V-P election:✒️কোন হ’ব দেশৰ পৰৱৰ্তী উপ-ৰাষ্ট্ৰপতি? আজি ভোট গ্ৰহণৰ পূৰ্বে ইয়াকে লৈ হিচাপ-নিকাচ আৰম্ভ হৈছে। জগদীপ ধনখড়ৰ আকস্মিক পদত্যাগৰ পাছত উপ-ৰাষ্ট্ৰপতি নির্বাচনক লৈ ৰাজনৈতিক বতাহ গৰম হৈছে।
একাংশ বিশ্লেষকে দাবী কৰে যে সংখ্যাবলৰ বাবেই বিজেপি নেতৃত্বাধীন এনডিএৰ প্ৰাৰ্থীৰ জয়ৰ পূর্ণ সম্ভাবনা আছে যদিও পূৰ্বৰ তুলনাত বিৰোধী প্রার্থীৰে ব্যৱধান হ্রাস পাব। বৃহৎ ব্যৱধানত এইবাৰ শাসক পক্ষৰ প্ৰাৰ্থী বিজয়ী হোৱাৰ সম্ভাৱনা হ্রাস পাইছে বুলি চর্চা চলিছে।
সেয়েহে এনডিএৰ প্রতিটো গোট নিশ্চিত কৰিবলৈ শাসকপক্ষ সতর্ক হৈছে।সংসদৰ প্ৰতিনিধিয়ে গোপন বেলেটৰ জৰিয়তে উপ-ৰাষ্ট্ৰপতি নির্বাচন কৰে। ইয়াৰ অৰ্থ হৈছে সাংসদসকলে নিজ ইচ্ছা অনুসৰি, ভোট দিব পাৰে। অৱশ্যে পৰম্পৰাগত কথা অনুসবি, দলীয় নির্দেশ অনুসৰিয়েই ভোট দিয়ে যদিও ‘ক্রছ ভোটিং’ এক সাধাৰণ বিষয়।
উদাহৰণ স্বৰূপে ২০২২ত তিনিটা দশকৰ পাছত বৃহৎ বিজয় লাভ কৰিছিল ধনখড়ে। ইয়াৰ আঁৰত আছিল বিৰোধী পক্ষৰ পৰা অহা ভোট। অন্ধ্রপ্রদেশৰ প্রাক্তন মুখ্যমন্ত্রী জগন বেড্ডীৰ বাইআৰএছ কংগ্ৰেছ আৰু ওড়িছাৰ মুখ্যমন্ত্রী নবীন পাটনায়কৰ বিজু জনতা দলৰ সমর্থন লাভ কৰিছিল ধনখড়ে। প্রায় ৭৫ শতাংশ ভোট তেওঁ লাভ কৰিছিল। এইবাৰো এনে কাণ্ড সংঘটিত হ’ব বুলি চর্চা আছে।
নম্বৰৰ খেল: বিজেপি
সম্প্রতি ৰাজ্যসভাৰ সাংসদৰ সংখ্যা ২৩৯ আৰু লোকসভাত ৭১। অৱশ্যে ওড়িছাৰ প্ৰাক্তন মুখ্যমন্ত্রী নবীন পাটনায়কৰ বিজেডি আৰু তেলেংগানাৰ চন্দ্ৰশেখৰ ৰাৱৰ বিআৰএছ ভোটদানৰ পৰা বিৰত থাকিব বুলি নিশ্চিত হোৱাত মুঠ ভোটদানকাৰী সাংসদৰ সংখ্যা ৭৭০লৈ হ্রাস পাব আৰু বিজয়ী প্রার্থীয়ে লাভ কৰিব লাগিব ৩৮৬টা ভোট।
মনকৰিবলগীয়া যে এনডিএৰ আছে ৪২৫জন সাংসদ। এই দিশলৈ চাবলৈ গ’লে বিজেপিৰ প্রার্থী মহাৰাষ্ট্ৰৰ ৰাজ্যপাল চি পি ৰাধাকৃষ্ণণ নিশ্চিতভাবে বিজয়ী হ’ব লাগে। শাসক দলে জগন বেড্ডীৰ বাইএছআৰ কংগ্ৰেছৰ ১১জন সাংসদৰ সমর্থন লাভ কৰিব বুলিও নিশ্চিত হৈ আছে। ইপিনে, বিআৰএছে কিয় বিৰত থাকিব বিচাৰিছে সেয়া এতিয়াও নিশ্চিত হোৱা নাই যদিও দলীয় কিছু আভ্যন্তৰীণ বিপৰ্যয়ৰ বাবে এনে সিদ্ধান্ত লোৱা বুলি ধাৰণা কৰা হৈছে।
ইতিমধ্যে বিজেপি আৰু কংগ্ৰেছৰ বিৰুদ্ধে স্থিতি গ্ৰহণ কৰি দলৰ মুৰব্বী কেচিআৰৰ কন্যা কে কবিতাই পদত্যাগ কৰিছে। তাকে লৈ দলৰ আভ্যন্তৰীণ বেমেজালি অব্যাহত আছে। আন এক চর্চা অনুসৰি, ৰাজ্যখনৰ জুবিলী হিল বিধানসভা সমষ্টিৰ আগন্তুক উপ-নির্বাচনৰ প্ৰতিও দৃষ্টি আছে বিআৰএছৰ।
এই সমষ্টিত মুছলমান ভোটাৰসকলে মুখ্য ভূমিকা পালন কৰে। একেদৰে বিজেডিয়ে শাসক পক্ষক সমর্থন দিব বুলি আশা কৰা হৈছিল যদিও বিগত বিধানসভা নির্বাচনত তেওঁক বুঢ়া আঙুলি দেখুওৱা বাবে দলৰ মুৰব্বী পাটনায়কে মুখ ঘূৰাইছে। যিয়ে নহওক কিয়, বিআৰএছ আৰু বিজেডিৰ সমর্থন অবিহনেও এনডিএৰ ভোট হ’ব ৪৩৬টা।
আন এক চর্চা অনুসৰি, আম আদমী পাৰ্টিৰ ৰাজ্যসভাৰ সাংসদ স্বাতী মালিবালে বিজেপিক সমর্থন দিব পাৰে। আপৰ মুৰব্বী অৰবিন্দ কেজৰিৱালৰ ঘনিষ্ঠ সহযোগীয়ে শাৰীৰিকভাবে নিগৃহীত কৰাৰ অভিযোগত দলৰ স’তে বিগত বৰ্ষৰ পৰাই সম্পর্ক ভাঙোন আৰম্ভ হৈছে মালিৱালৰ। তেওঁ বিজেপিত যোগ দিব বুলি অপপ্ৰচাৰ চলিছিল যদিও তেওঁ দলীয় পদৰ পৰা ইস্তফা দিয়া নাই। সেয়েহে মালিবালে বিজেপিক ভোট দিব পাৰে বুলিও অনুমান কৰা হৈছে।
ইয়াৰ উপৰি লোকসভাৰ সাতজন নির্দলীয় সাংসদে কাক ভোট দিব সেয়া নিশ্চিত নহয়। একেদৰে আকালী দল আৰু মিজোৰাম জেদপিএমৰ দুজনকৈ সাংসদৰ ভোটক লৈও অনিশ্চয়তা আছে। এনডিএ প্রার্থী ৰাধাকৃষ্ণণে যদি প্রতিটো প্রত্যাশিত ভোট লাভ কৰে তেন্তে তেওঁ লাভ কৰিব ৪৫৮টা। অথচ ধনখড়ে তিনি বছৰ পূৰ্বে ৫২৮টা ভোট লাভ কৰিছিল।
যিয়ে নহওক কিয় সম্মুখ সমৰত থিয় দিছে কংগ্রেছ নেতৃত্বাধীন ‘ইণ্ডিয়া’ মিত্রজোটৰ প্রার্থী বি সুদর্শন বেড্ডীয়ে। উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ বেড্ডীয়ে পূর্ণ সমর্থন আদায় কৰিব পাৰিলে ৩২৪টা ভোট লাভ কৰিব। ২০২২তকৈ এইবাৰৰ নিৰ্বাচন অধিক কঠিন হ’ব কিয়নো সম্প্রতি বিৰোধী শিবিৰত আছে পূৰ্বতকৈ অধিক সাংসদ।
বিগত বৰ্ষৰ লোকসভা নির্বাচনত বিৰোধীয়ে শক্তি অৰ্জন কৰিবলৈ সক্ষম হৈছে। অৱশ্যে বাস্তৱত বেড্ডী জয়ী হোৱাৰ এই মুহূৰ্তলৈ কোনো ৰেহৰূপ নাই। বিৰোধীৰ এশ শতাংশ সাংসদে ভোট দিলেও শাসকীয় প্রার্থীৰ পৰা কমেও এশ-১৩৫টা ভোটৰ ব্যৱধানত অবস্থান কৰিব ৰেষ্ট্ৰীয়ে। বিআৰএছ আৰু বিজেডিৰ সাংসদে যদি কিবা কাৰণত তেওঁক ভোট দিয়ে তথাপি বিজয়প্ৰাপ্তিৰ পৰা বিৰত থাকিব ৰেঙী।
মালিবাল আৰু নির্দলীয় সাংসদসকল আনকি বাইএছআৰ কংগ্ৰেছে ভোট দিলেও ৭০টা ভোটত পিছপৰি থাকিব ৰেঙী। ইপিনে, ৰাজ্যসভাত বিৰোধী শিবিৰৰ কমেও ১৫০টা ভোট লাভ কৰিব বুলি এনডিএৰ মাজত চর্চা চলিছে।
উল্লেখ্য যে উপ-ৰাষ্ট্ৰপতিৰ নিৰ্বাচন হ’ব নির্বাচন আয়োগৰ পৰ্যবেক্ষণত। আয়োগে নিয়োগ কৰিব ৰিটার্ণিং বিষয়া। প্রার্থীয়ে ২০জন প্রস্তাৱক আৰু ২০জন সমর্থক সাংসদৰ স্বাক্ষৰৰে দাখিল কৰিব পাৰিব বৈধ মনোনয়ন। ১৫ হেজাৰ টকাৰ আমানতৰ ধনো জমা দিব লাগিব।