Golokganj Incident:
ধুবুৰী জিলাৰ গোলকগঞ্জ থানাৰ অন্তৰ্গত বিচনদৈ প্ৰথম খণ্ড গাঁৱত যোৱা শনিবাৰ আদালতত বিচাৰাধীন ভূমি তিনি সংগঠনৰ নেতাই দখল কৰিবলৈ গৈ খিলঞ্জীয়া লোকক সন্দেহজনক বাংলাদেশী সজোৱাৰ প্ৰতিবাদত আজি দুটা মুছলমান সংগঠনে তীব্ৰ প্ৰতিবাদ সাব্যস্ত কৰা ঘটনাই তাৎপৰ্য্য বহন কৰিছে।
জানিব পৰা মতে, গাঁও খনৰ পুৰণি ৮৯৫ আৰু নতুন ১৩২৫ নম্বৰ দাগৰ তিনি বিঘা ষোল্ল লেচা বিতৰ্কিত মাটি ডোখৰ ২০১৮ চনৰ পৰা আদালতত বিচাৰাধীন হৈ আছে। আব্দুল জব্বাৰ আলী আৰু হায়দৰ আলীৰ দখলত থকা মাটি ডোখৰ পট্টা সত্বত মফিজুদ্দিন সেখে নিজৰ দাবী কৰি গোচৰ তৰে। উক্ত মাটি ডোখৰৰ এটা অংশ মানিক দেৱনাথ নিজৰ বুলি দাবী কৰি ২০২৪ চনত গোলকগঞ্জ সম জিলা কাৰ্যালয়ত আবেদন জনায়।
আদালতত বিচাৰাধীন হৈ থকা মাটি ডোখৰ বেদখলৰ দায়িত্ব লয় সদৌ অসম গৰিয়া মৰিয়া আৰু দেশী জাতীয় পৰিষদৰ ধুবুৰী জিলা সভাপতি আফজালুৰ ৰহমান, আক্ৰাছুৰ জিলা কাৰ্যকৰী সভাপতি চন্দন ৰায় আৰু ৰাষ্ট্ৰীয় বজৰংগ দলৰ জিলা সভাপতি কৃষ্ণ ৰাঠোৰ। শনিবাৰে আফজালুৰ, চন্দন আৰু ৰাঠোৰ সাংগোপাংগো লৈ আদালতত বিচাৰাধীন ভূমি বেদখল কৰিবলৈ যায়।
বিপৰীত পক্ষই বাধা দিয়াত এক উত্তেজনাময় পৰিবেশৰ সৃষ্টি হয়। এই খবৰ লাভ কৰি গোলকগঞ্জ সম জিলা আৰক্ষী অধীক্ষক কৰবী বনিয়া আৰু গোলকগঞ্জ থানাৰ ভাৰপ্ৰাপ্ত বিষয়া দেৱজিত কলিতা সদল বলে উপস্থিত হৈ পৰিস্থিতি নিয়ন্ত্ৰণ কৰে। ৰাঠোৰ, চন্দনে আজিজুৰ হকক সন্দেহজনক বাংলাদেশী বুলি আখ্যা দিয়ে। একে কথাত সমৰ্থন আগবঢ়াই গৰিয়া মৰিয়া দেশী জাতীয় পৰিষদৰ নেতা আফজালুৰে আজিজুৰক গ্ৰেপ্তাৰৰ দাবী জনায়।
বিশেষকৈ স্বগোষ্ঠীয় দেশী মুছলিম সংগঠনৰ নেতাই স্বগোষ্ঠীয় খিলঞ্জীয়া লোকক সন্দেহজনক বাংলাদেশী সজোৱাৰ চেষ্টা চলোৱা কাৰ্যত ক্ষুণ্ণ হৈ পৰে দেশী মুছলমানৰ আন দুটা সংগঠন ক্ৰমে সদৌ দেশী জাতীয় পৰিষদ আৰু দেশী জনগোষ্ঠীয় মঞ্চ। আজি সদৌ দেশী জাতীয় পৰিষদৰ কেন্দ্ৰীয় সভাপতি ছাইফুল হক জিলা সভাপতি আশ্ৰাফুল আলম সম্পাদক ওমৰ ফাৰুক আৰু দেশী জনগোষ্ঠীয় মঞ্চৰ জিলা সম্পাদক আব্দুল্লাহ খন্দকাৰৰ নেতৃত্বত শতাধিক কৰ্মী সমৰ্থক গোলকগঞ্জ শ্মশানৰ সমীপত একত্ৰিত হৈ বিক্ষোভ প্রদর্শন কৰে।
আফজালুৰ ৰহমান মুৰ্দাবাদ, আফজালুৰ ৰহমানক বহিস্কাৰ কৰক আফজালুৰ ৰহমান গো বেক আদি ধ্বনি দি পৰিবেশ উত্তাল কৰে। ইয়াৰ পিছতে গোলকগঞ্জ থানা আৰু সম জিলা কাৰ্যালয়ত উপস্থিত হৈ ইয়াৰ লগত জড়িত সকলক গ্ৰেপ্তাৰৰ দাবী জনায়। ইয়াৰ পূৰ্বে গোলকগঞ্জ আঞ্চলিক পঞ্চায়ত গঠনক কেন্দ্ৰ কৰি সৃষ্টি হোৱা সংঘাতৰ বিৰুদ্ধে ধুবুৰী জিলা আক্ৰাছুৰ কাৰ্যকৰী সভাপতি চন্দন ৰায়ে লোৱা প্ৰতিবাদী কাৰ্যসূচীৰ বিৰুদ্ধে নিজ সংগঠনৰ ভিতৰতে বিতৰ্কৰ সৃষ্টি হৈছিল তাৰোপৰি বজৰংগ দলৰ নেতা ৰাঠোৰ নিজে গোলকগঞ্জ সম জিলাৰ স্থানীয় বাসিন্দা নহয়,।
তেনেক্ষেত্ৰত ১৯৫১ চনৰ এনআৰচিত নাম সন্নিবিষ্ট লোকৰ পৰিয়ালৰ লোকক সন্দেহজনক নাগৰিক সজাব খোজা ঘটনাই প্ৰতিক্ৰিয়াৰ সৃষ্টি কৰিছে। ইয়াৰ বিৰুদ্ধে আৰক্ষীক নিজাববীয়াকৈ গোচৰ পঞ্জীয়ন কৰাৰ বাবে সংগঠন দুটাই দাবী কৰিছে।