Tourist:✒️চাওঁতে চাওঁতে ২০২৫ শেষ হ’বৰ হ’ল। ইতিমধ্যে বহুতে বছৰটোৰ অন্তিম ক্ষণত উপস্থিত হৈ এৰি অহা দিনবোৰৰ কথা জুকিয়াই চাইছে। এনে সময়তে প্রকাশ পাইছে চলিত বর্ষত সর্বাধিক বিদেশী পৰ্যটকে ভিৰ কৰা বিশ্বৰ শীৰ্ষৰ মহানগৰসমূহৰ তালিকা। আধ্যাত্মিক পৰ্যটনৰ পৰা অত্যাধুনিক সা-সুবিধাযুক্ত মহানগৰলৈ পৰ্যটনৰ নানা শাখাক সামৰি লোৱা হৈছে। এই তালিকাত ১০ খন মহানগৰে স্থান পাইছে।
এই মহানগৰসমূহৰ মাজত এছিয়াৰো ছখন মহানগৰ আছে। অৱশ্যে এই তালিকাত অন্তর্ভুক্ত নহ’ল ভাৰতৰ এখনো মহানগৰ। এই শীর্ষ ১০ পর্যটনস্থলী হৈছে-
বেংকক (থাইলেণ্ড): বিগত কিছু বছৰৰ পৰা থাইলেণ্ডৰ ৰাজধানী বেংককে বিশ্বৰ চৌদিশৰ পৰ্যটকক আকৰ্ষণ কৰিবলৈ লৈছে। ইয়াৰ সুবাদত মাথোঁ এই বছৰটোতে তিনি কোটি তিনি লাখ বিদেশী পর্যটকে বেংকক ভ্রমণ কৰে। ফলত চলিত বর্ষটোত সর্বাধিক আন্তর্জাতিক পর্যটকে পদার্পণ কৰা ১০ স্থান বা মহানগৰৰ ভিতৰত সর্বোচ্চ স্থান দখল কৰিছে বেংককে।
বেংকক বিদেশী পর্যটকসকলৰ মাজত জনপ্রিয় হোৱাৰ কাৰণ হ’ল বাট-পথত ৰঙীন উচ্ছলতাৰ পয়োভৰ, সুশোভিত মঠ-মন্দিৰ আৰু বিশ্বখ্যাত খাদ্য। সাধাৰণতে বিদেশী পর্যটকসকলে বেংককৰ গ্রেণ্ড পেলেচ আৰু ৱাট আৰুন ভ্রমণ কৰে। মহানগৰখনৰ প্ৰসাৰিত বজাৰ আৰু উদ্দামতা থকা নৈশ জীৱনেও বিদেশী পর্যটকসকলক হাত বাউল দি মাতে। এই ক্ষেত্রত আটাইতকৈ উল্লেখনীয় দিশটো হ’ল যে থাইলেণ্ডত ফুৰা-চকা কৰাটো কম খৰচতে সম্ভৱ হয়। গতিকে দেশখনৰ ৰাজধানী চহৰ বছৰটোৰ প্ৰতিক্ষণতে পর্যটকসকলৰ প্ৰিয় হৈ থাকে।
হংকং: চলিত বর্ষত ২.৩২ কোটি বিদেশী পর্যটকে হংকং ভ্রমণ কৰে। হংকঙৰ ভিক্ট’ৰিয়া হাৰ্বাৰ, সুউচ্চ অট্টালিকাসমূহ হৈছে পৰ্যটকৰ মূল আকর্ষণ। এই ভিক্ট’ৰিয়া হার্বাৰত প্রাচ্য আৰু পাশ্চাত্য সংস্কৃতিৰ ফুৰণ ঘটিছে। বজাৰৰ সুব্যবস্থা, বিশ্বমানৰ হোটেল-ৰেস্তোৰাঁ, ডিজনীলেণ্ড হংকঙৰ লেখীয়া আকর্ষণে সদায়েই পর্যটকসকলক মুগ্ধ কৰি আহিছে। তদুপৰি হংকং বিশ্ব বাণিজ্যৰো বিত্তীয় কেন্দ্র। এনেবোৰ দিশে মহানগৰখনৰ প্ৰতি সমগ্ৰ বিশ্বৰ লোকৰ দৃষ্টি আকর্ষণ কৰে।
লণ্ডন: ইতিহাস আৰু আধুনিকতাৰ মিশ্রণে সমগ্ৰ বিশ্বৰ পৰ্যটকসকলৰ বাবে প্রিয় পর্যটনস্থলী কৰি ৰাখিছে লণ্ডনক। যেনিয়েই চাই সেই দিশতে লণ্ডনে আন্তর্জাতিক পর্যটকসকলক মুগ্ধ কৰে। এনে পর্যটন আকৰ্ষণৰ অন্যতম হৈছে ব্রিটিছ ৰাজপ্রসাদ, বাকিংহাম পেলেচ। তদুপৰি লণ্ডন টাৱাৰ, ব্রিটিছ মিউজিয়াম আদিয়েও বিশ্বৰ কোটি কোটি পর্যটকক আকর্ষণ কৰে। এনে কাৰণতে এই বছৰ দুই কোটি ২৭ লাখ বিদেশী পর্যটকে লণ্ডন ভ্রমণ কৰে।
মাকাও (চীন): চীনৰ মাকাও চহৰক এছিয়াৰ লাছ ভেগাছ বুলি জনা যায়। কাৰণ মাকাও চহৰত বহু কেছিন’ আছে। এই কেছিন ‘সমূহেও সমগ্র বিশ্বৰ পৰ্যটকক আকৰ্ষণ কৰে। তদুপৰি বিলাসী ৰিজ’ৰ্ট আৰু পর্তুগীজ ঐতিহ্যয়ো হাত বাউল দি মাতে পর্যটকসকলক। এনে কাৰণতে এইবাৰ দুই কোটি চাৰি লাখ বিদেশী পর্যটকে মাকাও চহৰ ভ্ৰমণ কৰে। উল্লেখ্য যে মাকাও চহৰ ইউনেস্ক’ৰ ঐতিহ্য স্থানো। আধুনিক আমোদ-প্রমোদৰ সা-সুবিধাৰ লগতে এই চহৰত ঐতিহাসিক সমলো পোৱা যায়।
ইষ্টানবুল (তুৰস্ক): এছিয়া আৰু ইউৰোপৰ মাজৰ সেতুৰূপে খ্যাত তুৰস্কৰ ইষ্টানবুল চহৰ এক ঐতিহাসিক চহৰ। এই চহৰৰ মূল পর্যটক আকর্ষণ স্থলীসমূহ হৈছে বিখ্যাত হাগিয়া ছ’ফিয়া, ব্লু মস্ক আৰু গ্রেণ্ড বাজাৰ। এইবাৰ এক কোটি ৯৭ লাখ বিদেশী পর্যটকে ইষ্টানবুল ভ্রমণ কৰে।
ডুবাই: ডুবাইয়েও সমগ্ৰ বিশ্বৰ পৰ্যটকক সদায়ে হাত বাউল দি মাতে। বুর্জ খলিফা, পাম জুমেৰাহ আদি হৈছে ডুবাইৰ প্রধান পর্যটক আকর্ষণস্থলী। চলিত বৰ্ষত বিশ্বৰ এক কোটি ৯৫ লাখ পর্যটকে ডুবাই ভ্রমণ কৰে।
মক্কা (ছৌদি আৰব): সমগ্র বিশ্বৰ ইছলাম ধৰ্মাৱলম্বীসকলৰ বাবে পৱিত্ৰ স্থান মক্কাত এইবাৰ এক কোটি ৮৭ লাখ লোকে পদার্পণ কৰে। সেইসূত্রে এই পৱিত্র মহানগৰে বিশ্বৰ সবাতোকৈ পর্যটক পদার্পণ কৰা চহৰসমূহৰ অন্যতমৰূপে খ্যাতি অৰ্জন কৰিছে।
এন্টালিয়া (তুৰস্ক): তুৰস্কৰ আন এখন পর্যটন আকর্ষণস্থলী হৈছে এন্টালিয়া। ভূমধ্য সাগৰৰ মুকুতাৰূপে জনাজাত এন্টালিয়াই সমগ্ৰ বিশ্বৰ পৰ্যটকক আকৰ্ষণ কৰে। ইয়াৰ কাৰণ হৈছে সমুদ্র তীৰ, বিলাসী ৰিজ’ৰ্ট, প্রাচীন ধ্বংসাবশেষ আদি। চলিত বর্ষত এক কোটি ৮৬ লাখ পর্যটকে এন্টালিয়া ভ্রমণ কৰে।
পেৰিছ: আইফেল টাৱাৰৰ দৰে বিস্ময় অৱস্থিত পেৰিছেও সমগ্ৰ বিশ্বৰ পৰ্যটকক আকৰ্ষণ কৰি আহিছে। এইবাৰ ১.৮৩ কোটি পর্যটকে পেৰিছ ভ্রমণ কৰে।
কুৱালালামপুৰ (মালয়েচিয়া): পেট্র’নাছ টুইন টাৱাৰ, বৈচিত্র্যপূর্ণ খাদ্য সংস্কৃতি, বজাৰৰ সুব্যৱস্থা আদিয়ে মালয়েচিয়াৰ ৰাজধানী কুৱালালামপুৰকো বিশ্বৰ অন্যতম জনপ্রিয় পর্যটনস্থলীত পৰিণত কৰিছে। চলিত বৰ্ষত ১.৭৩ কোটি পর্যটকে কুৱালালামপুৰ ভ্ৰমণ কৰে।
