Zubeen Garg:✒️অসমৰ প্ৰাণৰ শিল্পী জুবিন গাৰ্গৰ আকস্মিক তথা অকাল বিয়োগক লৈ সমগ্ৰ ৰাজ্য শোকত দগ্ধ। বুধবাৰৰ পৰা স্বাভাৱিক জীৱন যাত্ৰা আৰম্ভ হ’লেও ক’ৰবাত যেন নাই পূৰ্বৰ প্ৰাণচাঞ্চল্য। ঠিক তেনে পৰিবেশতে সময় পাৰ কৰিছে মহানগৰীৰ কাহিলীপাৰাৰ ভগদত্তপুৰৰ পদপথৰ ক্ষুদ্ৰ ব্যৱসায়ী মনোজ দাসে।
একান্ত বাধ্যত পৰিহে আজি তেওঁ চাহ-বিস্কুট, পুৰী, ৰুটি, তৰকাৰী আদি বিক্ৰী কৰা দোকানখন খুলিছে। তেওঁৰ দোকানলৈ গ্রাহকৰো আগমন ঘটিছে। অথচ ক’ৰবাত কিবা এটা তেওঁ হেৰুৱাইছে আৰু সেইবাবে নাই স্বাভাৱিক গতিশীলতা। জুবিন গাৰ্গৰ লগত মনোজ দাসৰ আছিল বিশেষ সম্পর্ক।
ভগদত্তপুৰৰ যিটো এপার্টমেণ্টৰ ফ্লেটত হিয়াৰ আমঠু শিল্পীগৰাকীয়ে বাস কৰিছিল, তাৰ প্ৰৱেশ পথৰ সন্মুখতে দাসৰ সাধাৰণ এই দোকানখন। ঘৰত থকা সময়ত পুৱাৰ পৰা নিশালৈকে দিনটোৰ কোনোবা নহয় কোনোবা সময়ত জুবিন গাৰ্গ তেওঁৰ দোকানখনলৈ আহিছিল। ইমান জনপ্রিয়, ইমান প্রভাৱশালী শিল্পী, অথচ সাধাৰণ মানুহৰ লগত জুবিনৰ আছিল হৃদয়ৰ পৰা হৃদয়লৈ সম্পর্ক। জুবিনৰ ওচৰত মনোজ দাসৰ নামটো হেৰাই গৈছিল। জুবিনে তেওঁৰ নাম দিছিল ডেকা।
‘ঐ ডেকা, চাধা অকণ দেচোন’- ধহমহকৈ দোকানলৈ সোমাই আহি এনেদৰে মৰমভৰা আদেশ দিছিল জুবিনে। আজি সেই সুৰ বিচাৰি হাইৰাণ হৈছে মনোজ দাস। কেৱল চাধাই নহয়, পুৰি-তৰকাৰীৰো সোৱাদ প্ৰায়ে লৈছিল। দোকানখনত যি দুযোৰ ডেস্ক-বেঞ্চ আছে, সেয়াও জুবিনেই দিছিল। জুবিন গাৰ্গ মনোজ দাসৰ বাবে গ্রাহক নাছিল, আছিল এক মানৱতাদৰদী সত্তা।
সেই কথা সুঁৱৰি বৰপেটা চহৰৰ ইচ্ছাপুৰহাটীৰ বাসিন্দা তথা বর্তমান গুৱাহাটীতে স্থায়ীভাৱে থকা দাসে কয়, ‘ইমান ডাঙৰ শিল্পী, ইমান জনপ্রিয় শিল্পী; অথচ আমাৰ দৰে মানুহৰ লগত তেওঁৰ যি সম্পৰ্ক আছিল, সেয়া আজিৰ দিনত দুর্লভ। মোৰ ভাগ্য যে তেনে এজন মানুহে নিজে আমাক আপোন কৰি লৈছিল। সেই কাৰণেই জুবিন গাৰ্গ আমাৰ দৰে সাধাৰণ মানুহৰ অন্তৰত চিৰদিন ৰৈ যাব। তেওঁক হেৰুৱাই কিমান শোক পাইছো, তাক প্রকাশ কৰিব নোৱাৰো।’
দাসে লগতে কয় যে তেওঁ আমাৰ দৰে মানুহৰ অভাৱ-অনাটনৰো খবৰ ৰাখিছিল। সেই কাৰণে সামান্য পৰিমাণৰ চাধা এপালি হাতৰ পৰা লোৱাৰ লগতে কেতিয়াবা দুই-তিনি হেজাৰ টকা হাতত গুজি দিছিল। ‘এইখিনি ৰাখ’-বুলি কৈ কিবা অসুবিধা হ’লে জনাবলৈয়ো কৈ যায়। আনকি দোকান কেতিয়াবা কিবা কাৰণত বন্ধ থাকিলেও খবৰ লয়। দাসে কয় যে কেৱল তেৱেই নহয়, ওচৰ-পাঁজৰৰ সাধাৰণ উপাৰ্জনৰ মানুহবোৰকো একেদৰেই সহায় কৰিছিল জুবিনে। এবাৰ কেইজনমান লোকে দাসৰ দোকানখন ভাঙিবলৈ চেষ্টা কৰিছিল। জুবিন গার্গে যেতিয়া কথাটো গম পাইছিল, তেতিয়া সাহস দি কৈছিল- ‘কোনে তোৰ দোকান ভাঙে? মোৰ কথা কৈ দিবি যা!’
প্ৰতি বছৰে পূজাত জুবিনে দাসক পইচা দিছিল। এইবাৰো পূজা আহিছে। পইচা দিয়া মানুহজন যে নোহোৱা হ’ল, সেইটো কথা নহয়! এজন যে প্রকৃত মানুহ পৃথিৱীৰ পৰা হেৰাই গ’ল, তাকে লৈ মনোজ দাস আৰু তেওঁৰ পৰিয়াল বেদনাদগ্ধ।