Narendra Modi:✒️প্ৰধানমন্ত্ৰী নৰেন্দ্ৰ মোডীৰ মাতৃৰ “অপমান”ৰ বিৰুদ্ধে কঠোৰ ব্যৱস্থা গ্ৰহণ কৰিছে পাটনা উচ্চ ন্যায়ালয়ে। কৃত্ৰিম বুদ্ধিমত্তা ব্যৱহাৰ কৰি ছ’চিয়েল মিডিয়াত প্ৰকাশিত মোডীৰ মাতৃৰ সকলো ভিডিঅ’ ডিলিট কৰিবলৈ বুধবাৰে আদালতে নিৰ্দেশ দিয়ে কংগ্ৰেছক।
শেহতীয়াকৈ বিহাৰ কংগ্ৰেছে এক্স হেণ্ডেলত এটা এ আই ভিডিঅ’ পোষ্ট কৰিছিল।
ইয়াৰ পাছতে প্ৰধানমন্ত্ৰী নৰেন্দ্ৰ মোডীৰ মাতৃৰ এআই ভিডিঅ’ৰ বিৰুদ্ধে পাটনা উচ্চ ন্যায়ালয়ত জনস্বাৰ্থৰ গোচৰ (পিআইএল) দাখিল কৰা হয়।
বুধবাৰে গোচৰৰ শুনানিৰ সময়ত পাটনা উচ্চ ন্যায়ালয়ৰ মুখ্য ন্যায়াধীশ পি বি বজন্তৰীয়ে কয় যে সংবিধানৰ ২১ নং অনুচ্ছেদৰ অধীনত গোপনীয়তা,এই ভিডিঅ’টোৱে আত্মসন্মানৰ দৰে মৌলিক অধিকাৰক হত্যা কৰে।
এনে ভিডিঅ’বোৰ অসন্মানজনক আৰু অপ্ৰীতিকৰ। গতিকে এনেধৰণৰ ভিডিও শীঘ্ৰে ছ’চিয়েল মিডিয়াৰ পৰা ডিলিট কৰিব লাগে। আৰু ভিডিঅ’টো যাতে আৰু অধিক প্ৰচাৰ নহয় তাৰ বাবে পদক্ষেপ ল’ব লাগে।
উল্লেখ্য যে,ভিডিঅ’টো ৰাজহুৱা হোৱাৰ পাছত বিজেপিয়ে প্রধানমন্ত্রীক ব্যক্তিগতভাৱে আক্রমণ কৰা বুলি অভিযোগ উত্থাপন কৰে৷ কোৱা হয় যে প্ৰধানমন্ত্ৰী মোদীয়ে সদায় ৰাজনীতিক নিজৰ ব্যক্তিগত জীৱনৰ পৰা পৃথক কৰি ৰাখি ভাল পায়।
তেওঁৰ মাতৃক এনেদৰে আক্ৰমণ কৰিলে সমগ্ৰ দেশকে বিভ্ৰান্ত কৰাই নহয়, দেশৰ সকলো মাতৃ-ভগ্নীকে অপমান কৰা হয়। প্ৰধানমন্ত্ৰীয়ে নিজেই জনাইছিল,মোৰ মাৰ ৰাজনীতিৰ লগত কোনো সম্পৰ্ক নাই।
গতিকে তেওঁক বাৰে বাৰে কিয় টানি অনা হৈছে? ওলোটাই কংগ্ৰেছৰ ছ’চিয়েল মিডিয়া চেলৰ মুৰব্বী পৱন খেৰাই কয়, “এগৰাকী মাতৃয়ে নিজৰ সন্তানক ভাল শিক্ষা দি আছে। তাত কি অপমান কৰিবলৈ আছে?” তীব্ৰ বিতৰ্কৰ অন্তত এই বিষয়ত এতিয়া উচ্চ ন্যায়ালয়ে ব্যৱস্থা গ্ৰহণ কৰিছে।