ্ৰাস পাইছে। আধাতকৈও অধিক কুঁৱাত পানীৰ চিন চাপেই নাই।
অথচ তাত পানীৰ মূল উৎস হ’ল কুঁৱা। ফলত স্বাভাৱিক জনজীৱন ব্যাহত হৈ পৰিছে। প্ৰকৃতিবিদসকলে ইয়াক গুৰুতৰ ‘প্ৰাকৃতিক দুৰ্যোগ’ বুলি গণ্য কৰে। ইয়াতেই শেষ নহয়।
কাবুলৰ ৮০ শতাংশ ভূগৰ্ভস্থ পানী এতিয়া ব্যৱহাৰযোগ্য নহয়।যদি পৰিস্থিতি এনেদৰেই থাকে তেন্তে ২০৩০ চনৰ ভিতৰত ভূগৰ্ভস্থ পানী সম্পূৰ্ণৰূপে শূণ্য হ’ব বুলি বিশেষজ্ঞসকলে অনুমান কৰে।
উল্লেখ্য যে,কাবুলৰ জনসংখ্যা ৭০ লাখ। প্ৰতি বছৰে তেওঁলোকে ব্যৱহাৰ কৰা পানীৰ পৰিমাণ ৪.৪ কোটি কিউবিক মিটাৰ । আফগানিস্তানৰ জল আৰু শক্তি মন্ত্ৰালয়ে পাঞ্জশ্বিৰৰ পানী কাবুললৈ আনিব বিচাৰিছে। ফলত বাজেট এখনো নিৰ্ধাৰণ কৰা হৈছে। কিন্তু ইয়াৰ বাবে ৩০০ৰ পৰা ৪০ কোটি ডলাৰৰ প্ৰয়োজন।