Delhi:✒️ৰাজধানী দিল্লীত পুনৰ বোমাৰ আতংক। এইবাৰ মুখ্যমন্ত্ৰীৰ কাৰ্যালয় আৰু মৌলানা আজাদ চিকিৎসা মহাবিদ্যালয় উৰুৱাই দিয়াৰ ভাবুকি দি আহিছে এটা ইমেইল ।
দিল্লী আৰক্ষীয়ে জনোৱা মতে, অগ্নিনিৰ্বাপক বাহিনীৰ বিষয়াসকলে ফোনৰ লগতে ইমেইলতো ভাবুকি বাৰ্তা লাভ কৰিছে।
দিল্লী আৰক্ষীৰ সূত্ৰ অনুসৰি মুখ্যমন্ত্ৰীৰ কাৰ্যালয় আৰু মৌলানা আজাদ চিকিৎসা মহাবিদ্যালয় উৰুৱাই দিয়াৰ ভাবুকি ইমেইল পোৱাৰ পাছতে আৰক্ষীয়ে ব্যৱস্থা গ্ৰহণ কৰে।
দুয়োটা স্থানতে বোমা ধৰা পেলোৱা আৰু নিষ্কাশনকাৰী দল মোতায়েন কৰা হয়।
দিল্লীৰ অতিৰিক্ত আৰক্ষী উপ আয়ুক্ত (কেন্দ্ৰীয়), কমলা মাৰ্কেট থানা এলেকাৰ এচিপি আৰু আই পি এষ্টেট থানাৰ বিষয়াই মুখ্যমন্ত্ৰীৰ কাৰ্যালয়ত তদাৰক কৰে।
মৌলানা আজাদ চিকিৎসা মহাবিদ্যালয়ত অভিযান চলাই আই পি এষ্টেট থানাৰ অতিৰিক্ত যান-বাহন বিষয়াইও তদাৰক কৰে।
ভাবুকি ইমেইলত উল্লেখ কৰা দুয়োখন স্থানৰ লোকৰ সুৰক্ষা আৰু নিৰাপত্তা সুনিশ্চিত কৰাৰ বাবে আৰক্ষীয়ে উপযুক্ত ব্যৱস্থা গ্ৰহণ কৰিছে।
প্ৰথম অৱস্থাত অনুমান কৰা হয় যে আগৰ দৰে আজিৰ ইমেইলটোও ভুৱা। স্নিফাৰ ডগ আৰু টেকনিচিয়ানৰ এটা বিশেষ দলে মুখ্যমন্ত্ৰীৰ কাৰ্যালয়ৰ ভিতৰৰ অংশ পৰিদৰ্শন কৰিছে।
প্ৰৱেশ আৰু প্ৰস্থান পথ সুৰক্ষিত কৰা হৈছে। ভেৰিফিকেচনৰ পাছতহে মানুহক প্ৰৱেশৰ অনুমতি দিয়া হৈছে।