Abhayapuri: ✒️বঙাইগাঁও জিলাৰ সৃজনগ্রাম ৰাজহ চক্ৰৰ অন্তৰ্গত পাচনীয়া গো-মাঠত থকা ৫৩৩ বিঘা ভূমিত একাংশ সন্দেহযুক্ত নাগৰিকে বেদখল কৰি ঘৰ-দুৱাৰ সাজি থিতাপি লোৱাৰ পাছত শেহতীয়াভাবে ৰাজহ বিভাগে জৰীপ চলোৱাৰ পাছতে উচ্ছেদৰ আশংকাত নিদ্ৰাহৰণ হৈছে পৰিয়ালবোৰৰ।
উল্লেখ্য যে জিলাখনৰ অভয়াপুৰী সমজিলা তথা সৃজনগ্ৰাম ৰাজহ চক্ৰৰ অন্তৰ্গত পাচনীয়া-খোৰাগাঁও পঞ্চায়তৰ পাচনীয়া ৰাজহ গাঁৱৰ মাজত থকা গো-মাঠৰ ৫৩৩ বিঘা ভূমিত একাংশ সন্দেহজনক নাগৰিকে বেদখলকৃত ভূমিত ঘৰ-দুৱাৰ সাজি স্থায়ীভাবে বসতি কৰিবলৈ লোৱাত পার্শ্ববর্তী অঞ্চলত বসতি কৰা খিলঞ্জীয়া লোকসকল শংকিত হৈ পৰে।
তথ্য মতে, ১৯৯৮ৰ পৰাই গো-মাঠত বেদখল আৰম্ভ হোৱাৰ পাছত বর্তমানে ডেৰ শতাধিক পৰিয়ালে ভূমি বেদখল কৰি থিতাপি লৈ আছে। প্রথমাৱস্থাত প্রশাসনে বানপীড়িত কেইঘৰমান লোকক অস্থায়ীভাবে থাকিবলৈ দিছিল যদিও ইয়াৰ গইনা লৈ উক্ত পৰিয়ালবোৰৰ লগতে এডেও-দুডেও লোটা নিয়াৰ ছেওকৈ বহু সন্দেহযুক্ত নাগৰিক পৰিয়ালে গো-মাঠৰ ভূমি বেদখল কৰি নিগাজিকৈ থাকিবলৈ লয়।
মনকৰিবলগীয়া যে বঙাইগাঁও, গোৱালপাৰা জিলাৰ উপৰি আনকি ধুবুৰী, বৰপেটা জিলাৰ পৰাও সন্দেহযুক্ত লোক আহি উক্ত গো-মাঠৰ ভূমি বেদখল কৰিবলৈ লয়। এনে অৱস্থাত পাচনীয়া গো-মাঠ সংৰক্ষণ সমিতিয়ে বেদখলৰ বিৰুদ্ধে গুৱাহাটী উচ্চ ন্যায়ালয়ত এখন ৰাজহুৱা স্বার্থজনিত আবেদন দাখিল কৰে।
উক্ত আবেদনৰ ভিত্তিত ন্যায়ালয়ত এক গোচৰো পঞ্জীয়ন হয়। তাৰ পাছত উক্ত গোচৰমৰ্মে উচ্চ ন্যায়ালয়ৰ তদানীন্তন মুখ্য ন্যায়াধীশ ৰঞ্জন গগৈ আৰু ন্যায়াধীশ ঋষিকেশ ৰয়ৰ আদালতে পাচনীয়া গো-মাঠ সংৰক্ষণৰ সপক্ষে বিগত ২০০৯তে ৰায় প্ৰদান কৰে।
উক্ত ৰায় মর্মে তেতিয়াৰ জিলা উপায়ুক্তই উত্তৰ শালমাৰা মহকুমা প্রশাসনক ব্যৱস্থা লোৱাৰ বাবে নির্দেশ দিয়ে যদিও ১৭ বছৰ ধৰি কাৰ্যকৰী নহ’ল ন্যায়ালয়ৰ ৰায়। তদুপৰি ন্যায়ালয়ে উচ্ছেদৰ সবিশেষ তথ্য দুমাহৰ ভিতৰত ন্যায়ালয়ক জমা দিয়াৰ বাবে নির্দেশো দিছিল বুলি জানিব পৰা গৈছে।
জানিব পৰা মতে, শেহতীয়াভাবে এই সন্দর্ভত পাচনীয়া উন্নয়ন সমিতিয়ে মুখ্যমন্ত্রীক সবিশেষ তথ্যৰে এক পত্ৰ প্ৰেৰণ কৰে। এনে সময়তে ৰাজহ বিভাগে গো-মাঠত জৰীপ চলোৱা কাৰ্যই বিশেষ তাৎপর্য গ্রহণ কৰিছে। তদুপৰি জৰীপ চলোৱাৰ পাছতে বহু পৰিয়ালে ইতিমধ্যে আন ঠাইলৈ যোৱা বুলিও একাংশ লোকে জানিবলৈ দিয়ে।