বুধবাৰে লোকসভাত কেন্দ্ৰীয় গৃহমন্ত্ৰী অমিত শ্বাহে তিনিখন বিধেয়ক উত্থাপন কৰে। বিধেয়কখনক লৈ সৃষ্টি হোৱা হুলস্থুলৰ মাজতে বিৰোধী সাংসদে বিধেয়ক ফালি শ্বাহৰ ওপৰত দলিয়াই ।
ভিডিঅ’ত বন্দী হৈছে এই দৃশ্য। বিৰোধীৰ প্ৰতিবাদৰ বাবে স্থগিত ৰখা হৈছিল লোকসভাৰ অধিৱেশন।
বুধবাৰে কেন্দ্ৰীয় গৃহমন্ত্ৰীয়ে ১৩০ সংখ্যক সংবিধান সংশোধনী বিধেয়ক উত্থাপন কৰে। ইয়াৰ লগতে কেন্দ্ৰীয় শাসিত অঞ্চল চৰকাৰ (সংশোধনী) বিধেয়ক আৰু জম্মু-কাশ্মীৰ পুনৰ্গঠন (সংশোধনী) বিধেয়ক উত্থাপন কৰা হয়। তিনিওখন বিধেয়কৰ বিৰোধিতা কৰা হৈছিল।
১৩০ সংখ্যক সংবিধান সংশোধনী বিধেয়ক অনুসৰি যদি প্ৰধানমন্ত্ৰী, মুখ্যমন্ত্ৰী, যিকোনো কেন্দ্ৰীয় মন্ত্ৰী, ৰাজ্যিক মন্ত্ৰী বা কোনো কেন্দ্ৰীয় শাসিত মন্ত্ৰীক গুৰুতৰ অপৰাধৰ অভিযোগত একেৰাহে ৩০ দিন জিম্মাত থাকে তেন্তে ৩১ দিনৰ দিনা তেওঁ মন্ত্ৰীত্ব হেৰুৱাব ।
পাঁচ বছৰ বা তাতকৈ অধিক কাৰাদণ্ডৰ শাস্তি পাব পৰা অপৰাধক ‘গুৰুতৰ’ বুলি গণ্য কৰা হ’ব। এই বিধেয়কখন আইনত পৰিণত হ’লে বিজেপিয়ে বিভিন্ন কেন্দ্ৰীয় সংস্থাক কামত ব্যৱহাৰ কৰিব বুলি বিৰোধীৰ অভিযোগ।
বিৰোধী শাসিত ৰাজ্যত এই আইনৰ দ্বাৰা মুখ্যমন্ত্ৰী বা আন মন্ত্ৰীক বিপদত পৰিব পাৰে। সেইবাবেই লোকসভাত এই বিধেয়কক লৈ প্ৰতিবাদ সাব্যস্ত কৰা হৈছে।
বুধবাৰে লোকসভাত হুলস্থুলীয়া পৰিৱেশৰ সময়ত আইলেণ্ডৰ বিপৰীত ফালে থিয় হৈ থকা বিৰোধী সাংসদসকলে বিল কাগজখন ফালি পেলায়। তাৰ পাছত সেই কাগজৰ টুকুৰা থিয় হৈ থকা শ্বাহৰ ঠাইৰ ফালে দলিয়াই দিয়ে।
উল্লেখ্য যে,সেই সময়তে শ্বাহে বিলখন পঢ়ি শুনাই আছিল। কাগজৰ টুকুৰা উৰি আহিলেও তেওঁ বিষয়টোক বিশেষ গুৰুত্ব নিদিলে।
অৱশ্যে অধ্যক্ষ ওম বিৰলাই বিৰোধীক বাধা দিবলৈ চেষ্টা কৰে। পাছত তেওঁ অধিৱেশন স্থগিত ৰাখে। লোকসভাত বিৰোধীৰ আচৰণক গৰিহণা দিছে কেন্দ্ৰই।
বিতৰ্ক আৰু আলোচনাৰ জৰিয়তে সমস্যা সমাধানৰ বাৰ্তা দিয়া হৈছে। কেন্দ্ৰীয় মন্ত্ৰী কিৰেন ৰিজিজুৱে কয়, “দেশৰ জনসাধাৰণে আমাক কাম কৰিবলৈ ইয়ালৈ পঠিয়াইছে। বিৰোধীয়ে কেৱল হুলস্থুল সৃষ্টি কৰিবলৈ ইয়ালৈ আহে নেকি?গণতন্ত্ৰক অপমান কৰিলে ৰাইজে আপোনাক ক্ষমা নকৰে। সাংসদে ৰাইজৰ ৰায়ক অসন্মান কৰিব নালাগে। আলোচনা আৰু বিতৰ্কৰ জৰিয়তে কাম অব্যাহত ৰাখিব লাগে।”