Fields flooded by rain:
দীর্ঘদিনীয়া খৰাং পৰিস্থিতিৰ পাছত নিশা আঠ ঘন্টাজোৰা মুষলধাৰে হোৱা বৰষুণৰ ফলত দেহাৰকুছি আৰু লৰমাবটাকুছি অঞ্চলৰ কে’বাখনো খেতিপথাৰৰ শালি খেতি পানীত ডুব যায়। মন কৰিবলগীয়া যে এটা জল নিষ্কাসনৰ নলা বন্ধ কৰি পুখুৰী খন্দাৰ ফলত বৃহত্তৰ অঞ্চল এটাৰ ৰাইজৰ বাৰীবস্তিৰ লগতে খেতিপথাৰ পানীত ডুব গৈ থাকিব লগা অৱস্থা হৈছে।
উল্লেখ্য যে বৰ্তমানৰ বৰক্ষেত্ৰী সমষ্টিৰ বিশেষকৈ চমাৰকুছি,দেহাৰকুছি, লৰমাবটাকুছিৰ একাংশ ৰাইজ জল নিষ্কাসনৰ নলাৰ অভাৱত যন্ত্রণা ভোগ কৰিব লগা হৈছে। মন কৰিবলগীয়া যে উক্ত গাঁওসমূহৰ খেতিপথাৰ বা বাৰীবস্তিৰ পানীসমূহ নির্বিঘ্নে ওলাই যাব পৰা নলাৰ ব্যৱস্থা আছিল।
ৰাইজে মনৰ হেঁপাহত খেতি-বাতি কৰিছিল আনন্দৰে। বিশেষকৈ বানপানী অধ্যুষিত অঞ্চল হিচাপে এইকেইখন গাওঁৰ ৰাইজে খেতি পথাৰ সমূহত শালি খেতি কৰি নিজৰ বছৰেকৰ ধানমুঠি সংগ্ৰহ কৰিব পাৰিছিল। কেতিয়াবা বানপানীৰ প্রকোপ বেছি হ’লে শালি খেতিৰ পৰিৱৰ্তে বৰো বা অন্য যিকোনো খেতি কৰিছিল।
আনহাতে, প্ৰচুৰ পৰিমাণে ৰবিশস্যৰ খেতি কৰিও লাভান্বিত হৈছিল ৰাইজ। তদুপৰি এই গাঁওকেইখনৰ প্ৰতিঘৰ লোকৰে বাৰীবস্তিত বিভিন্ন ফলমূল আৰু মূল্যবান গছ-গছনিও প্ৰচুৰ পৰিমাণে আছে; কিন্তু দুর্ভাগ্যজনক কথা যে উক্ত গাঁওকেইখনৰ অতিৰিক্ত জলসমূহ নিষ্কাসন হোৱা প্ৰধান সোঁত চমাৰকুছি দলঙৰ সন্মুখতে এটি প্রকাণ্ড পুখুৰী খান্দি জল নিষ্কাসনৰ পথ ৰুদ্ধ কৰিছে।
তদুপৰি দেহাৰকুছি কলবাৰী পথাৰটো তদ্রূপ ধৰণে আন এটা প্রকাণ্ড পুখুৰী খান্দি পানী সৰবৰাহ হোৱা পথটো ৰুদ্ধ কৰি দিছে। ফলত উক্ত গাঁওকেইখনৰ খেতিপথাৰকে ধৰি বাৰীবস্তি পানীত ডুব গৈ থাকে। মন কৰিবলগীয়া যে চমাৰকুছিৰ পুখুৰীৰ গৰাকীয়ে পুখুৰীটোৰ কাষৰে এটা সামন্য জল নিষ্কাসনৰ নলা ৰখাৰ দৰে কলবাৰীটো একে ধৰণে এটা নলাৰ ব্যৱস্থা ৰাখিছে; কিন্তু সেয়াই যথেষ্ট নহয়। বৃহৎ অঞ্চল এটাৰ জল নিষ্কাসন সম্ভৱ নহয় সেই নলাটোৰে।
সেয়েহে উপায়ান্তৰ ৰাইজে বিগত বৰ্ষতে নলবাৰী জিলা আয়ুক্তক ইয়াৰ সমাধান বিচাৰি আবেদন কৰিছিল। শতাধিক ভুক্তভোগী ৰাইজৰ স্বাক্ষৰ সম্বলিত উক্ত আবেদন প্রতিলিপি বৰভাগ ৰাজহ চক্ৰৰ চক্ৰ বিষয়া আৰু ঘগ্ৰাপাৰ আৰক্ষী থানতো দিয়া হৈছে। আবেদনত উল্লেখ কৰিছে যে উক্ত পুখুৰীকেইটাৰ বাবে অকল খেতিপথাৰ বা বাৰীবস্তিয়ে নহয় বাট-পথো পানীৰ তলত থকাৰ ফলত চমাৰকুছি আৰু লৰমাবটাকুছিৰ ৰাইজৰ যাতায়াতত যথেষ্ট অসুবিধা হয়।
সেয়েহে ৰাইজে জিলা আয়ুক্তই ইয়াৰ এটা চৰজমিন তদন্ত কৰি বিহিত ব্যৱস্থা লোৱাৰ বাবে আবেদনত উল্লেখ কৰিছিল; কিন্তু দুর্ভাগ্যজনক কথা যে জিলা আযুক্ত তথা বৰভাগ ৰাজহচক্ৰ বিষয়াজনে বৰ্তমানলৈ ইয়াৰ কোনো ব্যৱস্থা নোলোৱাত ৰাইজ বিতুষ্ট হৈ পৰিছে। সেয়েহে ৰাইজে ইয়াৰ এটা তৎকালীন সমাধান বিচাৰিছে, নহ’লে পূৰ্বৰ বছৰকেইটাৰ দৰে এইবেলি খেতিয়কসকলে খেতিৰ আশা বাদ দিব লাগিব।