Eviction:✒️এইবাৰ নামবৰ দক্ষিণ সংৰক্ষিত অভয়াৰণ্যৰ পৰা ৩৫০তকৈ অধিক বেদখল পৰিয়ালক উচ্ছেদ কৰা হ’ল। দেওবাৰে বন বিভাগে প্রশাসন আৰু আৰক্ষীৰ সহযোগত বনাঞ্চলখনৰ গেলাজান আৰু তিনি নম্বৰ ৰজাপুখুৰী অঞ্চলত উচ্ছেদ অভিযান চলায়।
এই উচ্ছেদ অভিযানৰ সময়ত ৩৫০তকৈ অধিক বেদখলকাৰী পৰিয়াল উচ্ছেদ কৰি প্ৰায় এহেজাৰ বিঘা সংৰক্ষিত বনভূমি পুনৰুদ্ধাৰ কৰে বন বিভাগে। ৰেংমা বনাঞ্চলত চলা বেদখল উচ্ছেদ অভিযানৰ দৰে আজিৰ গেলাজান আৰু ৰজাপুখুৰীৰ উচ্ছেদ অভিযানো তদাৰক কৰে বন বিভাগৰ বিশেষ মুখ্য সচিব এম কে যাদবে।
দুয়োটা অঞ্চলত এই উচ্ছেদ অভিযান শান্তিপূর্ণভাৱে চলে। উল্লেখ্য যে যোৱা ২৯ জুলাইৰ পৰা ৰেংমা সংৰক্ষিত বনাঞ্চলৰ বেদখলীকৃত ভূমিত আৰম্ভ হোৱা উচ্ছেদ অভিযানৰ সময়ত কালিলৈকে পাঁচ দিনত চাৰি সহস্রাধিক অবৈধ গৃহ ভাঙি ৮,৯০০ বিঘা বনভূমি পুনৰ উদ্ধাৰ কৰা হয়।
শনিবাৰে বন বিভাগে ঘোষণা কৰা অনুসৰি দেওবাৰে নামবৰ দক্ষিণ সংৰক্ষিত বনাঞ্চলত এই উচ্ছেদ অভিযান চলে। এই অভিযানৰ জৰিয়তে কেৱল বেদখল শেষ কৰাই নহয়, ইয়াৰ জৰিয়তে বনাঞ্চলৰ পৰিৱেশ পুনৰুদ্ধাৰ, জৈৱ-বৈচিত্র্য সংৰক্ষণ আৰু দীর্ঘকালীন সেউজ ব্যৱস্থাপনাৰ লক্ষ্যও চৰকাৰে লোৱা বুলি প্রকাশ কৰিছে।
ৰজাপুখুৰী-মাজগাঁও অঞ্চল আমাৰ : নগাৰ দাবী গোলাঘাট জিলাৰ অসম-নগালেণ্ড সীমান্তত চলা এই উচ্ছেদ অভিযানলৈ চুবুৰীয়া ৰাজ্য নগালেণ্ডেও সমর্থন ঘোষণা কৰিছে। অৱশ্যে অঞ্চলটোৰ অসম সীমান্তত বাস কৰা একাংশ নগা লোকে দাবী কৰিছে যে উচ্ছেদ অভিযান চলা ৰজাপুখুৰী আৰু মাজগাঁও অঞ্চল তেওঁলোকৰ।
পূববংগীয় মুছলমান (মিঞা)-এ তেওঁলোকৰ মাটি বেদখল কৰিহে আছিল বুলি দাবী কৰি এই নগা লোকসকলে কয়, ‘ৰজাপুখুৰী আৰু মাজগাঁও অঞ্চল নগাৰ। এই অঞ্চল দুটা আমাৰ।’ ইপিনে, উচ্ছেদস্থলীত একাংশ নগা লোকে টিঘিলঘিলাই থকাত অসমৰ স্থানীয় বাসিন্দাসকল শংকিত হৈছে। একাংশই আশংকা কৰিছে যে উচ্ছেদ অভিযানৰ পাছত সেই ভূমিলৈ নগাৰ আগ্রাসন ঘটিব পাৰে। সেয়েহে অঞ্চলটোত অসম আৰক্ষীৰ বেটেলিয়নৰ শিবিৰ স্থাপন কৰিবলৈ চৰকাৰৰ প্ৰতি দাবী উত্থাপন কৰিছে স্থানীয় বাসিন্দাসকলে।
উচ্ছেদিতসকলে সীমান্তত সুৰক্ষা প্ৰদানৰ কাম কৰিছিল: স্থানীয় বাসিন্দা উচ্ছেদ অভিযানৰ পাছত নগাৰ আতংকত ভোগা স্থানীয় ৰাইজে কয়, ‘স্থানীয় মানুহ হিচাপে আমি ভালেই পাইছো আৰু উচ্ছেদ অভিযানত সহযোগ কৰিছো। কিন্তু আমাৰ এতিয়া এটা মনত সন্দেহ হৈছে যে সেইসকলে (উচ্ছেদিত) অসম সীমান্তৱৰ্তী অঞ্চলত নগালেণ্ডৰ দাবীৰ ক্ষেত্ৰত সুৰক্ষা প্ৰদানৰ কাম কৰিছিল। এতিয়া অঞ্চলৰ মানুহ আতংকিত হৈ আছে। কাইলৈ যদি আমাৰ থলুৱা অসমীয়াক নগাই আক্রমণ কৰে তাৰ আতংকত ভুগিছে। নগাই উপদ্ৰৱ চলাব বুলি ভীতিগ্রস্ত হৈছে। অসম চৰকাৰে অতি সোনকালে অসম ৰাইফলছ বা অসম আৰক্ষী বেটেলিয়নৰ শিবিৰ স্থাপন কৰি সুৰক্ষা দিব লাগে।’
স্থানীয় লোকে পুনৰ কয়, ‘আমি আগতে যিদৰে আছিলো, এতিয়া উচ্ছেদৰ পাছতো যাতে সুৰক্ষিত হৈ থাকিব পাৰো তাৰ ব্যৱস্থা কৰিবলৈ মুখ্যমন্ত্রী ড° হিমন্ত বিশ্ব শর্মাক অনুৰোধ জনাইছো।’ তদুপৰি কয়, ‘উচ্ছেদৰ জাননী লাভৰ পাছত মুছলমান লোকসকল বাস কৰা গাঁৱত নগা সোমাই টিঘিলঘিলাই আছে। এই পর্যন্ত আমাক দাবী-ধমকি দিয়া নাই যদিও ভৱিষ্যতে আমালৈ ভাবুকি অহাৰ আশংকা আছে।’