Matrimony Centre:
বিবাহৰ পাত্ৰ-পাত্ৰীৰ সন্ধান দিয়া ঘটক সংস্থাই গ্রাহকক লুণ্ঠন চলোৱাৰ গুৰুতৰ অভিযোগ উত্থাপন হৈছে। মহানগৰীৰ দুটা এনে প্রতিষ্ঠান ‘দ্য ৰয়েল ৱেডিংছ মেট্রিমনিয়েল কনছালটেন্ট’ আৰু ‘সাত ফেৰে মেট্রিমনিয়েল চেন্টাৰ’ৰ বিৰুদ্ধে গ্রাহকক প্ৰৱঞ্চনা আৰু কৰ্মক্ষেত্ৰত আতিশয্যৰ অভিযোগ উত্থাপন হৈছে। ৰয়েল ৱেডিংছৰ এগৰাকী প্রাক্তন কৰ্মচাৰীয়ে এই সন্দৰ্ভত দিছপুৰ আৰক্ষী থানাত গোচৰ ৰুজু কৰিছে।
ছায়াস্মিতা সেনাপতি নামৰ প্ৰাক্তন ছেলছ এগজিকিউটিভ গৰাকীয়ে সোমবাৰে দিছপুৰ থানাত দাখিল কৰা এজাহাৰত দাবী কৰা অনুসৰি কোম্পানীটোৱে বিভিন্ন প্ৰৱঞ্চনাৰ ঘটনাৰ স’তে জড়িত। বিবাহৰ পাত্ৰ-পত্ৰীৰ সন্ধান দিয়াৰ নামত গ্ৰাহকৰ পৰা ধন আদায় কৰি প্ৰৱঞ্চনা কৰাৰ অভিযোগ কৰিছে এজাহাৰত। ৰয়েল ৱেডিংছৰ স্বত্বাধিকাৰী পিংকি গায়ন আৰু উর্মিমালা গায়নৰ বিৰুদ্ধে অভিযোগ উত্থাপন কৰা হৈছে এজাহাৰত।
অভিযোগ অনুসৰি কোম্পানীৰ অবৈধ কাৰ্যকলাপৰ বাবে তেওঁ কৰ্মস্থলী ত্যাগ কৰিবলৈ বিচৰাত তেওঁ শাৰীৰিকভাৱে নিগৃহীত হয়, মৃত্যুৰ ভাবুকি দিয়া হয় আৰু মৌন হৈ থাকিবলৈ বাধ্য কৰোৱা হয়। আৰক্ষী সূত্ৰত প্রকাশ যে যোৱা ২৯ জুনত এই ঘটনাটো সংঘটিত হৈছিল। মহানগৰীৰ আদিত্য টাৱাৰৰ তৃতীয় মহলাত থকা কোম্পানীৰ কাৰ্যালয়ত এই ঘটনা সংঘটিত হয়। অভিযোগ অনুসৰি, সন্ধিয়া সাত বজালৈ অভিযোগকাৰীক কাৰ্যালয়ত আবদ্ধ কৰি ৰখা হয়, তেওঁৰ ম’বাইল ফোন কাঢ়ি লোৱাৰ উপৰি তেওঁক এক লিখিত ঘোষণাপত্র আদায় দিবলৈ বাধ্য কৰোৱা হয়। কোম্পানীক ক্ষতি কৰা কোনো কাম তেওঁ নকৰাৰ নিশ্চিতিৰে সকলো কৰ্মচাৰীৰ সন্মুখত এটা ভিডিঅ’ কৰা হয় বুলিও অভিযোগ উঠিছে।
অভিযোগৰাকীয়ে কয় যে সম্ভাৱনাপূর্ণ গ্রাহক আকৰ্ষিত কৰিবলৈ আৰু বিপথে পৰিচালিত কৰিবলৈ সামাজিক মাধ্যমৰ একাউণ্টসমূহৰ অপব্যৱহাৰ কৰা হয়। ছায়াস্মিতাই এজাহাৰত লিখিছিল যে তেওঁ ৰুক্মিণী গাঁৱৰ আদিত্য টাৱাৰ বিল্ডিঙত থকা ৰয়েল ৱেডিংছ মেট্রিমনিয়েল কনছালটেন্ট নামৰ অনুষ্ঠানটোত বিগত এবছৰ ধৰি ছেলছ এগজিকিউটিভ হিচাপে কৰ্মৰত আছিল। তেওঁ কয় যে ইয়াৰ পূৰ্বে ছাট ফেৰে মেট্রিমনিয়েল চেণ্টাৰত কাম কৰিছিল।
তেওঁ কয়, ‘দুয়োটা প্রতিষ্ঠান একেই, এজনেই গৰাকী পিংকি গায়ন আৰু উর্মিমালা গায়ন। দুটা প্ৰতিষ্ঠানৰ পৃথক কার্যালয়, এটা খ্রীষ্টানবস্তিৰ চেন্ট্রেল মলৰ পঞ্চম মহলাত অৱস্থিত ছাট ফেৰে মেট্রিমনিয়েল চেণ্টাৰৰ আৰু আনটো ৰয়েল ৱেডিংছৰ মেট্রিমনিয়েল কনছালটেন্ট’ৰ কাৰ্যালয় ৰুক্মিণী গাঁৱৰ আদিত্য টাৱাৰত অৱস্থিত। বিগত সাত বছৰ ধৰি তেওঁলোকে প্রতিষ্ঠান চলাই আছে আৰু বহু গ্ৰাহকৰ পৰা দৰা কইনা চাই দিম বুলি ধন আদায় কৰিছে।
‘ ছায়াস্মিতাই কয় যে এই ধনৰ বিপৰীতে তেওঁলোকে দিয়া সেৱাৰ প্ৰতিশ্ৰুতি পূৰণ কৰা নাছিল। তেওঁ পুনৰ কয়, ‘মই জনা নাছিলো যে তেওঁলোকে প্রৱঞ্চনা বা বেআইনী কামত লিপ্ত। ইয়াৰ বিৰুদ্ধে মাত মাতিলে কামৰ পৰা খেদি দিব, দৰমহা নিদিব জাতীয় ভাবুকি দিয়ে। কালি কার্যালয় ছুটী হোৱাৰ পাছত মোক মাৰপিট কৰে দুয়োটা কাৰ্যালয়ৰ কৰ্মচাৰীৰ সন্মুখত। মোক গালত চৰ শোধাইছে আনকি মোৰ ফোন জব্দ কৰি থৈছে।
কালি ৰয়েল ৱেডিংছৰ বহুকেইটা ৰিভিউ আহিছিল আৰু এইবোৰ মই লিখা বুলি তেওঁলোকে সন্দেহ কৰিছে। কিয়নো এই মাহটো মোৰ কাৰ্যালয়ত শেষ মাহ বুলি আৰু মই কাম নকৰো বুলি জনোৱা বাবেই মোৰ ওপৰত সন্দেহ কৰি মোক শাৰীৰিকভাৱে অপদস্থ কৰে। মই কৰ্মস্থলী ত্যাগ কৰি কথাবোৰ উদঙাই দিম বুলি তেওঁলোকে ভাবিছিল। যাৰ বাবে মোক ভাবুকি দিছে।’ ছায়াস্মিতাই কয় যে প্ৰতিষ্ঠানৰ পৰা ওলাই আহি ইয়াৰ বিৰুদ্ধে কোনো কথা নক’ব বুলি ভিডিঅ’ কৰে স্বত্বাধিকাৰীয়ে। কিবা ক্ষয়-ক্ষতি হ’লে দায়ী হ’ব বুলি লিখিত পত্ৰত স্বাক্ষৰ কৰায় বুলিও অভিযোগ উঠিছে।
ইপিনে, এই অভিযোগ খণ্ডন কৰে স্বত্বাধিকাৰী উর্মিমালা গায়নে। ছায়াস্মিতাই এজাহাৰৰ উল্লেখ কৰা মতে, কাৰ্যালয়টোৰ কিছুমান বেআইনী কাম তেওঁৰ দ্বাৰা কৰাই থকাৰ কথা তেওঁ লাহে লাহে উপলব্ধি কৰিছিল। সেয়ে তেওঁ কাম এৰিব খোজাত মাৰধৰ কৰাই নহয় হত্যাৰ ভাবুকি দিয়ে। যোৱা ২৯ জুনৰ নিশাই তেওঁৰ ওপৰত অত্যাচাৰ চলায়। তেওঁৰ প্ৰাপ্য ধন অর্থাৎ মাহিলি দৰমহা ১৭ হেজাৰ টকাৰ লগতে উদগনিৰ ধন ২১ হেজাৰ টকা আদায় নিদিয়ে বুলি ভাবুকি দিয়ে।