BJP holds SpL meeting at Hotel Mayfair:
বিধানসভা নিৰ্বাচনৰ দিন চমু চাপি অহাৰ লগে লগে শাসকীয় বিজেপিয়ে তৎপৰতা বৃদ্ধি কৰিছে। এই নির্বাচনক লৈয়ে মহানগৰীৰ সমীপৱৰ্তী সোণাপুৰৰ এখন বিলাসী ৰিজ’ৰ্ট ‘হোটেল মেফেয়াৰ’ত শনিবাৰৰ পৰা দুদিনীয়াকৈ অনুষ্ঠিত হৈছে দলৰ ৰণকৌশল কেন্দ্ৰিক ৰুদ্ধদ্বাৰ বৈঠক। বিজেপিৰ চিন্তন বৈঠকৰ দ্বিতীয় দিন ৷ ঘনে ঘনে বহিছে বৈঠক ৷ চিন্তন বৈঠকত অংশগ্ৰহণ ড:হিমন্ত বিশ্ব শৰ্মাৰ | চিন্তন বৈঠকত মুখ্যমন্ত্ৰী ড:হিমন্ত বিশ্ব শৰ্মাই অংশগ্ৰহণ কৰি মন্ত্রী-বিধায়কক দলীয় শক্তি মজবুত কৰিবলৈ আহ্বান জনায়।
উল্লেখ্য যে বশিষ্ঠত বৃহৎ ৰাজ্যিক কার্যালয় থকাৰ পাছতো গোপনীয়তা ৰক্ষাৰ স্বাৰ্থতে নির্দিষ্ট বিশেষ ৫১ জন অংশগ্রহণকাৰীৰে আয়োজন কৰা এই বৈঠকত ম’বাইল ফোনৰ ব্যৱহাৰো নিষিদ্ধ কৰা হৈছে। বিজেপিৰ ৰাষ্ট্ৰীয় সাংগঠনিক সধাৰণ সম্পাদক বি এল সন্তোষৰ অধ্যক্ষতাত অনুষ্ঠিত এই বৈঠকত দলৰ প্ৰতিজন বিধায়ক তথা মন্ত্রীৰ কাম-কাজৰ বিশ্লেষণ কৰাৰ উপৰি সকলো প্রত্যাহ্বান নেওচি অধিক সফলতাৰে কিদৰে পৰৱৰ্তী চৰকাৰো দলটোৱে গঠন কৰিব পাৰে, তাৰ আলোচনা কৰা হৈছে।
বিশেষকৈ বিৰোধী কংগ্ৰেছৰ সকলো প্ৰত্যাহ্বান ওফৰাই পেলোৱাৰ ৰণকৌশলক এই বৈঠকতে চূড়ান্ত ৰূপ দিয়া হ’ব। তাৰ আলোচনা আজিৰ পৰাই আৰম্ভ হৈছে। বিধানসভা নিৰ্বাচনৰ পূৰ্বে ৰাজ্যত অনুষ্ঠিত হ’বলগীয়া বিটিচিসহ পৰিষদীয় নির্বাচনবোৰক লৈয়ো কাইলৈ এই বৈঠকত আলোচনা হ’ব।
উল্লেখ্য যে শনিবাৰৰ পৰা আৰম্ভ হোৱা এই বৈঠকৰ পূৰ্বে শুকুৰবাৰে বিজেপিৰ সকলো বিধায়ক, সাংসদৰ উপস্থিতিত এখন বিশেষ বৈঠক অনুষ্ঠিত হয়। দিছপুৰত অনুষ্ঠিত বৈঠকত ৰাজ্যিক বিজেপিৰ সভাপতি দিলীপ শইকীয়া, অসমৰ সাংগঠনিক সাধাৰণ সম্পাদক ৰবীন্দ্ৰ ৰাজুও উপস্থিত থাকে। এই সভাত মুখ্যমন্ত্ৰীয়ে আজিৰ তাৰিখত নির্বাচন অনুষ্ঠিত হ’লে কমেও ২২ জন বিধায়কৰ প্রার্থিত্বক লৈ অনিশ্চয়তাৰ সৃষ্টি হ’লহেঁতেন বুলি মন্তব্য কৰে।
অৱশ্যে কোনো বিধায়কৰ নাম মুখ্যমন্ত্ৰীয়ে উল্লেখ নকৰিলে। তাৰ পৰিৱৰ্তে সকলোকে অহা ডিচেম্বৰৰ ভিতৰত পুনৰ প্ৰাৰ্থিত্ব লাভৰ বাবে নিজকে যোগ্য প্রতিপন্ন কৰিবলৈ সময়সীমা নির্ধাৰণ কৰি দিয়ে। ডিচেম্বৰত সকলোৰে কামৰ খতিয়ান লোৱা হ’ব আৰু তাৰ ভিতৰত যদি কোনোবাই নিজৰ যোগ্যতা প্রতিপন্ন কৰিব নোৱাৰে, তেন্তে মুখ্যমন্ত্রী হ’লেও সহায় কৰাটো তেওঁৰ বাবে সম্ভৱ নহ’ব বুলি স্পষ্ট কৰি দিয়ে।
বৈঠকখনৰ সন্দৰ্ভত দিলীপ শইকীয়াই কয়, ‘বিজেপিয়ে কাৰো মুখ চাই নির্বাচনত প্রার্থিত্ব নিদিয়ে। গতিকে প্রতিজন বিধায়কে নিজৰ যোগ্যতা প্রতিপন্ন কৰিব লাগিব। নির্বাচনলৈ ছমাহ আছে। আনহাতে, কাম কৰিবলৈ সময় আছে চাৰে তিনি মাহ। এই সময়ছোৱাৰ ভিতৰতে সকলো বিধায়কে পুনৰ প্ৰাৰ্থিত্ব লাভকৰিবলৈ নিজৰ যোগ্যতা অর্জন কৰিব লাগিব।’ শইকীয়াই সকলোকে ৰাইজৰ লগত থাকি ৰাইজৰ হৈ কাম কৰিবলৈ পৰামৰ্শ আগবঢ়ায়।
লক্ষ্যণীয়ভাবে এনে পৰামৰ্শ আগবঢ়োৱাত ধৃষ্টতা প্ৰদৰ্শন কৰিবলৈ নেৰিলে ব্যৰ্থ মন্ত্ৰী অশোক সিংহলে। জলসিঞ্চন বিভাগটোক বগাহাতীত পৰিণত কৰা সিংহলেও কয় যে যদি কোনো বিধায়কে গণভিত্তি হেৰুৱাইছে, মনলৈ অহংকাৰ ভাব আহিছে, তেনে বিধায়কে পুনৰ প্ৰাৰ্থিত্ব নাপাব পাৰে।