Sportsmen Zubeen Garg:
কেৱল সংগীতৰ সাধনাতে নিজকে আবদ্ধ কৰি ৰখা নাছিল জুবিন গার্গে। সামাজিক ক্ষেত্রলৈও তেওঁ বিভিন্ন দিশেৰে সহায়-সহযোগিতা আগবঢ়াইছিল। অভাৱগ্রস্ত শিল্পীকে ধৰি সাধাৰণ লোকক সহযোগিতাৰ বাবে তেওঁৰ নিজৰ উপাৰ্জনৰ ধন দান কৰিছিল। তাৰ লগতে তেওঁ গঠন কৰিছিল তেওঁৰ প্ৰিয় ব্যক্তি বিষ্ণুপ্ৰসাদ ৰাভাৰ সোঁৱৰণত ‘কলাগুৰু আর্টিষ্ট ফাউণ্ডেছন’। এই ন্যাসৰ বাবে পুঁজি সংগ্ৰহ কৰিবলৈ তেওঁ প্ৰধানকৈ আলম কৰি লৈছিল প্রিয় খেল ফুটবলক। অসমত ফুটবলক জনপ্ৰিয়কৰণতো জুবিন গার্গে যৎপৰোনাস্তি চেষ্টা চলাইছিল। জুবিন গাৰ্গ ফেন ক্লাবৰ লগতে তেওঁৰ অনুৰাগীৰ সহযোগত নগৰ আৰু গ্রামাঞ্চলত সাহায্যমূলক ফুটবল খেল অনুষ্ঠিত কৰিছিল।
ইয়াৰ বাবে ‘কলাগুৰু-১১’ নামেৰে নিজেও এটা ফুটবল দল গঠন কৰিছিল। এই খেলৰ জৰিয়তে যি উপার্জন হৈছিল সেয়া কলাগুৰু ফাউণ্ডেছনৰ জৰিয়তে আর্থিক দুৰৱস্থাত ভোগা শিল্পীক সাহায্য হিচাপে আগবঢ়াইছিল। কলাগুৰু তেওঁৰ বাবে আছিল আদর্শ। সেই নামেৰে গঠন কৰা কলাগুৰু আৰ্টিষ্ট ফাউণ্ডেছনৰ উদ্যোগত সংগীত মহোৎসৱো অনুষ্ঠিত হৈ আহিছে। এই মহোৎসৱৰ জৰিয়তে থলুৱা কৃষ্টি-সংস্কৃতিৰ প্ৰসাৰতো অগ্ৰাধিকাৰ দিয়া হৈছিল। দুখীয়া শিল্পীক সাহায্য দিয়াৰ উপৰি বান সাহায্যও আগবঢ়াই আহিছে এই ফাউণ্ডেছনে। এই সকলোৰে মূল আধাৰ কৰি লৈছিল ফুটবল।
এনে খেলবোৰত জুবিন গার্গে নিজেও ভাগ লৈছিল। কলাগুৰু ফাউণ্ডেছনৰ প্ৰসাৰ কৰিবলৈ বিভিন্ন জিলাত ইয়াৰ শাখা গঠন কৰা হৈছে। এই শাখাবোৰৰ উদ্যোগত প্ৰতি বছৰে কলাগুৰু মহোৎসৱ জিলাই জিলাই অনুষ্ঠিত হৈ আহিছে।
প্রসংগক্রমে উল্লেখ্য যে এক উদাৰমনা ব্যক্তিত্বৰ অধিকাৰী জুবিন গাৰ্গৰ গুৱাহাটীৰ বাসভৱনৰ সন্মুখত বহু লোক। তেওঁলোকৰ একাংশ আহে হিয়াৰ আমঠু শিল্পীগৰাকীক এবাৰ কাষত পাবলৈ। একাংশ আহে বিভিন্ন ধৰণৰ সহায়-সহযোগিতা বিচাৰি। জুবিন গাৰ্গ তেওঁলোকৰ বাবে ভগৱান স্বৰূপ। কাকো কেতিয়াও নিৰাশ নকৰা জুবিনে সেইসকলক পার্যমানে সকলো দিশেৰে সহায় কৰে। তেনে লোকক সহায় কৰি নিজৰে হাতত কেতিয়াবা অৰ্থৰ অভাৱ হয়। আজি সেই সকলোৱে হিয়া ঢাকুৰি কান্দিছে।