Thailand: ✒️থাইলেণ্ড-কম্বোডিয়া যুদ্ধৰ মাজতে এইবাৰ দেশবাসীৰ বাবে নতুন সতৰ্কতা জাৰি কৰিলে ভাৰতে। শুকুৰবাৰে থাইলেণ্ডত থকা ভাৰতীয় দূতাবাসে এক বিবৃতি প্ৰকাশ কৰি কয় যে ভাৰতীয়সকলে আপাততঃ সাতখন প্ৰদেশলৈ যাত্ৰা নকৰাই উচিত ।
উল্লেখ্য যে শুকুৰবাৰে থাইলেণ্ডৰ ভাৰপ্ৰাপ্ত প্ৰধানমন্ত্ৰীয়ে যুদ্ধৰ পৰিস্থিতি অধিক অৱনতি ঘটা বুলিও জানিবলৈ দিয়ে। এই পৰিস্থিতিতেই ভাৰতে নিজৰ নাগৰিকক সকীয়াই দিছে।
শুকুৰবাৰে থাইলেণ্ডৰ ভাৰতীয় দূতাবাসে এক্স হেণ্ডেলত কয়, “থাইলেণ্ড-কম্বোডিয়া সীমান্তৰ পৰিস্থিতিৰ প্ৰতি লক্ষ্য ৰাখি ভাৰতীয় পৰ্যটকসকলক থাইলেণ্ড প্ৰশাসনৰ স’তে যোগাযোগ ৰাখিবলৈ পৰামৰ্শ দিয়া হৈছে।সকলোৱে থাইলেণ্ডৰ পৰ্যটন বিভাগৰ নিৰ্দেশনা মানি চলিব লাগে।”
নিৰ্দেশনা অনুসৰি ভাৰতীয়সকলে আপাততঃ সাতখন প্ৰদেশ ভ্ৰমণৰ পৰা বিৰত থাকিব লাগে। এই সাতখন প্ৰদেশত কমেও ২০টা পৰ্যটনস্থলী আছে।
মন কৰিবলগীয়া যে শেহতীয়াকৈ থাইলেণ্ড ভাৰতীয় পৰ্যটকৰ মাজত যথেষ্ট জনপ্ৰিয় হৈ পৰিছে।
প্ৰসংগক্ৰমে কম্বোডিয়া, থাইলেণ্ড, লাওছৰ সীমাৰেখা লগ হোৱা ‘এমাৰেল্ড ট্ৰায়াঙেল ’ নামৰ অঞ্চলটোক লৈ দুয়োখন দেশৰ মাজত দীৰ্ঘদিনীয়া সংঘাত চলি আছে।
পোন্ধৰ বছৰ পূৰ্বে কম্বোডিয়া আৰু থাইলেণ্ডে এই অঞ্চল নিয়ন্ত্ৰণৰ বাবে যুদ্ধ কৰিছিল। যোৱা মে’ মাহত পুনৰ সংঘৰ্ষৰ আৰম্ভ হয়।
দুয়োখন দেশৰ সীমান্তত পুনৰ উত্তেজনা বৃদ্ধি পায় । বৃহস্পতিবাৰে পুৱা সীমান্ত অঞ্চলত থাইলেণ্ড আৰু কম্বোডিয়াৰ সৈন্যই গুলীচালনা কৰে।
ইয়াৰ পাছতে থাইলেণ্ডৰ সেনাই এফ-১৬ যুঁজাৰু বিমানেৰে কম্বোডিয়াৰ ভূখণ্ডত প্ৰৱেশ কৰি আক্ৰমণ কৰে। এনে পৰিস্থিতিত বৃহস্পতিবাৰে থাইলেণ্ডৰ প্ৰধানমন্ত্ৰীয়ে জানিবলৈ দিয়া মতে থাইলেণ্ডৰ অৱস্থা অধিক বেয়া হৈছে। অতি সোনকালে পূৰ্ণাংগ যুদ্ধৰ সম্ভাৱনা আছে। উল্লেখ্য যে ,সংঘাতৰ ফলত মৃত্যু হোৱা লোকৰ সংখ্যাও ১৪ জনলৈ বৃদ্ধি পাইছে।