Hair loss: ✒️চুলি সৰি মূৰ প্রায় উকা হৈ পৰিছে নেকি? বহুতেই ক’ব যে দোষটো হেলমেটৰ। মটৰ চাইকেল বা স্কুটাৰ চলাবলৈ হ’লে বা দুচকীয়া বাহনৰ আৰোহী হোৱাৰ বাবেও সুৰক্ষাৰ স্বাৰ্থতে হেলমেট পৰিধান কৰাটো আৱশ্যক।
অথচ দীর্ঘ সময় ধৰি হেলমেট পৰিধান কৰি থাকিলে বহুতৰে চুলি সৰাৰ সমস্যা হয়। মূৰৰ ছালত ঘাম লাগি ধৰে। তাৰ পৰাই সংক্রমণ হয়। আকৌ চুলিৰ গুৰি তিতি থকাৰ ফলতো চুলি সৰে।
হেলমেট পৰিধান কৰাৰ ফলত এনে সমস্যাৰ সন্মুখীন কম-বেছি পৰিমাণে অধিকাংশ লোকেই হয়। অৱশ্যে এই ক্ষেত্ৰত চুলিৰ যত্ন কিদৰে ল’ব লাগিব সেই কথাই শিকাইছে দেশৰ খ্যাতিমান কেশসজ্জা শিল্পী জাভেদ হাবিবে।
তেওঁৰ দক্ষতাৰ কথা কেৱল ভাৰতেই নহয়, বিশ্বৰ অধিকাংশ লোকেই জানে। হাবিবে মন্তব্য কৰিছে যে হেলমেট নিৰ্বাচনৰ ভুলতো চলিৰ ক্ষতি হ’ব পাৰে। তদুপৰি মূল সমস্যা হৈছে মূৰৰ ছালত ঘাম লাগি ধৰা। ইয়াৰ ফলতে চুলিৰ গুৰি নৰম হৈ চুলি সৰিবলৈ আৰম্ভ কৰে।
সম্প্রতি কেশসজ্জা শিল্পীজনে সামাজিক মাধ্যমত হেলমেট পৰিধান কৰাৰ ফলত চুলি সৰা কিদৰে ৰোধ কৰিব পাৰি, সেই বিষয়ত এটা ভিডিঅ’ প’ষ্ট কৰিছে। তাতেই হাবিবে জনাইছে যে সমস্যাৰ কাৰণ হ’ব পাৰে ভুল হেলমেটৰ নিৰ্বাচন।
অতি পাতল হেলমেট যিদৰে সুৰক্ষাৰ বাবে অনুপযুক্ত, সেইদৰে মূৰত লিপিট খাই থকা হেলমেটো অনুপযুক্ত। হাবিবৰ মতে, ইয়াৰ ফলত ছালত ঘাম বেছিকৈ লাগি ধৰে, লগতে হেলমেট খোলাৰ সময়ত চুলিতো টান ধৰে। যিটো চুলি সৰাৰ অন্যতম কাৰণ।
হাবিবে লগতে পৰামৰ্শ দি কয় যে হেলমেট সম্পূর্ণ আৰামদায়ক হোৱা উচিত। তদুপৰি নিয়মিত হেলমেট পৰিধান কৰিবলগীয়া হ’লে চুলিৰ যত্নৰ বাবে প্রতিদিনেই ছেম্প্যু কৰিব লাগে। ইয়াৰ ফলৰ ঘাম গোেট মাৰি ছালত সংক্ৰমণৰ আশংকা হ্রাস পায়।
পূৰ্বেও এক সাক্ষাৎকাৰত হাবিবে এই প্রসংগত একাধিক পৰামৰ্শ প্রদান কৰিছিল। তেওঁ জনাইছিল যে সিক্ত চুলিত হেলমেট পিন্ধা একেবাৰে অনুচিত। নিয়মিতৰূপে ছেম্প্যু কৰাৰ সমান্তৰালকৈ চুলিত যাতে ঘাম লাগি নধৰে তাৰ বাবে সূতাৰ কাপোৰ এখন মূৰত বান্ধি ল’বলৈ তেওঁ পৰামৰ্শ দিছিল।
তাৰ লগতে তেওঁৰ জোৰ দিছিল হেলমেটৰ পৰিচ্ছন্নতাৰ বিষয়তো। হেলমেটৰ ভিতৰৰ অংশত যি নৰম পেড থাকে, তাতো ঘাম লাগি থাকে। সঠিকভাৱে পৰিষ্কাৰ কৰা নহ’লে তাৰ পৰাও মূৰৰ ছালত সংক্রমণ হ’ব পাৰে। সপ্তাহত এদিন চুলিৰ যত্নৰ বাবে এলো ভেৰা জেল সনাৰো পৰামৰ্শ দিছে কেশসজ্জা শিল্পীজনে।