Cm Meeting in khanapara:
জীৱিকা সখীসকলৰ ছোৱালীক কম বয়সত বিয়া নিদিব ৷ ছোৱালী সকলক নিযুত মইনা আঁচনিৰ জড়িয়তে পঢ়াৰ খৰচ দিব চৰকাৰে। এই মন্তব্য মুখ্যমন্ত্ৰী ড:হিমন্ত বিশ্ব শৰ্মাৰ ৷শনিবাৰে মহানগৰীৰ খানাপাৰাস্থ পশু চিকিৎসা মহাবিদ্যালয় খেলপথাৰত ‘সখী এক্সপ্ৰেছ’ আঁচনিৰ অধীনত অসম ৰাজ্যিক গ্রামীণ জীৱিকা অভিযানৰ কমিউনিটী কেডাৰলৈ স্কুটাৰ প্ৰদান অনুষ্ঠানত অংশ লৈ মুখ্যমন্ত্ৰী গৰাকীয়ে আৰু কয় যে ,২৬ত বিজেপি মিত্ৰগোষ্ঠীৰ চৰকাৰ পুনৰ হ’লে নিযুত মইনা আঁচনিৰ ধন আৰু অধিক বাঢ়িব ৷ আনহাতে যিসকল জীৱিকা সখী বাইদেউৱে অৰুণোদয় আঁচনি পোৱা নাই তেওঁলোকক পোনপটীয়াভাৱে অৰুণোদয় আঁচনি দিব চৰকাৰে ৷ জীৱিকা সখী বাইদেউসকলে মহিলা উদ্যমিতা অভিযানৰ অধীনত এইবাৰ ১৫ হাজাৰ, অহা বছৰ ৪০ হাজাৰ লাভ কৰিব ৷ আমি বিচাৰোঁ হিন্দুৱেই হওক বা মুছলমান, আমাৰ জীৱিকা সখী বাইদেউসকল সকলোতে মূলাগাভৰুৰ দৰে হ’ব লাগে ৷ সেয়েহে কৰ্মৰত প্ৰতি গৰাকী জীৱিকা সখীয়ে নিজৰ দায়িত্ব সুচাৰুৰূপে কৰি যাওক ৷ চৰকাৰ আপোনালোকৰ স’তে আছে।
ভাষণ প্ৰসংগত মুখ্যমন্ত্ৰী গৰাকীয়ে পশু সখী বেংক সখী আৰু জীৱিকা সখী সকললৈ আহ্বান জনায় যে এতিয়াৰ পৰা কোনোৱে তিনিটাতকৈ অধিক সন্তান জন্ম নিদিয়ে । অৱশ্যে জনজাতি আৰু চাহ জনগোষ্ঠীয় মহিলাই চাৰিটা সন্তান জন্ম দিয়াত কোনো বাধাৰোপ নাই ৷
আনহাতে স্কুটাৰ লাভ কৰা প্ৰতিগৰাকী জীৱিকা সখীয়ে হেলমেট পিন্ধি কম বেগত স্কুটাৰ চলাবলৈ আহ্বান জনাই মুখ্যমন্ত্ৰীয়ে আৰু কয়,স্কুটাৰ লাভ কৰা প্ৰতিগৰাকী জীৱিকা সখীক পেট্ৰল ভৰাবৰ বাবে মাহেকত পাঁচশ টকাকৈ চৰকাৰে আগবঢ়াব ৷সভাত মুখ্যমন্ত্ৰী গৰাকীয়ে ৰাজ্য চৰকাৰৰ দ্বাৰা ৰূপায়িত বিভিন্ন আঁচনিৰ বিষয়ে আলোকপাত কৰে৷ সভা খনত উপস্থিত থাকে পঞ্চায়ত আৰু গ্ৰামোন্নয়ন মন্ত্ৰী ৰনজিৎ কুমাৰ দাস,বিধায়কত্ৰয় অতুল বৰা ,ৰমেন্দ্ৰ নাৰায়ণ কলিতা,সিদ্ধাৰ্থ ভট্টাচাৰ্য,গুৱাহাটীৰ সাংসদ বিজুলী কলিতা মেধি সহ জ্যেষ্ঠ বিষয়াবৰ্গ ৷
উল্লেখ্য যে ,সভাত জীৱিকা সখী হিচাপে নিয়োজিত ৰাজ্যৰ ৯,৭০৪ গৰাকী মহিলাক ৰাজ্য চৰকাৰে প্ৰদান কৰে স্কুটাৰ।