Jagannath Rath Yatra:পুৰীৰ ৰথ যাত্ৰাত বিশৃংখলতা। সংঘটিত পদপিষ্টৰ ঘটনা। দেওবাৰে পুৱা পুৰীৰ গুণ্ডিচা মন্দিৰৰ সমীপত সংঘটিত পদপিষ্টত কমেও তিনিজন লোকৰ মৃত্যু । আহত আৰু বহু ।
পুৰীৰ মূল মন্দিৰৰ পৰা গুণ্ডিচা মন্দিৰৰ দূৰত্ব প্ৰায় তিনি কিলোমিটাৰ।কিন্তু এই তিনি কিলোমিটাৰ পথ অতিক্ৰম কৰি থাকোঁতে তিনিখন ৰথ – নন্দিঘোষ, তালধৱাজ, আৰু দৰ্পাদলন – বাৰে বাৰে আবদ্ধ হৈ পৰে।
এই তিনিখন ৰথত আছিল জগন্নাথ, বলভদ্ৰ, আৰু সুভদ্ৰৰ মূৰ্তি । যদিও শুকুৰবাৰে মূল মন্দিৰৰ পৰা গুণ্ডিচা মন্দিৰলৈ ৰাওনা হয় কিন্তু গন্তব্য স্থানত উপস্থিত হ’ব নোৱাৰিলে।
শনিবাৰে তিনিখন ৰথ গুণ্ডিচা মন্দিৰত উপস্থিত হয় যদিও শনিবাৰে জগন্নাথ, বলভদ্ৰ আৰু সুভদ্ৰাক ৰথৰ পৰা নমাই দিয়া নাছিল।
গোটেই নিশা তিনিখন ৰথৰ চাৰিওফালে বহু ভক্ত গোট খাইছিল। আৰক্ষী আৰু প্ৰশাসনৰ নিৰ্দেশৰ পাছটো ভক্তসকলে ৰথৰ কাষ চাপিবলৈ চেষ্টা কৰে। আৰু তাতেই ঘটে অঘটন।
দেওবাৰে মাজনিশাৰ পৰা গুণ্ডিচা মন্দিৰৰ সমীপত ভগৱান জগন্নাথৰ ৰথক আগুৰি থকা জনসমাগম বৃদ্ধি পাবলৈ আৰম্ভ কৰে। সংবাদ মাধ্যমৰ সূত্ৰৰ অনুসৰি, পুৱা প্ৰায় আঠ বাজি ৩০ মিনিটত মন্দিৰৰ ফালে ৰথকেইখন গতি কৰিবলৈ আৰম্ভ কৰাৰ লগে লগে ৰাইজৰ মাজত বিশৃংখলতাৰ সৃষ্টি হয়।
ভিৰৰ মাজতে কিছুলোকে পৰি যায়। তাৰ পাছতে পদপিষ্ট হৈ তিনিজন লোকৰ থিতাতে মৃত্যু হয়। নিহত দুগৰাকী মহিলা – প্ৰভাতী দাস আৰু বসন্তী সাহু। আনজন আছিল প্ৰেমাকান্ত মহন্ত, ৭০ বছৰীয়া জেষ্ঠা।
তথ্য অনুসৰি,তিনিওজনেই ওড়িশাৰ খুৰ্দা জিলাৰ বাসিন্দা।ৰথ যাত্ৰা উপলক্ষে তেওঁলোক পুৰীলৈ আহিছিল। এই ঘটনাত কেবাজনো লোক আহত হয়। আহকসকল উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰা হয়।
তিনিজন লোকৰ মৃত্যুৰ খবৰ নিশ্চিত কৰিছে ওড়িশাৰ আইন মন্ত্ৰী পৃথ্বীৰাজ হৰিচন্দনে। ঘটনা সন্দৰ্ভত নিৰীক্ষণ কৰা হৈছে বুলিও তেওঁ জানিবলৈ দিয়ে।গাফিলতিৰ কোনো অভিযোগ পালেই কঠোৰ ব্যৱস্থা গ্ৰহণ কৰা হ’ব বুলিও তেওঁ কয়।