Russia Ukraine Conflict:✒️অহা শুকুৰবাৰে আলাস্কাত ৰাছিয়াৰ ৰাষ্ট্ৰপতি ভ্লাদিমিৰ পুটিনক সাক্ষাৎ কৰাৰ সম্ভাৱনা আছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ট্ৰাম্পে নিজেই এই ইচ্ছা কথা প্ৰকাশ কৰিছে।
তেওঁ দাবী কৰিছে যে তেওঁৰ এই পদক্ষেপ ৰাছিয়া-ইউক্ৰেইন যুদ্ধৰ অন্ত পেলাবলৈ ‘শান্তি চুক্তি’ৰ বাবে। অৱশ্যে এই যুদ্ধবিৰতি চুক্তিত দুয়োপক্ষৰ মাজত ‘ভূখণ্ডীয় বিনিময়’ সম্পৰ্কীয় কিছুমান চৰ্তও থাকিব পাৰে।
চৰ্ত থাকিলে আলোচনা কিমান সফল হ’ব তাক লৈ কিছু সন্দেহৰ সৃষ্টি হৈছে।
শনিবাৰে ট্ৰাম্পে নিজৰ ছ’চিয়েল মিডিয়াত লিখিছে, “আমেৰিকাৰ ৰাষ্ট্ৰপতি হিচাপে মোৰ আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ মাজত বহু প্ৰত্যাশিত বৈঠক অহা ১৫ আগষ্ট শুকুৰবাৰে গ্ৰেট ইষ্ট আলাস্কাত অনুষ্ঠিত হ’ব।”
পৰৱৰ্তী সময়ত এই বিষয়ে অধিক তথ্য প্ৰদান কৰা হ’ব বুলি ট্ৰাম্পে জানিবলৈ দিয়ে । ৰাছিয়া-ইউক্ৰেইন যুদ্ধ আৰু বিশ্বব্যাপী শুল্ক যুদ্ধৰ প্ৰেক্ষাপটত এই “সাক্ষাৎ” নিঃসন্দেহে তাৎপৰ্যপূৰ্ণ।
আমেৰিকাৰ বিষয়াসকলে ইউৰোপীয় বিষয়াসকলক জনাইছে যে পুটিনে যুদ্ধৰ অন্ত পেলোৱাৰ বাবে কেইবাটাও চৰ্ত নিৰ্ধাৰণ কৰিছে, য’ত ইউক্ৰেইনে যথেষ্ট পৰিমাণৰ মাটি ৰাছিয়াক অৰ্পণ কৰিব লাগিব।
ট্ৰাম্পৰ বৈদেশিক মন্ত্ৰীৰ সন্মুখত পুটিনে এনে প্ৰস্তাৱ দাখিল কৰিছিল, য’ত ইউক্ৰেইনৰ পূব ডনবাছ আৰু ক্ৰিমিয়াৰ কেবাটাও অঞ্চল এৰি যাব লাগিব বুলি নিৰ্ধাৰণ কৰা হৈছিল।
ট্ৰাম্পৰ প্ৰস্তাৱিত ভ্ৰমণ আৰু অধিক তাৎপৰ্যপূৰ্ণ কাৰণ প্ৰায় এটা দশকত পুটিনে আমেৰিকাৰ মাটিত ভৰি দিয়া নাই, যাৰ ফলত ইমান দিনৰ পাছত এই বৈঠক আৰু অধিক তাৎপৰ্যপূৰ্ণ হৈ পৰিছে।
উল্লেখ্য যে, যদিও দুয়োখন দেশৰ যুদ্ধ বন্ধ কৰাৰ প্ৰয়াসত ট্ৰাম্পে পুটিনক সাক্ষাৎ কৰিব বিচাৰিছে, তথাপিও ইউক্ৰেইনৰ ৰাষ্ট্ৰপতি ভ্লাদিমিৰ জেলেনস্কিৰ স’তে কোনো ধৰণৰ ‘আনুষ্ঠানিক বৈঠক’ কৰিবলৈ পুটিনে অনিচ্ছুক।
অৱশ্যে ট্ৰাম্পে দাবী কৰিছে যে যুদ্ধ বন্ধ কৰিবলৈ তেওঁ দুয়োখন দেশৰ মুৰব্বীৰ স’তে সাক্ষাৎ কৰিবলৈ প্ৰস্তুত।