World Snake Day:
ৰাজ্যত থকা প্রায় ৪৫ বিধ সাপৰ ভিতৰত সাতবিধহে বিশেষভাবে বিষাক্ত আৰু কেইবিধমান সামান্য বিষাক্ত। সাপৰ দংশনক লৈ এতিয়া সজাগতাৰহে আৱশ্যক। চিকিৎসা বিজ্ঞানৰ সহায় উপযুক্ত সময়ত ল’লে সর্প দংশনত মানুহৰ মৃত্যু নহয়। সেয়েহে কোনো দংশনকে উপেক্ষা নকৰি তৎকালীনভাবে চিকিৎসকৰ সহায় গ্রহণ কৰা প্ৰয়োজন। এতিয়া প্রায় সংখ্যক চৰকাৰী চিকিৎসালয়ৰ লগতে ব্যক্তিগত চিকিৎসালয়তো বিষ প্ৰতিৰোধী ঔষধ উপলব্ধ।’
দীর্ঘদিন ধৰি বিপদাপন্ন অন্যান্য জীৱ-জন্তুৰ লগতে প্রকৃতি সংৰক্ষণ তথা সৰ্পৰ সুৰক্ষা আৰু সংৰক্ষণৰ বাবে তেজপুৰৰ পৰা এক সজাগতা আন্দোলনক নেতৃত্ব দিয়া সর্পবান্ধর সৌৰভ বৰকটকীয়ে কাইলৈ অর্থাৎ ১৬ জুলাইৰ বিশ্ব সৰ্প দিৱসৰ প্রাকমুহূৰ্তত এইদৰে কয়। উল্লেখ্য যে তেজপুৰত এককভাৱেই সর্প সুৰক্ষাৰ লগতে ইয়াৰ বাবে ৰাইজৰ মাজত বৰকটকীয়ে আৰম্ভ কৰা সজাগতা কার্যসচীয়ে আজি বৃহৎ ৰূপ লৈছে।
দিনে-নিশাই ব্যক্তিগত লাভালাভক পৰিহাৰ কৰি সাপ আৰু বন্যপ্ৰাণীৰ সুৰক্ষাৰে জড়িত হোৱা বৰকটকীৰ এই জনমুখী আন্দোলনে এতিয়া ৰাজ্যজুৰি ব্যাপকতা লাভ কৰাৰ লগতে তেওঁ ইতিমধ্যে সমগ্র ৰাজ্যতে ভালেকেইজন নতুন প্ৰজন্মৰ যুৱক-যুৱতীক সৰ্প উদ্ধাৰৰ প্ৰশিক্ষণৰে প্রশিক্ষিতও কৰি তুলিছে। উল্লেখ্য যে সমগ্র বিশ্বত প্রায় চাৰে তিনি হেজাৰ প্ৰজাতিৰ সাপ আছে।
যিয়ে জৈৱ বৈচিত্র্য ৰক্ষাত গুৰুত্বপূর্ণ ভূমিকা গ্রহণ কৰি আহিছে। আনহাতে, ইয়াৰ ভিতৰত ছশ প্ৰজাতিৰ সাপ বিষাক্ত যদিও তাৰে ভিতৰত দুশ প্ৰজাতিৰ বিষে মানৱ জীৱনৰ বিশেষ ক্ষতিসাধন নকৰে। প্রণিধানযোগ্য যে ১৯৯০ত চকুৰ সম্মুখতে এজন ব্যক্তিয়ে এডাল সাপ হত্যা কৰাক লৈ প্ৰতিবাদ কৰি সাপৰ সংৰক্ষণৰ বাবে আত্মনিয়োগ কৰা বৰকটকীয়ে বিগত প্ৰায় ৩৫ বছৰে সাপ সংৰক্ষণৰ তথা সৰ্বসাধাৰণৰ মাজত সজাগতা সৃষ্টিৰ প্রয়াস চলাই গৈছে। এই পর্যন্ত অজগৰ, ফেটা, ৰাছেল ভাইপাৰ, গোৱলাকে ধৰি বিভিন্ন প্রজাতিৰ পাঁচ হেজাৰৰ অধিক বৰকটকীয়ে সুৰক্ষিতে উদ্ধাৰ কৰিছে। তেওঁ প্রকাশ কৰে যে বিগত সময়ত ৰাজ্যত সর্প দংশনত মানুহৰ মৃত্যুৰ সংখ্যা যথেষ্ট হ্রাস পাইছে।
শোণিতপুৰৰ প্রাক্তন অবৈতনিক বন্যপ্রাণী ৱার্ডেন তথা ৰাজ্য চৰকাৰৰ বঁটা প্রাপক বৰকটকীয়ে কয় যে ৰাজ্যত ২০২২ত ১৫০ জনৰ সৰ্প দংশনত মৃত্যু ঘটাৰ বিপৰীতে ২০২৩ত ৩৭ জনৰ, ২০২৪ত ৩৬ জনৰ আৰু ২০২৫ত ১৪ জনৰ মৃত্যু ঘটিছে। ৰাজ্যৰ বঙাইগাঁও, নগাঁও, গহপুৰ, গোৱালপাৰা, বৰপেটা, নাহৰকটীয়া, শদিয়া, নলবাৰী, লখিমপুৰ আদিত এই বছৰ ১৪ জনৰ সৰ্প দংশনত মৃত্যু ঘটিছে বুলিও তেওঁ কয়।
উল্লেখ্য যে বৰকটকীৰ নেতৃত্বত তেজপুৰৰ ঐতিহ্যমণ্ডিত তৰুণ অসম সংঘত ২০২৩-২৪ত সর্পবান্ধৱ টীম গঠন কৰা হয়। তেজপুৰৰ লগতে সমগ্ৰ ৰাজ্যৰে বহুসংখ্যক বন্যপ্রাণী প্রেমী ইয়াৰে জড়িত হৈ পৰে। বিগত দুবছৰে বিশ্ব সর্প দিৱস আয়োজন কৰি এই টীমে ৰাজহুৱাভাৱে সর্পবান্ধৱ হিচাপে ২০ জনক সম্বর্ধনা জনায় ৷