স্বয়ং প্রধানমন্ত্রী নৰেন্দ্র মোদী আৰু কেন্দ্রীয় গৃহমন্ত্রী অমিত শ্বাহৰ সম্মুখতে কেন্দ্রীয় মুখ্য তথ্য আযুক্ত, আঠ কেন্দ্রীয় তথ্য আয়ুক্ত আৰু তদাৰকী আযুক্ত নিযুক্তিৰ তীব্ৰ বিৰোধিতা কৰিলে কংগ্রেছ সাংসদ তথা লোকসভাৰ বিৰোধী দলপতি ৰাহুল গান্ধীয়ে। বুধবাৰে উক্ত দুই চৰকাৰী স্বচ্ছতা ৰক্ষক সংস্থাৰ শীর্ষ পদবীধাৰী বাছনিৰ বাবে প্রধানমন্ত্রীৰ আমন্ত্রণত প্রধানমন্ত্রী কার্যালয়ত এক কন্ধদ্বাৰ বৈঠক অনুষ্ঠিত হয়।
এই বৈঠকত কেন্দ্রীয় গৃহমন্ত্রী শ্বাহ আৰু লোকসভাৰ বিৰোধী দলপতিৰূপে বাহুলে অংশগ্রহণ কৰে। বহুতে পূর্বে ধাৰণা কৰা অনুসৰি বৈঠক দীঘলীয়া হয়। সুদীর্ঘ ৮৮ মিনিট অর্থাৎ এঘণ্টা ২৮ মিনিট ধৰি অনুষ্ঠিত হয় এই বৈঠক। ৮৮ মিনিটৰ পাছতহে ৰাহুল বৈঠক কক্ষৰ পৰা ওলাই আহে। সূত্রই জনোৱা মতে, মুখ্য কেন্দ্রীয় তথ্য আয়ুক্ত,আঠ কেন্দ্রীয় তথ্য আয়ুক্ত আৰু তদাৰকী আয়ুক্তৰ বাবে মোদী-শ্বাহে কৰা বাছনিৰ তীব্ৰ বিৰোধিতা কৰে ৰাহুলে। এই সমূহ পদত নিযুক্তিৰ বিৰোধিতা কৰি তেওঁ লিখিতভাৱে আপত্তি দর্শাই বুলি সূত্রই সদৰী কৰিছে।
উল্লেখ্য যে নির্বাচন আয়োগ, কেন্দ্রীয় তথ্য আয়োগ আৰু কেন্দ্রীয় তদাৰকী আয়োগৰ আযুক্তৰ নিযুক্তিৰ বাবে মোদী চৰকাৰে প্ৰায় দুবছৰ পূৰ্বে এক বিতর্কিত তিনিজনীয়া সমিতি গঠন কৰে। চৰকাৰে নির্দিষ্ট কৰা নিয়ম অনুসৰি এই তিনিজনীয়া সমিতিত অধ্যক্ষৰূপে প্রধানমন্ত্রী আছে। সমিতিখনৰ আন দুজন সদস্য। এজন কেন্দ্রীয় মন্ত্রীক আন দুই সদস্যৰ এজন ৰূপে প্রধানমন্ত্রীয়ে বাছনি কৰে। আনজন সদস্য হ’ল বিৰোধী দলপতি।
কালি কেন্দ্রীয় তথ্য আয়োগ আৰু তদাৰকী আয়োগৰ আয়ুক্ত বাছনিৰ বাবে অনুষ্ঠিত বৈঠকখনত স্বয়ং কেন্দ্রীয় গৃহমন্ত্রী শ্বাহে বাছনি সমিতিৰ সদস্যৰূপে অংশগ্রহণ কৰে। বিৰোধী দলপতিৰূপে বৈঠকত অংশগ্রহণ কৰে ৰাহুলে। সংসদৰ শীতকালীন অধিবেশন চলি থকাৰ সময়তে আয়োজিত এই বিশেষ বৈঠকত অংশগ্ৰহণৰ উদ্দেশ্যে দুপৰীয়া এক বজাত ৰাহুল প্রধানমন্ত্রী কার্যালয়ত উপস্থিত হয়।
তেওঁ দলীয় সতীৰ্থসকলৰ লগতে বহুতে উদগ্ৰীৱতাৰে বৈঠকৰ পৰা ৰাহুল উভতি অহালৈ অপেক্ষা কৰি থাকে; কিন্তু দুপৰীয়া ১.০৭ বজাৰ পৰা অনুষ্ঠিত এই বৈঠক প্রত্যাশ্যাতকৈ দীঘলীয়া হয়। এই সময়ছোৱা তেওঁৰ দলীয় সতীর্থসকলে উৎকণ্ঠাৰে অতিবাহিত কৰে।
অৱশেষত ৮৮ মিনিটৰ পাছত ৰাহুল ওলাই আহে। তাকো ধাৰণা কৰা অনুসৰি তেওঁ মোদী-শ্বাহৰ বাছনিৰ বিৰোধিতা কৰে বুলি উচ্চস্তৰীয় সূত্রই প্রকাশ কৰিছে। অৱশ্যে পূর্বেও ৰাহুল বা কংগ্ৰেছ সভাপতি মল্লিকার্জুন খার্গেও এনে শীর্ষ পদসমূহৰ চৰকাৰী পক্ষৰ বাছনিৰ বিৰোধিতা কৰিছিল। তৎসত্ত্বেও চৰকাৰী পক্ষই বাছনি কৰা ব্যক্তিয়েই এনে পদত নিযুক্তি পায়, কাৰণ তিনিজনীয়া সমিতিখনৰ দুজনে যাক সমর্থন জনায়, তেৱেঁই বাছনি লাভ কৰে।
তৎসত্ত্বেও নিজৰ স্থিতি সবল ৰূপত ৰাহুল বা খার্গেই প্রতিষ্ঠা কৰি আহিছে বুলি চর্চা হৈছে। লক্ষ্যণীয়ভাবে আজি বাহুল উক্ত বৈঠকলৈ যোৱাৰ পূৰ্বে সামাজিক মাধ্যমযোগে মোদী চৰকাৰক তীব্ৰ আক্ৰমণ কৰে। উল্লেখ্য যে নির্বাচন আয়ুক্ত, তথ্য আয়ুক্ত আৰু তদাৰকী আয়ুক্ত বাছনিৰ বাবে উচ্চতম ন্যায়ালয়ে দুবছৰ পূৰ্বে গঠন কৰা এক তিনিজনীয়া সমিতিৰ সদস্যৰূপে দেশৰ মুখ্য ন্যায়াধীশক অন্তর্ভুক্তিৰ ব্যৱস্থা আছিল। সমিতিৰ আন দুজন সদস্যৰূপে প্রধানমন্ত্রী আৰু বিৰোধী দলপতিক ৰখাৰ নিয়ম প্ৰৱৰ্তন কৰিছিল ন্যায়ালয়ে।
আশ্চর্যজনকভাবে এই নিয়ম পৰৱৰ্তী সময়ত মোদী চৰকাৰে সলনি কৰি তিনিজনীয়া বাছনি সমিতিৰ পৰা দেশৰ মুখ্য ন্যায়াধীশক বাদ দিয়ে। তেওঁৰ স্থানত এজন কেন্দ্রীয় মন্ত্রীক অন্তর্ভুক্ত কৰে। এই মন্ত্রীজনক প্রধানমন্ত্রীয়ে বাছনি কৰিব লাগে। মোদী চৰকাৰৰ এই বিতর্কিত কাৰ্যৰ কথাও উল্লেখ কৰি আজি ৰাহুল সমালোচনাত মুখৰ হৈ উঠে। লগতে তেওঁ নির্বাচন আয়োগৰ বিৰুদ্ধে আইনগত ব্যবস্থা ল’ব নোৱাৰাৰ যি নিয়ম মোদী চৰকাৰে বিগত লোকসভা নিৰ্বাচনৰ পূৰ্বে প্ৰৱৰ্তন কৰিলে, তাকো তীব্র ভাষাৰে সমালোচনা কৰে।
তদুপৰি নিৰ্বাচন অনুষ্ঠিত হোৱাৰ ৪৫ দিনৰ ভিতৰত চিচি ফুটেজ ধ্বংস কৰাৰ নিয়ম নির্বাচন আয়োগে প্ৰৱৰ্তন কৰাক লৈয়ো ৰাহুলে তীব্ৰ বাক্যবাণ এৰে।
উল্লেখ্য যে কেন্দ্ৰীয় চৰকাৰক জনতাৰ প্ৰতি দায়বদ্ধ কৰাত সবল ভূমিকা পালন কৰি থকা কেন্দ্রীয় তথ্য আয়োগৰ মুখ্য আয়ুক্ত পদ বিগত তিনি মাহ ধৰি খালী হৈ আছে। যোৱা ১৩ ছেপ্টেম্বৰত কেন্দ্রীয় মুখ্য তথ্য আয়ুক্ত হীৰালাল ছামাৰিয়াই অৱসৰ গ্ৰহণ কৰে। তেতিয়াৰে পৰা এই পদ খালী হৈ আছে।
একেদৰে আয়োগৰ আঠটা আয়ুক্ত পদো খালী হৈ আছে। ফলত ১০ জন আয়ুক্তৰে গঠিত কেন্দ্রীয় তথ্য আয়োগৰ মাথোঁ দুজন আযুক্ত আনন্দি বামলিংগম আৰু বিনোদ কুমাৰ তিৱাৰীয়েহে কাম-কাজ চোৱা-চিতা কৰি আছে; অথচ বর্তমানে কেন্দ্রীয় তথ্য আয়োগে ৩০,৮৩৮ খন আবেদনৰ উত্তৰ দিবলৈ বাকী আছে বুলি আয়োগৰ ৱেবছাইটত উল্লেখ আছে।
একেদৰে দুর্নীতি প্রতিৰোধক কেন্দ্রীয় তদাৰকী আয়োগৰো এটা আয়ুক্ত পদ খালী হৈ আছে। উল্লেখ্য যে তথ্য জনাৰ অধিকাৰ আইনৰ ১২(৩) ধাৰা অনুসৰি, আয়োগৰ মুখ্য আয়ুক্ত আৰু আয়ুক্ত বাছনি সমিতিৰ অধ্যক্ষ হ’ল প্রধানমন্ত্রী। সমিতিখনত সদস্যৰূপে এজন কেন্দ্রীয় মন্ত্রী আৰু বিৰোধী দলপতি থাকিব লাগে।
