Air india: পুনৰ বিমান বিপত্তি! জয়পুৰৰ পৰা মুম্বাইলৈ গৈ থকা এয়াৰ ইণ্ডিয়াৰ এখন বিমান উৰণৰ মাত্ৰ ১৮ মিনিটৰ পাছতে কাৰিকৰী বিসংগতিৰ খবৰ পোৱাৰ পাছত বিমানবন্দৰলৈ উভতি আহে।
প্ৰাপ্ত তথ্য অনুসৰি এআই-৬১২ বিমানখন জয়পুৰ বিমানবন্দৰৰ পৰা দুপৰীয়া ১.৩৫ বজাত উৰা মাৰিছিল যদিও ১.৫৮ বজাত পুনৰ বিমানবন্দৰলৈ উভতি আহে।
বিগত কেইমাহমানৰ পৰা এয়াৰ ইণ্ডিয়াৰ বিমানসমূহে কাৰিকৰী সমস্যাৰ সন্মুখীন হৈছে। চলিত মাহতে এয়াৰ ইণ্ডিয়াৰ কেবাখনো বিমানত দেখিবলৈ পোৱা গৈছে ত্ৰুটি।
২০২৫ চনৰ ২১ জুলাইলৈকে বিমান সংস্থাসমূহে ১৮৩টা কাৰিকৰী দোষ ধৰা পেলাইছে: চৰকাৰ
কেন্দ্ৰীয় চৰকাৰৰ তথ্য অনুসৰি চলিত বৰ্ষৰ ২১ জুলাই পৰ্যন্ত পাঁচটা ভাৰতীয় বিমান সংস্থাই নিজৰ বিমানত ১৮৩টা কাৰিকৰী ত্ৰুটি ধৰা পেলাইছে।
লোকসভাত লিখিত উত্তৰত চৰকাৰে কয় যে এয়াৰ ইণ্ডিয়া আৰু এয়াৰ ইণ্ডিয়া এক্সপ্ৰেছৰ একেলগে ৮৫টা কাৰিকৰী বিসংগতি ধৰা পৰিছে। ইণ্ডিগ’ আৰু আকাছা এয়াৰে ক্ৰমে ৬২ আৰু ২৮টা যান্ত্ৰিক ত্ৰুটিৰ কথা জনাইছে। ইফালে স্পাইচজেটে এনে আঠটা ত্ৰুটিৰ কথা প্ৰকাশ কৰিছে।
কেন্দ্ৰীয় অসামৰিক বিমান পৰিবহণ বিভাগৰ ৰাজ্যিক মন্ত্ৰী মুৰলীধৰ মোহলে কয় যে বিমান সংস্থাটোৱে অসামৰিক বিমান পৰিবহণ সঞ্চালকালয় (ডিজিচিএ)ক জনোৱা সকলো দোষৰ বাবে উপযুক্ত শুধৰণিৰ ব্যৱস্থা গ্ৰহণৰ বাবে তদন্ত কৰিব লাগিব।
উল্লেখ্য যে,২০২৪ চনত বিমান সংস্থাসমূহে ৪২১টা কাৰিকৰী সমস্যাৰ কথা প্ৰকাশ কৰিছিল । ২০২৩ চনত এই সংখ্যা আছিল ৪৪৮ আৰু ২০২২ চনত ৫২৮।২০২১ চনত এই সংখ্যা আছিল ৫১৪।