Donald Trump:✒️উচ্চ হাৰৰ শুল্ক আৰোপৰ ভাবুকিলৈ মুঠেই কর্ণপাত নকৰি ভাৰতে পুৰণি মিত্ৰ ৰাছিয়াৰ স’তে বাণিজ্যিক সম্পৰ্ক ধৰি ৰখাক লৈ মার্কিন ৰাষ্ট্ৰপতি ড’নাল্ড ট্রাম্পৰ ভাবুকি-আস্ফালন অব্যাহত আছে। আনকি তেওঁৰ এই আস্ফালনে সম্প্রতি ‘ব্লেকমেইলিং’ৰ ৰূপ পৰিগ্ৰহ কৰিছে। আগন্তুক ২৪ ঘণ্টাৰ ভিতৰতে ভাৰতৰ ওপৰত অতি উচ্চ শুল্ক জাঁপি দিয়াৰ ভাবুকি দিছে বহুবন্ধী ৰাষ্ট্ৰপতিজনে।
উল্লেখ্য যে যোৱা ৩১ জুলাইত ট্রাম্পে আমেৰিকা যুক্তৰাষ্ট্ৰলৈ ৰপ্তানিকৃত ভাৰতীয় সামগ্রীত শুল্ক ২৫ শতাংশলৈ বৃদ্ধি কৰে। কেৱল সেয়াই নহয়, ৰাছিয়াৰ পৰা তেল ক্রয় বন্ধ নকৰিলে ভাৰতৰ ওপৰত অনির্দিষ্ট পৰিমাণৰ শুল্ক আৰোপৰো তেওঁ ভাবুকি দিয়ে।
অৱশ্যে মার্কিন ৰাষ্ট্ৰপতিজনৰ এনে ভাবুকিক মুঠেই গুৰুত্ব নিদি নতুন দিল্লীয়ে ৰাছিয়াৰ পৰা তেল ক্রয় অব্যাহত ৰাখিছে। ইয়াক লৈ ট্রাম্প ক্ষোভত উতলা হৈছে। কালি পুনৰ তেওঁ ভাৰতক ৰাছিয়াৰ পৰা তেল ক্ৰয় বন্ধ কৰিবলৈ সকীয়াই দিয়ে।
অন্যথা আগন্তুক ২৪ ঘণ্টাৰ ভিতৰতে ভাৰতীয় সামগ্ৰীৰ ওপৰত অতি ‘যথেষ্ট পৰিমাণ’ৰ শুল্ক আৰোপৰ হুংকাৰ দিয়ে। এটা সংবাদ সংস্থাৰে সাক্ষাৎকাৰত ট্রাম্পে কয়, ‘তেওঁলোকে যুদ্ধৰ যন্ত্ৰলৈ ইন্ধন যোগাই আছে। যদি তেওঁলোকে এই কাৰ্য অব্যাহত ৰাখে তেন্তে মই সুখী নহ’ম।’
লক্ষ্যণীয় যে ৰাছিয়াৰ পৰা তেল ক্ৰয় কৰি ভাৰতে ইউক্রেইন যুদ্ধ অব্যাহত থকাত অৰিহণা যোগোৱা বুলি ট্রাম্পে শেহতীয়াভাৱে অভিযোগ উত্থাপন কৰিবলৈ লৈছে। ৰাছিয়া-ইউক্রেইন যুদ্ধ অব্যাহত থকাৰ বাবে তেওঁ চীনকো দোষাৰোপ কৰিছে। কাৰণ চীনেও ৰাছিয়াৰ পৰা তেল ক্ৰয় কৰি আহিছে।
উল্লেখ্য যে আমদানিকৃত মার্কিন সামগ্রীত অত্যধিক শুল্ক আৰোপ কৰা বুলি ভাৰতৰ বিৰুদ্ধে অভিযোগ উত্থাপন কৰি ট্রাম্পে ভাৰতীয় সামগ্ৰীৰ ওপৰত ২৫ শতাংশ শুল্ক আৰোপ কৰিছে। ইতিমধ্যে নতুন দিল্লীয়ে এনে আচৰণক ভাবুকি বুলি অভিহিত কৰিছে। তেওঁৰ এনে ভাবুকি অযুক্তিকৰ বুলিও ভাৰত চৰকাৰে প্ৰতিক্ৰিয়া প্ৰকাশ কৰিছে।
ইয়াৰ লগে লগে দুয়োখন দেশৰ মাজত বাণিজ্যিক সম্পৰ্কত ভাঙোন সৃষ্টিৰ আভাস স্পষ্ট হৈছে। ৰাছিয়াৰ স’তে বাণিজ্যিক সম্পৰ্ক সন্দৰ্ভত ভাৰতৰ বৈদেশিক মন্ত্রণালয়ে স্পষ্ট কৰি দিছে যে দেশখনৰ পৰা প্ৰয়োজন অনুসৰিহে সামগ্রী আমদানি কৰা হয়। ভাৰতীয় উপভোক্তাসকলক বহনক্ষম মূল্যত যোগানৰ বাবে ৰাছিয়াৰ পৰা তেল আমদানি কৰি থকা হৈছে বুলিও বৈদেশিক মন্ত্রণালয়ে প্রকাশ কৰিছে।
উল্লেখ্য যে ইউক্রেইন যুদ্ধৰ সূচনা হোৱাৰ পাছৰ পৰা তুলনামূলকভাৱে কম মূল্যত ভাৰতে ৰাছিয়াৰ পৰা তেল ক্ৰয় কৰি আহিছে। ৰাছিয়া-ইউক্রেইন যুদ্ধৰ সূত্রপাত হোৱাৰ পাছত মার্কিন প্রশাসনৰ লগতে ইউৰোপীয় সংঘয়ো ভাবুকি দি আহিছে বুলি প্ৰকাশ কৰিছে বৈদেশিক মন্ত্রণালয়ে।
এই সম্পর্কত বৈদেশিক মন্ত্রণালয়ে লগতে কয়, ‘ইউক্রেইন সংঘাতৰ সূত্রপাত হোৱাৰ পাছৰ পৰা আমেৰিকা যুক্তৰাষ্ট্ৰ আৰু ইউৰোপীয় সংঘই ভাৰতক লক্ষ্য কৰি আহিছে। ইয়াৰ কাৰণ হৈছে ৰাছিয়াৰ পৰা তেল আমদানি কৰাটো। দৰাচলতে পৰম্পৰাগত তেল যোগানৰ পথ ইউৰোপলৈ সলনি হোৱাত ভাৰতে ৰাছিয়াৰ পৰা তেল ক্রয় কৰিবলৈ আৰম্ভ কৰে। অৱশ্যে সেই সময়ত বিশ্বৰ শক্তি বজাৰৰ সুস্থিৰতা বৰ্তা ৰখাৰ খাতিৰত মার্কিন যুক্তৰাষ্ট্ৰই ৰাছিয়াৰ পৰা তেল আমদানিত ভাৰতক উৎসাহিত কৰিছিল।’
নিজৰ বাণিজ্যিক সহযোগী বাছনিৰ অধিকাৰ সকলো দেশৰে আছেঃ ৰুছ ৰাষ্ট্ৰপতি ভৱন ভাৰতক ৰাছিয়াৰ পৰা তেল ক্ৰয় বন্ধ কৰিবলৈ ভাবুকি দিয়া মার্কিন ৰাষ্ট্ৰপতি ট্রাম্পক উভতি ধৰিলে ৰুছ ৰাষ্ট্ৰপতি ভৱন ক্রেমলিনে। মার্কিন ৰাষ্ট্ৰপতিজনৰ বেপৰোৱা আচৰণক লৈ তীব্র প্রতিক্রিয়া প্রকাশ কৰি ক্রেমলিনে কয়, ‘আমি বিশ্বাস কৰো যে সার্বভৌম দেশসমূহৰ নিজৰ বাণিজ্যিক অংশীদাৰ বাছনিৰ অধিকাৰ আছে আৰু থকা উচিত। বাণিজ্যিক আৰু আর্থিক সহযোগিতাৰ ক্ষেত্ৰতো একে কথাই খাটে।’ এই সম্পর্কত ক্রেমলিনৰ মুখপাত্র ডিমিট্রি পেস্ক’ভে কয়, ‘ৰাছিয়াৰে বাণিজ্যিক সম্পর্ক কর্তন কৰিবলৈ বিভিন্ন দেশৰ প্ৰতি দিয়া বহুসংখ্যক বিবৃতি (যিবোৰ দৰাচলতে ভাবুকিহে) শুনিবলৈ পাইছো। আমি এনে বিবৃতিসমূহক বৈধ বুলি গণ্য কৰা নাই।’
বাণিজ্য চুক্তিক লৈ দৰদাম অব্যাহত: ভাৰতক ভাল ব্যৱসায়ী বন্ধু নহয় বুলি আখ্যা ভাৰতীয় আমদানিকৃত সামগ্ৰীৰ ওপৰত ২৫ শতাংশ শুল্ক আৰোপৰ ভাবুকি দিয়া ট্রাম্পে ভাৰতক ভাল ব্যৱসায়ী বন্ধু নহয় বুলিও আখ্যা দিছে। উল্লেখ্য যে ট্রাম্প আৰু প্ৰধানমন্ত্ৰী নৰেন্দ্ৰ মোদীয়ে পৰস্পৰে পৰস্পৰক বন্ধু বুলি সম্মান জনায়।
সম্প্রতি ট্রাম্পে এই স্থিতি একপ্ৰকাৰ পৰিৱৰ্তন আনিছে। মঙলবাৰে তেওঁ কয়, ‘ৰাছিয়াৰ পৰা ভাৰতে তেল ক্ৰয় বন্ধ কৰা নাই। নতুন দিল্লীৰ এই সিদ্ধান্তত মই সুখী নহয়। বাৰে বাৰে কোৱাৰ পাছতো ছবি সলনি হোৱা নাই। ২৪ ঘণ্টাৰ ভিতৰত অত্যধিক শুল্ক আৰোপৰ সিদ্ধান্ত ল’ম।’ আনহাতে, ভাৰত আৰু আমেৰিকা যুক্তৰাষ্ট্ৰৰ মাজত বাণিজ্য চুক্তি স্বাক্ষৰৰ দৰদামো অব্যাহত আছে। অৱশ্যে বাতৰি লিখা পৰলৈ দুয়োখন দেশৰ মাজৰ বাণিজ্য চুক্তিক লৈ কোনো সিদ্ধান্ত চূড়ান্ত হোৱা নাই। এনে এক চুক্তিক লৈ ট্রাম্পেও ইচ্ছা প্রকাশ কৰি আহিছে যদিও আজি তেওঁ কৰা মন্তব্যই পৰিস্থিতি সলনি হোৱাৰ ইংগিত বহন কৰিছে।
মঙলবাৰে তেওঁ কয়, ‘ভাৰত ভাল ব্যৱসায়ী বন্ধু নহয়, কাৰণ তেওঁলোকে আমাৰ স’তে ব্যৱসায় কৰিলেও আমি তেওঁলোকৰ স’তে ব্যৱসায় কৰিব নোৱাৰো। ভাৰতে ৰাছিয়াৰ পৰা বিপুল পৰিমাণৰ তেল ক্ৰয় কৰি আহিছে। তেল ক্রয়তে ক্ষান্ত নাথাকি ভাৰতে মুনাফা অৰ্জনৰ উদ্দেশ্যে ক্ৰয় কৰা তেলৰ সিংহভাগ মুকলি বজাৰত বিক্রীও কৰে। ৰাছিয়াই কৰা যুদ্ধৰ ফলত ইউক্রেইনত কিমান মানুহৰ প্ৰাণহানি হৈ আছে, তাক লৈ ভাৰতে পৰোৱা কৰা নাই। এই কাৰণতে আমি ভাৰতীয় পণ্যৰ ওপৰত শুল্ক আৰু বৃদ্ধি কৰিম।’