Fossil:✒️মকৰা আৰু কেঁকোৰা জাতীয় প্ৰাণীৰ ৫২ কোটি বছৰ পূৰ্বৰ ‘পূৰ্বপুৰুষ’ৰ অস্তিত্ব শেহতীয়াভাৱে উদ্ধাৰ হৈছে। চীনৰ য়ুনান বিশ্ববিদ্যালয়ত সম্প্রতি সংৰক্ষিত হৈ থকা এই জীৱাশ্মক লৈ ডাৰহাম বিশ্ববিদ্যালয়ৰ গৱেষক মার্টিন স্মিথৰ নেতৃত্বত গৱেষণা চলিছে।
এই গৱেষণা সম্পর্কীয় তথ্য প্রকাশ পাইছে বিশ্বখ্যাত ‘নেচাৰ’ আলোচনীত। এই সন্ধিপদী প্ৰাণীৰ জীৱাশ্ম য়ুনানত অঞ্চলত উদ্ধাৰ হয়। এই জীৱাশ্মৰ নাম য়ুটি য়ুনানসি ৰখা হৈছে। গৱেষকসকলে প্রকাশ কৰা অনুসৰি এই প্ৰাণীৰ দেহ এডাল ৰেখা সদৃশ। এই প্রাণী কেম্ব্রিয়ান যুগত পৃথিৱীত আছিল।
আশ্চর্যজনক যে ৫২ কোটি বছৰ পূৰ্বৰ এই প্ৰাণীৰ মগজুৰ পৰা আৰম্ভ কৰি শৰীৰৰ অভ্যন্তৰৰ অন্ত্র তথা নাৰী-ভুঁৰু আদি অক্ষত অৱস্থাত আছে। বিজ্ঞানীসকলৰ মতে কেম্ব্রিয়ান যুগত যিসমূহ প্রাণী বাচি আছিল সেইসমূহৰ, দ্রুত বিবর্তন হৈছিল।
এই জীৱাশ্মৰ প্রাণীবিধৰো অনেকবাৰ বিৱৰ্তন ঘটে। আজিৰ পৃথিৱীত থকা মকৰা আৰু কেঁকোৰা হৈছে এই শ্ৰেণীৰ প্ৰাণীৰ অন্যতম। চীনৰ য়ুনানত উদ্ধাৰ হোৱা এই ৫২ কোটি বছৰ পূৰ্বৰ প্ৰাণীবিধৰ জীৱাশ্মৰ এক্সৰে টম’গ্রাফী কৰা হৈছে।
বিজ্ঞানীসকলে প্রাণীবিধৰ জীৱাশ্মৰ ত্রিমাত্রিক ছবিও তুলিছে। এই সম্পর্কত বিজ্ঞানীসকলে প্রকাশ কৰা অনুসৰি, জীৱাশ্মটোৰ মস্তিষ্কৰ অঞ্চল, খাদ্য হজমকাৰী গ্রন্থি সংবহনতন্ত্র (কডিমেণ্টৰী চাকুলেটৰী ছিষ্টেম), আনকি স্নায়ুৰ তথ্যও উদ্ধাৰ হৈছে।
এই প্রাণীবিধ যে আজিৰ কেঁকোৰা আৰু মকৰাৰ পূর্বপুৰুষ আছিল সেয়া একপ্ৰকাৰ স্পষ্ট হৈছে। কোটি কোটি বছৰ পূর্বে পৃথিৱীত বিচৰণ কৰা সত্ত্বেও এই প্রাণীবিধৰ শৰীৰৰ গঠন সময়ৰ তুলনাত উন্নত আছিল। এই সম্পর্কত বিজ্ঞানী মার্টিন স্মিথে কয় যে সাধাৰণতে জীৱাশ্মত পৰিণত হোৱাৰ সময়ত একোবিধ জীৱৰ শৰীৰ ভাঙি পৰে। কিন্তু এইবিধ প্রাণী জীৱাশ্মত পৰিণত হোৱাৰ সময়ত শৰীৰ ভাঙি নপৰিল। এই গৱেষণাৰ অন্যতম সহায়ক ষ্টেথক্লাইড বিশ্ববিদ্যালয়ৰ অধ্যাপিকা কেথৰিন ডবচনে কয় যে এই জীৱাশ্মই বিৱৰ্তনৰ ধাৰা যে অনেক সেয়াও প্রতিপন্ন কৰিছে। তদুপৰি ইয়াৰ সমান্তৰালভাৱে জৈব
বৈচিত্র্যও ধৰা পৰিছে। এই সম্পৰ্কত অধিক গৱেষণাৰ পোষকতা কৰিছে গৱেষিকাগৰাকীয়ে। বিজ্ঞানীসকলৰ মতে এই প্রাণী কোটি কোটি বছৰ ধৰি অভিযোজন ঘটে। জীৱন যুদ্ধত জয়ী হোৱাৰ বাবে প্ৰতিকূলতাৰ স’তে অনেক যুদ্ধ কৰাৰ ফলত এই প্রাণীবিধৰ বহু পৰিৱৰ্তন ঘটে।
এই ক্ষেত্রত বিজ্ঞানীসকলক সকলোতকৈ হতবাক কৰা দিশটো হৈছে এই বহু কোটি বছৰ পূৰ্বৰ প্ৰাণীবিধৰ মূৰৰ পৰা আৰম্ভ কৰি নাৰী-ভুৰুলৈকে অক্ষত অৱস্থাত আছে। উল্লেখ্য যে জীবাশ্ম হৈছে দীর্ঘদিন ধৰি প্ৰাণীৰ দেহত চাপ পৰি থাকিলে সেই প্রাণী পাথৰত পৰিণত হয়। বিৰল হ’লেও কেতিয়াবা প্ৰাণীৰ শৰীৰৰ নৰম কলাও লক্ষ লক্ষ বছৰ ধৰি অক্ষত অৱস্থাত থাকে।