Formation of Jamuguri-Kujidah Panchayat:
নগাঁও জিলাৰ ৰহা সমষ্টিৰ অধীনস্থ জামুগুৰি-কুজীডাঁহ গাঁও পঞ্চায়তটোত পঞ্চায়ত গঠনত বিলম্ব হোৱাৰ ফলত যোৱা সপ্তাহটো একপ্ৰকাৰ বিজয়ী দহ গৰাকী প্ৰাৰ্থীৰ মাজত অব্যাহত আছিল বিভিন্ন জল্পনা-কল্পনা ৷ আন আন পঞ্চায়ত সমূহৰ দৰে এই পঞ্চায়তটোতো যোৱা ৪ জুলাইত পঞ্চায়ত গঠনৰ দিন আছিল যদিও প্ৰাৰ্থী সকলৰ মাজত সভাপতি পদক লৈ সৃষ্টি হোৱা মতবিৰোধৰ বাবেই শুকুৰবাৰৰ দিনটোলৈ পিছুৱাই দিয়া হৈছিল পঞ্চায়ত গঠনৰ তাৰিখ ৷
এই সময়ছোৱাটো সভাপতি পদ প্ৰত্যাশী প্ৰাৰ্থী দুই-তিনিগৰাকীৰ মাজত ভিতৰি ভিতৰি চলি আছিল এক যেন অঘোষিত যুদ্ধ ৷ শুকুৰবাৰেএই যুদ্ধৰ আখৰা সমাপ্ত কৰি বিয়লি ভাগলৈ পাখিমৰীয়া উন্নয়ন খণ্ডত অনুষ্ঠিত হয় পঞ্চায়ত গঠনৰ বাবে নিৰ্বাচন প্ৰক্ৰিয়া ৷ যোৱা ৪ জুলাইত চাৰিগৰাকী প্ৰাৰ্থী পঞ্চায়ত গঠনৰ সময়ত আঁতৰি থকাৰ বাবেই থমকি ৰ’বলগীয়া হৈছিল পঞ্চায়ত গঠনৰ সকলো প্ৰক্ৰিয়া ৷
অৱশেষত সকলো প্ৰতীক্ষাৰ অন্ত পেলাই জামুগুৰি-কুজীডাঁহ পঞ্চায়ত নিৰ্বাচনৰ ফলাফলে শুকুৰবাৰে একপ্ৰকাৰ নতুন মোৰ লয় ৷ পূৰ্বতে বটদ্ৰৱা সমষ্টিৰ অধীনস্থ এই পঞ্চায়তটো সমষ্টি পুনৰ নিদ্ধাৰণ প্ৰক্ৰিয়াত ৰহা সমষ্টিত সংযোজিত হোৱাৰ পিছত প্ৰথমবাৰলৈ পঞ্চায়ত গঠনত সৃষ্টি হয় এক অচলা অৱস্থা ৷ য’ত বিধায়ক শশী কান্ত দাসেও সুস্থিৰ সিদ্ধান্ত গ্ৰহণ কৰিব পৰাকৈ হৈ পৰে অপাৰগ ৷
অৱশ্যে তাৰ মাজতে শুকুৰবাৰে গণতান্ত্ৰিক পদ্ধতিৰে পঞ্চায়তটোৰ সভাপতি পদ প্ৰত্যাশী জ্যোতিস্না দাস আৰু সোণমণি বৰাৰ মাজত অনুষ্ঠিত হয় নিৰ্বাচন ৷ নিৰ্বাচনত দুয়ো গৰাকী প্ৰাৰ্থীয়ে পাঁচটাকৈ ভোট লাভ কৰি নিজৰ নিজৰ শক্তি প্ৰদৰ্শন কৰে যদিও অৱশেষত টচ্ৰ সহায় ল’বলগীয়া হয় ৷ টচ্ত জ্যোতিস্না দাসে জয় লাভ কৰি একপ্ৰকাৰ নিজৰ বিজয় সাব্যস্ত কৰে ৷
আনহাতে উপ-সভাপতি পদ প্ৰত্যাশী নিৰ্মালী দাস আৰু পুনম দেৱীৰ মাজত হোৱা নিৰ্বাচনৰ অন্তত নিৰ্মালী দাসে ছটা ভোট লাভ কৰি জয় সুনিশ্চিত কৰাৰ বিপৰীতে পুনম দেৱীয়ে ৪ টা ভোট লাভ কৰি পৰাজয় বৰণ কৰে ৷ শেহতীয়াকৈ জামুগুৰি-কুজীডাঁহ পঞ্চায়তটো গঠনৰ সফল সমাপ্তিয়ে ৰাইজলৈ আশাৰ বাণী কঢ়িয়াই আনিছে ৷