Army Jawan Arrested:
বাংলাদেশৰ পতাকা ৰখাৰ অভিযোগত ধুবুৰী জিলাৰ গোলকগঞ্জ আৰক্ষী থানাৰ অন্তৰ্গত লক্ষীমাৰী তৃতীয় খণ্ড গাঁৱৰ পৰা এজন সেনা জোৱানক আৰক্ষীয়ে আটক কৰিছে। এই ঘটনাক কেন্দ্ৰ কৰি গোলকগঞ্জত তীব্র প্রতিক্ৰিয়াৰ সৃষ্টি হৈছে। ঘটনা সন্দৰ্ভত আৰক্ষীয়ে অভিযুক্ত সেনা জোৱানসহ চাৰিজন লোকক আটক কৰিছে।
আৰক্ষী সূত্ৰই জনো মতে, আটকাধীন সেনা জোৱানজন হৈছে লক্ষীমাৰী তৃতীয় খণ্ড গাঁৱৰ মহৰ আলীৰ পুত্ৰ আলী হুছেইন। তেওঁ ২০২০ত ভাৰতীয় সেনাত ভর্তি হৈছিল আৰু সম্প্ৰতি গাৰৱাল ৰেজিমেন্টৰ আলী শ্রীনগৰত কৰ্মৰত হৈ আছিল। যোৱা ১৬ জুলাইত তেওঁ ছুটি লৈ ঘৰলৈ আহে। যোৱা নিশা গোপন খবৰৰ ভিত্তিত গোলকগঞ্জ আৰক্ষী থানাৰ ভাৰপ্ৰাপ্ত বিষয়া দেৱজিত কলিতাৰ নেতৃত্বত আৰক্ষীৰ এটা বিশাল বাহিনীয়ে সমগ্র অঞ্চল ঘেৰি ধৰি ঘৰখনত অভিযান চলায়।
এই অভিযানতে আৰক্ষীয়ে সেনা জোৱানজনৰ বাসগৃহৰ পৰা বাংলাদেশৰ পতাকা, বাংলাদেশৰ ম’বাইলৰ ছিমকাৰ্ডৰ লগতে বাংলাদেশৰ লগত যোগাযোগ থকা বহু আপত্তিজনক নথি-পত্র জব্দ কৰে। আৰক্ষীয়ে সকলো আপত্তিজনক নথি-পত্ৰৰ লগতে সেনা জোৱান আলী হুছেইন, তেওঁৰ ভ্ৰাতৃ ইমান হুছেইন আৰু তেওঁৰ লগত সুসম্পর্ক থকা শিক্ষক জহেৰ আলীক আটক কৰি থানালৈ আনে। ঘটনাটোক লৈ ভাৰত-বাংলাদেশ সীমান্ত অঞ্চলত তীব্র চাঞ্চল্যৰ সৃষ্টি হৈছে। সম্প্রতি আৰক্ষীয়ে তেওঁলোকক জেৰা অব্যাহত ৰাখিছে।
লগতে বিএছএফ আৰু সেনাৰ চোৰাংচোৱা বিষয়া উপস্থিত হৈ ঘটনাৰ তদন্ত চলাই আছে। ইপিনে, এই সন্দর্ভত আজি দুপৰীয়া আগমনী আৰক্ষী থানাৰ অন্তৰ্গত ৰামৰাইকুঠী মজলীয়া ইংৰাজী বিদ্যালয়ৰ শিক্ষক মহব্বত আলীকো আৰক্ষীয়ে আটক কৰি লৈ আহে। বিয়লি ধুবুৰী জিলাৰ জ্যেষ্ঠ আৰক্ষী অধীক্ষক লীনা দলে থানাখনত উপস্থিত হয়। সমগ্র ঘটনাৰ তদন্ত আৰক্ষীয়ে অতি সতর্কতাৰে চলাই আছে আৰু তদন্তৰ স্বাৰ্থতে অধিক তথ্য সদৰী কৰাৰ পৰা বিৰত আছে।
আনহাতে, জোৱানজনৰ পিতৃৰ লগতে পৰিয়ালৰ লোকৰ অভিযোগ কৰিছে যে একাংশ স্থানীয় লোকে ষড়যন্ত্রমূলকভাৱে এই ঘটনা সংঘটিত কৰিছে। পিতৃয়ে লগতে দাবী কৰে যে তেওঁৰ পুত্র নির্দোষী আৰু ইয়াৰ উপযুক্ত তদন্ত হ’ব লাগে। তদন্তত দোষী সাব্যস্ত হ’লে যি শাস্তি হয় দিয়ক, পৰিয়ালৰ লোকৰ কোনো আপত্তি নাথাকিব বুলি স্পষ্ট কৰি দিয়ে।
আনহাতে তেজপুৰৰ পৰা উপস্থিত হয় সেনা উচ্চ স্থৰীয় দল। পুৱতি নিশা তিনি বজাত মুকলি কৰি দিয়া হয় সেনা জোৱান আলী হুছেইন আৰু শিক্ষক দুজনক। গ্ৰেপ্তাৰ কৰা হয় সেনা জোৱানৰ ভাতৃ ইমান হুছেইনক। সেনা জোৱানৰ ঘৰত বাংলাদেশৰ উদ্ধাৰ কৰাৰ পিছত সেনা জোৱানক এৰি দি ভাতৃক গ্ৰেপ্তাৰ কৰা ঘটনাই বহন কৰিছে বিশেষ তাৎপৰ্য্য। আনহাতে আৰক্ষীৰ এই স্থিতিক তীব্ৰ সমালোচনা কৰে ৰাষ্ট্ৰীয় বজৰংগ দলৰ ধুবুৰী জিলা সমিতিয়ে ।