Rain✒️ৰাজ্যৰ পৰা বাৰিষাৰ বতৰে ক্রমে বিদায় ল’বলৈ আৰম্ভ কৰিছে। প্রতি বছৰে অসমক কম-বেছি পৰিমাণে কে’বাটাও বানে স্পর্শ কৰে। এইবাৰ বাৰুকৈয়ে ইয়াৰ ব্যতিক্ৰম পৰিলক্ষিত হয়। ৰাজ্যৰ প্ৰতিখন জিলাতে এইবাৰ স্বাভাৱিকতকৈ বৰষুণ কম হয়।
দুই-এখন জিলাতহে কাষৰীয় ৰাজ্যৰ বতৰৰ প্ৰভাৱ পৰাত তাত কিছু পৰিমাণে বৰষুণ হয়। তদুপৰি তেনে জিলাত চুবুৰীয়া ৰাজ্যৰ পৰা বৈ অহা পানীয়ে আংশিক আৰু কম সময়ৰ বাবে বানৰ সৃষ্টি কৰে। তাৰ বাদে আগষ্টলৈ ৰাজ্যত বানৰ প্ৰভাৱ নপৰিল।
বৰঝাৰস্থিত আঞ্চলিক বতৰ বিজ্ঞান কেন্দ্রই সদৰী কৰা অনুসৰি, যোৱা জানুৱাৰীৰ পৰা দেওবাৰে ৩১ আগষ্টলৈ গুৱাহাটীত বৰষুণৰ স্বাভাবিক পৰিমাণ হ’ব লাগিছিল ১৭৬ ছেন্টিমিটাৰ।
তাৰ বিপৰীতে ১৩০ ছেন্টিমিটাৰহে বৰষুণ হয়। তেনেদৰে ৰাজ্যৰ আনকেইখনমান জিলাৰ তথ্যও সোমবাৰে কেন্দ্রটোৱে সদৰী কৰে। সেই অনুসৰি, ডিব্ৰুগড়ত বৰষুণ হ’ব লাগিছিল ২৬৭ ছেন্টিমিটাৰ।
জিলাখনত হোৱা বৰষুণৰ পৰিমাণ হ’ল ১৮৭ ছেন্টিমিটাৰ। তেজপুৰত স্বাভাৱিক বৰষুণৰ পৰিমাণ হ’ল ১৮২ ছেন্টিমিটাৰ। ইয়াৰ বিপৰীতে বৰষুণ হয় ১৭৫ ছেন্টিমিটাৰ। ধুবুৰীত স্বাভাৱিক পৰিমাণ ২৮৫ ছেন্টিমিটাৰৰ বিপৰীতে হোৱা বৰষুণৰ পৰিমাণ হ’ল ১৪৪ ছেন্টিমিটাৰ।
শিলচৰত বৰষুণৰ স্বাভাৱিক পৰিমাণ হ’ব লাগে ৩০০ ছেন্টিমিটাৰ। ইয়াৰ বিপৰীতে ২৪১ ছেন্টিমিটাৰহে বৰষুণ হয়। কেৱল উত্তৰ লখিমপুৰতহে স্বাভাবিকতকৈ অধিক পৰিমাণৰ বৰষুণ হয়। গাতে লাগি থকা অৰুণাচলত হোৱা বৰষুণৰ প্ৰভাৱ জিলাখনত পৰে।
উত্তৰ লখিমপুৰৰ বৰষুণৰ স্বাভাৱিক পৰিমাণ হ’ল ২৫৬ ছেন্টিমিটাৰ আৰু বৰষুণ হয় ২৮৬ ছেল্টিমিটাৰ।বতৰ বিজ্ঞান কেন্দ্ৰটোৰ তথ্য অনুসৰি, মেঘালয়তো এইবাৰ যথেষ্ট কম বৰষুণ হয়। শ্বিলঙত ২২৯ ছেন্টিমিটাৰ বৰষুণ হ’ব লাগে যদিও ১৬০ ছেন্টিমিটাৰতহে সীমাবদ্ধ ৰয়। চেৰাপুঞ্জীত বৰষুণৰ মাত্রা এইবাৰ উদ্বেগজনকভাবে হ্রাস পায়।
তাত স্বাভাৱিক পৰিমাণত ১,১০৭ ছেন্টিমিটাৰ বৰষুণ হ’ব লাগে। ইয়াৰ বিপৰীতে বৰষুণ হয় মাত্র ৬৩৩ ছেন্টিমিটাৰহে। বতৰ পৰিৱৰ্তনৰ ভয়াৱহ পৰিণতিতে এনেদৰে বৰষুণৰ মাত্রা স্বাভাৱিক দিনতো হ্রাস হোৱাটোরে ভয়াবহ ভবিষ্যতকে স্পষ্ট কৰিছে।