Red Fort:✒️স্বাধীনতা দিৱসৰ পূৰ্বে লালকিল্লাত হুলস্থুলীয়া পৰিৱেশ !খোদ প্ৰধানমন্ত্ৰীয়ে যি ঠাইৰ পৰা ভাষণ দিব সেই চৌহদত উদ্ধাৰ বোমা! তাতোকৈ আশ্চৰ্যজনক বিষয়টো হ’ল যে কটকটীয়া নিৰাপত্তাৰক্ষীৰে আগুৰি থকা এই ঐতিহাসিক স্থানত সন্দেহযুক্ত বোমা স্থাপন কৰাটো কোনো প্ৰতিক্ৰিয়া প্ৰকাশ নকৰিলে দিল্লী আৰক্ষীয়ে।
এই চাঞ্চল্যকৰ ঘটনাৰ তথ্য পোহৰলৈ অহাৰ লগে লগে কঠোৰ ব্যৱস্থা গ্ৰহণ কৰা হৈছে। নিৰাপত্তাৰ ক্ষেত্ৰত গাফিলতিৰ বাবে নিলম্বন কৰা হৈছে সাতজন আৰক্ষীক।
দৰাচলতে স্বাধীনতা দিৱস উপলক্ষে লালকিল্লাৰ ভিভিআইপি এলেকাৰ নিৰাপত্তা পৰীক্ষাৰ বাবে নিৰাপত্তা বিভাগে মক ড্ৰিলৰ আয়োজন কৰিছিল। তাৰ অংশ হিচাপে সাধাৰণ পোছাক পৰিধান কৰা উগ্ৰপন্থীয়ে লালকিল্লাত প্ৰৱেশ কৰাৰ কথা আছিল।আছিল ভুৱা বোমাৰ ব্যৱস্থাও ।
লালকিল্লাৰ নিৰাপত্তাৰ দায়িত্বত থকা নিৰাপত্তাৰক্ষী বিষয়াৰ চকুত ধূলি দি ভুৱা ‘সন্ত্রাসবাদী’ৰ দলটোৱে লালকিল্লাত প্রৱেশ কৰিবলৈ সক্ষম হয়৷ কেৱল সেয়াই নহয়, সাধাৰণ পোছাক পৰিধান কৰা নিৰাপত্তাৰক্ষী বিষয়াসকলে সন্ত্ৰাসবাদীৰ বেশত দুটা স্তৰৰ মেটেল ডিটেক্টৰ বাইপাছ কৰি বোমা লৈ লালকিল্লাত প্ৰৱেশ কৰে।
যদিও লালকিল্লাৰ ভিতৰত ভুৱা বোমা ৰখা হৈছিল, তথাপিও তাত থকা নিৰাপত্তা বাহিনীয়ে তাৰ কোনো উমানেই পোৱা নাছিল।ম’ক ড্ৰিলৰ সময়ত লালকিল্লাত এনে চৰম নিৰাপত্তাৰ অভাৱ লক্ষ্য কৰাৰ পাছত নিৰাপত্তা বিভাগে এই বিষয়ত বিস্তাৰিত প্ৰতিবেদন দিল্লীৰ উত্তৰ জিলাৰ ডিচিপি ৰাজা ভাটিয়ালৈ প্ৰেৰণ কৰে।
স্বাধীনতা দিৱসৰ পূৰ্বে লালকিল্লাত এনে নিৰাপত্তাজনিত গাফিলতিৰ বিষয়টো পোহৰলৈ অহাৰ পাছতে ভাটিয়াই তাৎক্ষণিক ব্যৱস্থা গ্ৰহণ কৰে। নিৰাপত্তাৰ দায়িত্বত থকা সাতজন আৰক্ষী জোৱানক ততাতৈয়াকৈ নিলম্বন কৰা হয়।
উল্লেখযোগ্য যে অহা ১৫ আগষ্টত প্ৰধানমন্ত্ৰী নৰেন্দ্ৰ মোদীয়ে লালকিল্লাৰ মঞ্চৰ পৰা দেশবাসীক সম্বোধন কৰিব। দেশৰ বিভিন্ন প্ৰান্তৰ ভিভিআইপি ইয়াত সমবেত হ’ব। ফলত এই ঠাইখনৰ নিৰাপত্তা কটকটীয়াৰ কথা আৰু পৃথকে বৰ্ণনা কৰাৰ প্ৰয়োজন নাই।
লালকিল্লাৰ চৌহদত একাধিক স্তৰৰ নিৰাপত্তা নিয়োগ কৰা হৈছে। নিৰাপত্তাৰক্ষীৰ কৰ্ডন ইমানেই কটকটীয়া যে কোনো সন্দেহযুক্ত লোকে অস্ত্ৰৰ কথা বাদেই, সৰু যন্ত্ৰ এটা লৈ প্ৰৱেশ কৰিব নোৱাৰে।তাতে বোমা আৰু ভুৱা সন্ত্ৰাসবাদীৰ প্ৰৱেশৰ ঘটনাৰ স্তম্ভিত হৈ পৰিছে দেশ।