China:সন্তান বা আত্মীয়-স্বজন নহয়, বৰঞ্চ কোনো অপৰিচিত ব্যক্তিৰ নামত নিজৰ সমস্ত সম্পত্তি উইল কৰিব বিচাৰে এজন চীনা বৃদ্ধই। অৱশ্যে এটা চৰ্ত আছে। তেওঁৰ মৃত্যুৰ পাছত পোহনীয়া মেকুৰীজনীৰ নিঃচর্তভারে যত্ন ল’ব লাগিব।
চীনৰ গুৱাংডং প্রদেশৰ এজন ৮২ বছৰীয়া বৃদ্ধৰ এই অদ্ভুত ইচ্ছাক কেন্দ্ৰ কৰি এতিয়া দেশখনৰ সামাজিক মাধ্যমত তোলপাৰ লাগিছে।লং নামৰ সেই অশীতিপৰ বৃদ্ধজনে তেওঁৰ অতি মৰমৰ পোহনীয়া মেকুৰী ‘জিয়ানবা’ৰ ভৱিষ্যৎ সুৰক্ষিত কৰাৰ বাবেই এই সিদ্ধান্ত লৈছে।
চীনৰ সংবাদ মাধ্যমৰ সূত্ৰই জনোৱা মতে, লং নিঃসন্তান। এটা দশকৰ পূৰ্বে পত্নীৰ মৃত্যুৰ পাছৰে পৰা তেওঁ অকলে বাস কৰিছে। এক বৰষুণৰ দিন বৃদ্ধই চাৰিটা মেকুৰীক নিজৰ ঘৰত আশ্রয় দিছিল।
ডাঙৰ মেকুৰীজনীৰ নাম ৰাখে জিয়ানবা। লগত তাইৰ তিনিটা পোৱালিও আছিল। সম্প্রতি জিয়ানবাৰ অবিহনে লঙৰ কোনো সংগী নাই। সেয়ে নিজৰ অবর্তমানত পোহনীয়া প্ৰাণীটিৰ চোৱা-চিতাৰ বাবে তেওঁ উপযুক্ত লোকৰ সন্ধান কৰি আছে।
গুৱাংডঙৰ এটা টিভি চেনেলক লঙে জনাইছে যে যিজনে তেওঁৰ মেকুৰীৰ ‘ভালদৰে যত্ন’ ল’বলৈ সন্মত হ’ব, সেইজনকে তেওঁ নিজৰ ফ্লেট আৰু সমস্ত জমা ধন দি যাব বিচাৰে।
এই বাতৰি বিয়পি পৰাৰ লগে লগে অনলাইনত অনেক মানুহে বিস্ময় প্রকাশ কৰিছে। এজন লোকে মন্তব্য কৰিছে, ‘যদি কোনেও এই প্রস্তাৱ গ্ৰহণ কৰিবলৈ সন্মত নহয়, তাৰ কাৰণ তেওঁলোক সঁচাকৈয়ে মেকুৰীপ্রেমী নহয়; নতুবা বৃদ্ধৰ প্ৰস্তাৱিত চৰ্তসমূহ অত্যন্ত কঠোৰ।’
অৱশ্যে চৰ্তর্তসমূহ এতিয়াও ৰাজহুৱা কৰা হোৱা নাই। তথাপি বিষয়টোৰ আইনী জটিলতাক লৈও বহুতে সতর্ক কৰিছে। সামাজিক মাধ্যমত এজন লোকে কয়, ‘বৃদ্ধই হয়তো তেওঁৰ সম্পত্তি দি দিব বিচাৰিছে; কিন্তু যি এই প্ৰস্তাৱ গ্ৰহণ কৰিব, তেওঁ বৃদ্ধৰ আত্মীয়সকলৰ মামলাৰ সন্মুখীন হ’ব পাৰে। কাৰণ তেওঁলোকে এই সম্পত্তিৰ ওপৰত নিজৰ অধিকাৰ দাবী কৰিব পাৰে।’
উল্লেখ্য যে চীনত ২০২১ৰ পৰা প্ৰৱৰ্তিত নতুন নাগৰিক আইন অনুসৰি, কোনো ব্যক্তিয়ে দেশৰ চৰকাৰ, কোনো প্রতিষ্ঠান বা নির্দিষ্ট কোনো ব্যক্তিক নিজৰ সম্পত্তি উইল কৰি দি যাব পাৰে।
অৱশ্যে বহু লোকে লঙৰ ধন নোলোৱাকৈয়ে মেকুৰীজনীক দত্তক লোৱাৰ আগ্রহো প্রকাশ কৰিছে। এজন লোকে লিখিছে, ‘মই মেকুৰীজনীক দত্তক ল’ব বিচাৰো, তেওঁৰ টকাৰ মোক প্ৰয়োজন নাই।’
ইপিনে, বহুতে আকৌ বিপদৰ আশংকাও কৰিছে। তেওঁলোকৰ মতে, টকাৰ লোভত দুষ্ট প্ৰকৃতিৰ মানুহেও মেকুৰীজনীক দত্তক ল’ব পাৰে আৰু পাছত প্রাণীটিক অত্যাচাৰ কৰিব পাৰে। চীনত সম্প্ৰতি এই ধৰণৰ ঘটনা অনেক বৃদ্ধি পাইছে। সম্প্রতি দেশখনত পোহনীয়া প্ৰাণীৰ ওপৰত হোৱা নির্যাতন ৰোধত নির্দিষ্ট কোনো আইন নাই।