Murder case:✒️দেশ কঁপোৱা ৰাজা ৰঘুবংশী হত্যাৰ গোচৰত মেঘালয় আৰক্ষীয়ে দাখিল কৰিলে ৭৯০ পৃষ্ঠাৰ অভিযোগনামা। ছোহৰা মহকুমাৰ প্ৰথম শ্ৰেণীৰ ন্যায়িক দণ্ডাধীশৰ আদালতত শুকুৰবাৰে হত্যাকাণ্ডটোৰ বিশেষ তদন্তকাৰী গোট (এছআইটি)-এ দাখিল কৰা এই অভিযোগনামাত মূল অভিযুক্তৰূপে ৰাজাৰ পত্নী সোনম ৰাজবংশীৰ নাম উল্লেখ আছে।
অভিযোগনামাখনত আৰু চাৰিজনৰ নাম উল্লেখ কৰিছে এছআইটিয়ে। এই চাৰি অভিযুক্তৰ অন্যতম হ’ল সোনমৰ প্ৰেমিক ৰাজ কুশৱাহা। আন তিনি অভিযুক্ত হ’ল আকাশ ৰাজপুত, আনন্দ কুর্মী আৰু বিশাল সিং চৌহান। আটাইকেইজনক ভাৰতীয় ন্যাস সংহিতাৰ ১০৩ (১, হত্যা), ২৩৮ (ক, অপৰাধৰ সাক্ষ্য-প্রমাণ লুকুওৱা) আৰু ৬১ (২, অপৰাধ ষড়যন্ত্র) ধাৰাত অভিযুক্ত কৰা হৈছে।
উল্লেখ্য যে যোৱা মে’ত মেঘালয়লৈ মধুচন্দ্রিকা কটাবলৈ অহাৰ সময়ত যোৱা ২৩ মে’ত ৰাজা ৰঘুবংশী হত্যাৰ বলি হয়। ইয়াৰ পূৰ্বে যোৱা ১১ মে’ত ২৪ বছৰীয়া সোনমৰ স’তে ২৯ বছৰীয়া ৰাজা বিবাহপাশত আবদ্ধ হয়। এই গোচৰ সম্পৰ্কত পূব খাচী পাহাৰ জিলাৰ আৰক্ষী অধীক্ষক বিবেক ছিয়েমে কয় যে গোচৰটোৰ আৰু তিনিজন অভিযুক্তৰ বিৰুদ্ধে এক পৰিপূৰক অভিযোগনামা দাখিলৰ প্ৰস্তুতি চলাই আছে তদন্তকাৰী গোটে।
হত্যাকাণ্ডটোৰ ফৰেনচিক পৰীক্ষাৰ প্ৰতিবেদন প্রকাশৰ পাছতে এই পৰিপূৰক অভিযোগনামা আদালতত দাখিল কৰা হ’ব বুলি আৰক্ষী অধীক্ষক ছিয়েমে জনায়। তেওঁ জনোৱা মতে, এই তিনি অভিযুক্ত হ’ল স্থাৱৰ সম্পত্তি ব্যৱসায়ী ছিল’ম জেমছ, লোকেন্দ্ৰ টোমৰ আৰু বলবীৰ আহিৰবাৰ। ৰাজাক হত্যা কৰাৰ পাছত সোনমে যিটো অট্টালিকাত আশ্রয় লয়, সেই অট্টালিকাৰ গৰাকী হৈছে টোমৰ।
আনহাতে, আহিৰবাৰ হৈছে সুৰক্ষা কৰ্মী। অপৰাধৰ সাক্ষ্য প্রমাণ গোপন কৰা আৰু ধ্বংস কৰাৰ অভিযোগত ইতিমধ্যে তিনিওকে তদন্তকাৰীয়ে গ্ৰেপ্তাৰ কৰিছে। সম্প্রতি তিনিও জামিনত আছে।
উল্লেখ্য যে সোনম আৰু ৰাজা দুয়োৰে ঘৰ মধ্য প্ৰদেশৰ ইন্দোৰত। আৰক্ষীৰ মতে, ৰাজাৰ স’তে বিবাহপাশত আবদ্ধ হোৱাৰ পূৰ্বৰে পৰা সোনমৰ গোপন সম্পর্ক আছিল ৰাজাৰ স’তে। সোনমৰ পৰিয়ালৰ আচবাবৰ প্ৰতিষ্ঠানত ৰাজে গাণনিকৰ কাম কৰিছিল।
বিয়াৰ পাছতে ৰাজা আৰু সোনমে মধুচন্দ্ৰিকাৰ বাবে ইন্দোৰৰ পৰা মেঘালয়লৈ বুলি আহে। পাছত ২৩ মে’ত দুয়ো ৰহস্যজনকভাবে সন্ধানহীন হয়। ইয়াৰ কেইঘণ্টামান পূর্বে মেঘালয়ৰ নংগ্রিয়াত গাঁৱৰ এটা হোমষ্টেৰ পৰা ওলাই আহিছিল।
পাছত যোৱা দুই জুনত নংগ্রিয়াত গাঁৱৰ পৰা ২০ কিলোমিটাৰ দূৰৈত ৰাজাৰ মৃতদেহ উদ্ধাৰ হয়। তেতিয়ালৈ সোনমৰ সন্ধান ওলোৱা নাছিল। দুয়োৰে সন্ধানত ছোহৰা আৰক্ষীৰ উপৰি বিশেষ তদন্তকাৰী গোট, ৰাষ্ট্ৰীয় দুর্যোগ প্রশমন বাহিনী (এনডিআৰএফ), ৰাজ্যিক দুর্যোগ প্রশমন বাহিনী (এছডিআৰএফ), পৰ্বতাৰোহণকাৰী দল আৰু স্থানীয় লোকেও ব্যাপক অভিযান চলায়।
অৱশেষত যোৱা দুই জুনত ছোহৰাৰ বিখ্যাত ৱেই ছাওদং জলপ্রপাতৰ ওচৰৰ এটা দ খাৱৈত ৰাজাৰ মৃতদেহ উদ্ধাৰ হয়। অভিযোগ অনুসৰি প্ৰেমিক ৰাজাৰ স’তে মিলি সোনমে তিনি ভাড়াতীয়া ঘাতক আকাশ, আনন্দ আৰু বিশালক বুজন অংকৰ ধনৰ বিনিময়ত নিয়োগ কৰি ৰাজাক হত্যা কৰোৱায়।
তাৰ পাছতে সোনমে নাটক ৰচনা কৰি আৰক্ষীক বিপথে পৰিচালিত কৰাৰ অপচেষ্টা কৰে। অৱশ্যে মূৰকত তেওঁ ব্যর্থ হয়। আনহাতে, ৰাজা মেঘালয়ৰ স্থানীয় লোকৰ দ্বাৰা হত্যাৰ বলি হয় বুলি দেশজুৰি একাংশই ভিত্তিহীন প্ৰচাৰ চলায়। তাকে লৈ একাংশই সামাজিক মাধ্যমত অনর্থক হৈ চৈ কৰি থকাৰ সময়তে যোৱা আঠ জুনত উত্তৰ প্ৰদেশৰ ঘাজিপুৰত সোনমে আত্মপ্রকাশ কৰে।
পৰৱৰ্তী সময়ত তেওঁ নন্দগঞ্জ আৰক্ষী থানাত আত্মসমর্পণ কৰে। ইয়াৰ কেইঘণ্টামান পূৰ্বে আৰক্ষীয়ে ৰাজা হত্যাৰ আন তিনি অভিযুক্ত ক্রমে আকাশ, বিশাল আৰু আনন্দক উত্তৰ প্ৰদেশ, ইন্দোৰ আৰু সাগৰ নগৰ (মধ্য প্রদেশ)ৰ পৰা গ্ৰেপ্তাৰ কৰে। পাছত আৰক্ষীয়ে সোনমৰ প্ৰেমিক ৰাজক গ্ৰেপ্তাৰ কৰে। সূত্ৰই জনোৱা মতে, গ্ৰেপ্তাৰৰ পাছত যোৱা ১১ জুনত সোনমে স্বামীক হত্যা কৰাৰ কথা স্বীকাৰ কৰে।
তাৰ পাছতে তেওঁৰ ভ্ৰাতৃ গোবিন্দই দাবী কৰে যে সোনমৰ স’তে তেওঁৰ পৰিয়ালে সকলো সম্পর্ক ছিন্ন কৰিছে। তদুপৰি ন্যায় লাভত ৰাজাৰ শোকসন্তপ্ত পৰিয়ালক সহায় কৰাৰ প্ৰতিশ্ৰুতিও গোবিন্দই দিয়ে।
সোনমসহ পাঁচ অভিযুক্তক ফাঁচি দিয়াৰ দাবী ৰাজাৰ পৰিয়ালৰ
তথ্য প্রমাণসহ মেঘালয় আৰক্ষীয়ে আদালতত ৰাজা হত্যাকাণ্ডৰ অভিযোগনামা দাখিল কৰাৰ পাছতে তেওঁৰ পৰিয়ালে সোনমক ফাঁচি দিয়াৰ দাবী উত্থাপন কৰিছে। এই সম্পৰ্কত ৰাজাৰ জ্যেষ্ঠ ভ্রাতৃ বিপিন ৰঘুবংশীয়ে কয়, ‘মোৰ পৰিয়ালৰ মাথোঁ এটাই দাবী আছে। সেয়া হ’ল সোনম আৰু ৰাজসহ পাঁচ অভিযুক্তক মৃত্যুদণ্ড বিহিব লাগে।’
মেঘালয় আৰক্ষীৰ তদন্তত সন্তুষ্টি প্রকাশ কৰি তেওঁ আশা প্রকাশ কৰে যে অভিযুক্তকেইজনৰ বিৰুদ্ধে আৰোপ কৰা ধাৰাসমূহ শক্তিশালী। অৱশ্যে অভিযোগনামাৰ সবিশেষ তথ্য দেখা নাই বুলিও ৰঘুবংশীয়ে জনায়। আনহাতে, সোনমৰ ভ্ৰাতৃ গোবিন্দই নিজা ব্যৱসায়িক স্বার্থক সুৰক্ষা দিয়াৰ স্বাৰ্থত মিছা মাতিছে বুলিও ৰঘুবংশীয়ে অভিযোগ উত্থাপন কৰে।
তেওঁ কয়, ‘গোবিন্দই কৈছে যে তেওঁ আমাৰ পৰিয়ালৰ স’তে আছে; কিন্তু আমি জানিব পাৰিছো যে তেওঁ সোনমৰ বাবে এজন অধিবক্তা নিয়োগ কৰিছে।’ ইতিমধ্যে তেওঁৰ পৰিয়ালেও গোচৰটো চলাই নিবলৈ অধিবক্তাৰ ব্যৱস্থা কৰা বুলিও ৰঘুবংশীয়ে জানিবলৈ দিয়ে।