Karbianglong Dist. Congress:
টকাৰ সমান্তৰালভাৱে মুখ্যমন্ত্রী ড° হিমন্ত বিশ্ব শর্মাই কার্বি স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙক এইবাৰ মাটিৰ এটিএমৰূপে ক ব্যৱহাৰ কৰিছে বুলি মন্তব্য কৰিছে কাৰ্বি আংলং জিলা কংগ্রেছে।
কালি ইয়াত কার্বি আংলং জিলা কংগ্ৰেছৰ সভাপতি ৰতন ইংতিয়ে এক সংবাদমেলত কয় যে কার্বি আংলং স্বায়ত্তশাসিত পৰিষদৰ অৱস্থা এতিয়া লাওলোৱা। পৰিষদখন তুলিৰামে বন্ধকত থোৱাৰ ব্যৱস্থা কৰিছে বুলি মন্তব্য কৰি তেওঁ কয়, ‘কার্বি আংলং স্বায়ত্তশাসিত পৰিষদৰ দুশ কোটিতকৈও অধিক দেনাৰ বোজা হৈছে। সৰু-সুৰা ঠিকাদাৰ আৰু ব্যৱসায়ীৰ লগতে জিলা পৰিষদখনৰ কর্মচাৰীসকলে দীর্ঘদিন ধৰি পাবলগীয়া ধন পৰিষদখনে মুকলি কৰি দিয়া নাই। বিপৰীতে কার্বি আংলঙত শ শ কোটি চৰকাৰী ধনৰ অবাধ লুণ্ঠন চলিছে।’ সংবাদমেলত বিভিন্ন নথিপত্র প্রকাশ কৰি কাৰ্বি নেতা ইংতিয়ে কয় যে চৰকাৰী আৰটিআইৰ তথ্য মতে কাৰ্বি আংলং জিলাত সর্বমুঠ এক লাখ ৫৩ হেজাৰ ২৫০ বিঘা মাটি বহিৰাগত পুঁজিপতিক চৰকাৰে বেআইনীভাৱে দিয়াৰ ব্যৱস্থা কৰিছে।
পার্বত্য স্বায়ত্তশাসিত অঞ্চলৰূপে কাৰ্বি আংলঙৰ মাটি অজনজাতীয় লোকক হস্তান্তৰ কৰিব নোৱাৰে যদিও তুলিৰাম ৰংহাঙৰ চক্ৰান্তত অসম চৰকাৰে ১৮ হেজাৰ বিঘা মাটি সৌৰশক্তি প্ৰকল্পৰ বাবে আদানী গ্রুপক, ১৩ হেজাৰ বিঘা মাটি নেপিয়াৰ প্ৰকল্পৰ বাবে আম্বানী গোষ্ঠীক, ছহেজাৰ বিঘা মাটি সৌৰশক্তি প্রকল্পৰ বাবে, ১,৩৯৫ বিঘা মাটি এপিডিচিএলৰ পাম্প ষ্ট’ৰেজৰ বাবে আৰু এক লাখ ১৬ হেজাৰ ২৫০ বিঘা মাটি পাম অইল খেতিৰ বাবে ৰামদেৱ আৰু গডৰেজক গতাই দিয়াৰ ব্যৱস্থা কৰিছে। কংগ্ৰেছ নেতাজনে লগতে কয়, ‘এই তথ্যসমূহ চৰকাৰীভাৱে লাভ কৰা হৈছে আৰু এনে বহু মাটি আছে, যাৰ হিচাপ কাক কেনেকৈ দিয়া হৈছে কোনেও নাজানে।’
উল্লেখ্য যে কার্বি আংলঙত মুখ্যমন্ত্রী ড° শৰ্মা আৰু মন্ত্ৰী পীযুষ হাজৰিকাৰ পৃষ্ঠপোষকতাত পাহাৰ ভাঙি শিলৰ অবৈধ ব্যৱসায় অব্যাহত ৰখা হৈছে বুলি ইংতিয়ে অভিযোগ কৰে। তেওঁ কয় যে এই সন্দর্ভত ইতিমধ্যে প্রধানমন্ত্রী নৰেন্দ্ৰ মোদী আৰু লোকসভাৰ বিৰোধী দলৰ উপ-দলপতি তথা অসম প্রদেশ কংগ্ৰেছৰ সভাপতি গৌৰৱ গগৈক তথ্যসহ অভিযোগ দাখিল কৰা হৈছে।
আনহাতে, জিলা কংগ্ৰেছৰ সভাপতিজনে কয়, ‘তুলিৰামক মুখ্যমন্ত্ৰীয়ে দেশ-বিদেশ ঘূৰাই-ফুৰাই প্ৰথমতে টকাৰ এটিএমৰূপে ব্যৱহাৰ কৰিছিল। এতিয়া তুলিৰামক মুখ্যমন্ত্ৰীয়ে মাটিৰ এটিএমৰূপে ব্যৱহাৰ কৰিছে।’ তুলিৰামে কার্বি জনগোষ্ঠীৰ ভূমিৰ অধিকাৰ আৰু স্বাভিমানক বিজেপি তথা চৰকাৰৰ ওচৰত বিক্ৰী কৰি দিছে বুলি ইংতিয়ে মন্তব্য কৰি কয়, ‘কেৱল সেয়াই নহয়, বন বিভাগলৈ অহা বৃক্ষৰোপণৰ এশ কোটিতকৈও অধিক টকা তুলিৰামে অপব্যয় কৰিছে।
এই চৰকাৰী ধন নগদ উলিয়াই কেন্দ্ৰীয় চৰকাৰৰ নিয়ম ভংগ কৰিছে। যি সময়ত কেন্দ্ৰীয় চৰকাৰে হিতাধিকাৰীৰ বেংক একাউণ্টত প্রত্যক্ষভাৱে পুঁজি হস্তান্তৰৰ নিয়ম কৰিছে, সেই সময়ত কাৰ্বি আংলঙত তুলিৰামে নগদ লেনদেন অব্যাহত ৰাখিছে।’ উল্লেখ্য যে তুলিৰামে নিজৰ ভ্ৰাতৃ, পুত্ৰ আৰু নিকট আত্মীয়ৰ নামত চৰকাৰী ঠিকা আবণ্টন দিয়াৰ লগতে নামে-বেনামে দেশে-বিদেশে সম্পত্তিৰ পাহাৰ গঢ়া বুলি ইংতিয়ে অভিযোগ কৰে।
কাৰ্বি আংলঙত জনগোষ্ঠীয় লোকসকলক ধনৰ প্রলোভন আৰু ভাবুকি দি দুর্নীতিগ্রস্ত তুলিৰামে মেনেজ কৰি থকা বুলি উল্লেখ কৰি ইংতিয়ে কয় যে তুলিৰামে সংবাদ মাধ্যমৰ স্বাধীনতাও নোহোৱা কৰিছে। কাৰ্বি স্বায়ত্তশাসিত পৰিষদৰ দুৰ্নীতিৰ বিষয়ে সংবাদমেল পৰিৱেশন কৰিলে অথবা বাতৰি পৰিৱেশন কৰিলে সেয়া সম্প্ৰচাৰ কৰাত বাধা দিয়ে বুলি কার্বি নেতাজনে অভিযোগ কৰে। সংবাদমেলত প্রাক্তন বিধায়ক জগৎছিং ইংতি, প্রাক্তন ইএম বিদ্যাছিং বংপি, প্রক্তন বিধায়ক হেমছিং তিছ’ আৰু চৰিস্মা ৰংপি উপস্থিত থাকে।