Guwahati:
ৰংচঙীয়া গুৱাহাটীৰ অন্ধকাৰ জগতখন অতি ভয়াবহ। শনিবাৰে মাজনিশা গুৱাহাটী চিকিৎসালয় মহাবিদ্যালয় হাস্পতাল (জিএমচিএইছ)লৈ এজন লোকে মুমূর্ষু অৱস্থাত অনা এগৰাকী যুৱতীক চিকিৎসকে মৃত ঘোষণা কৰা ঘটনাৰ জৰিয়তে সেই অন্ধকাৰ জগতৰ বহু তথ্য পোহৰলৈ আহিছে। পম্পী বৰুৱা নামৰ মৃত যুৱতীগৰাকীক লৈ অহা ইমৰান আলী নামৰ লোকজনক কৰা জেৰা আৰু ম’বাইল ফোন পৰীক্ষা কৰাত এই অন্ধকাৰজগতৰ বহু তথ্য পোহৰলৈ আহে। একেদৰে বহু তথ্য পোহৰলৈ আহিছে পম্পী বৰুৱাৰ ম’বাইল ফোন আৰু জীৱন যাপনৰ পদ্ধতিৰ পৰাও।
আৰক্ষী সূত্রই জনায় যে ব্যৱসায়িক মটৰ চাইকেলৰ চালক ধৃত ইমৰান আলী নিষিদ্ধ ড্ৰাগছৰ সৰবৰাহৰ লগত জড়িত। তদুপৰি ইমৰান গ্ৰাহকৰ চাহিদা অনুসৰি গুৱাহাটীৰ কে’বাখনো হোটেল আৰু লজত যুৱতী-মহিলা যোগান ধৰা কার্যতো জড়িত হৈ আছে। ইমৰানৰ ফোনটোত পল্টনবজাৰ ৰেলগেটত থকা ড্ৰাগছ সৰবৰাহকাৰীৰ কে’বাটাও ফোন নম্বৰ উদ্ধাৰ কৰা হৈছে। সেইসকলৰ পৰা ড্ৰাগছ সংগ্ৰহ কৰি ইমৰানে গুৱাহাটীৰ বহু অভিজাত পৰিয়ালৰ সন্তান আৰু হোটেলত যোগান ধৰি আহিছে বুলি আৰক্ষী সূত্রই জনায়।
ইপিনে, মৃত পম্পী বৰুৱায়ো গ্রাহকক যুৱতী যোগান ধৰা কাৰ্যত জড়িত আছিল বুলি আৰক্ষীয়ে সন্দেহ প্রকাশ কৰিছে। তদুপৰি স্বামীসহ পম্পী ড্রাগছ আসক্ত আছিল। সেইবাবে দুয়ো মহানগৰীৰ হেঙেৰাবাৰীত থকা সৃষ্টি নামৰ এটা নিচামুক্তি কেন্দ্রত দীর্ঘদিন চিকিৎসা লৈছিল। পম্পী এমাহ পূর্বে কেন্দ্ৰটোৰ পৰা ওলাইছিল যদিও মাজে মাজে ড্ৰাগছ সেৱন অব্যাহত ৰাখিছিল। পম্পীৰ স্বামী এতিয়াও কেন্দ্রটোতে আছে। আৰক্ষীয়ে সন্দেহ কৰা অনুসৰি, একমাত্ৰ ড্ৰাগছৰ প্ৰতি থকা আসক্তিৰ বাবেই চিকিৎসাৰ বাবে মাকক নগাঁৱৰ প্ৰা গুৱাহাটীলৈ আনিবলৈ ওলাই গৈও মহানগৰীৰ ইছলামপুৰৰ ভগৱান নামৰ এখন হোটেললৈ গৈছিল।
তাত অত্যধিক পৰিমাণৰ ড্ৰাগছ সেৱনৰ ফলতে পাছত পম্পীৰ মৃত্যু হয়। উল্লেখ্য যে যোৱা ৩০ আগষ্টৰ মাজনিশা ইমৰান আলীয়ে এখন অট’ৰে পম্পীক জিএমচি এইছলৈ আনিছিল। মুমূর্ষু অৱস্থাত থকা পম্পীক ট্রলীত উঠোৱাৰ পাছত চিকিৎসকে পৰীক্ষা কৰি মৃত ঘোষণা কৰিছিল। সেই মুহূৰ্ততে ইমৰানে দৌৰি পলাবলৈ চেষ্টা কৰিছিল। জিএমচি এইছৰ কৰ্তব্যৰত সুৰক্ষা কৰ্ময়ে কৰায়ত্ত কৰাৰ পাছত ইমৰানক ভঙাগড় আৰক্ষীক গতাই দিয়া হৈছিল।
পৰৱৰ্তী সময়ত এই সম্পর্কীয় গোচৰটো পল্টন বজাৰ আৰক্ষী থানালৈ স্থানান্তৰ কৰা হয়। বর্তমান পল্টনবজাৰ আৰক্ষীৰ জিম্মাত আছে ধৃত ইমৰান আলী। ইমৰানৰ লগত পম্পীৰ দীৰ্ঘদিনৰ পৰা সম্পৰ্ক থকাৰো তথ্য উদ্ধাৰ হৈছে। ড্ৰাগছ আৰু নিষিদ্ধ জগতলৈ যুৱতী যোগানৰ সূত্রেই দুয়োৰে মাজত সম্পর্ক গঢ়ি উঠিছিল বুলি তথ্য লাভ কৰা হৈছে। ইমৰানৰ পৰা এই তথ্য উদ্ধাৰ হৈছে যে গুৱাহাটীত ড্ৰাগছ আৰু নাৰী দেহৰ এখন বৃহৎ গোপন বজাৰ চলি আহিছে। দুয়োজনৰ ম’বাইল ফোনৰ পৰাই ইয়াৰ তথ্য আৰক্ষীয়ে উদ্ধাৰ কৰিছে।