Scuba diving:✒️সাধাৰণতে পর্যটকে সমুদ্র গৰ্ভৰ সৌন্দর্য উপভোগ কৰি ভাল পায়। গতিকে এই দুঃসাহসিক ক্রীড়া বহুতৰে পছন্দৰ। লক্ষ্যণীয় যে পর্যটকসকলক আকৰ্ষণ কৰিবলৈ সমুদ্রতীৰবৰ্তী পর্যটন কেন্দ্রসমূহত স্কুবা ডাইভিঙৰ ব্যৱস্থা কৰা হয়। ইয়াৰ স’তে বিভিন্ন সংস্থা জড়িত থাকে। ভাৰতৰ আন্দামান স্কুবা ডাইভিঙৰ বাবে বিখ্যাত।
একেদৰে লাক্ষাদ্বীপ, গোৱা, পুডুচেৰী, কেৰালাৰ কোভালমো – স্কুবা ডাইভিঙৰ বাবে জনপ্রিয়। কিন্তু স্কুবা ডাইভিঙৰ সময়ত অপ্রত্যাশিত দুর্ঘটনা এৰাই চলাৰ বাবে নিম্নোক্ত পাঁচটা কথা মানি চলা উচিত বুলি বিশেষজ্ঞ তথা অভিজ্ঞসকলে কয়।
ক) প্রশিক্ষক বা গাইডৰ সহায় লওক: স্কুবা ডাইভিঙৰ সময়ত প্রশিক্ষক বা গাইড থাকে। নিজে কেতিয়াও পানীত নমা উচিত নহয়। কাৰণ সমুদ্র গর্ভত নানা অজানা বিপদ লুকাই থাকিব পাৰে। গতিকে গাইড বা প্রশিক্ষক থাকিলে সুৰক্ষিত হ’ব পাৰে।
খ) সংস্থা নির্বাচন: জনপ্রিয় পর্যটন কেন্দ্রসমূহত একাধিক স্কুবা ডাইভিং সংস্থা থাকে। গতিকে স্কুবা ডাইভিঙৰ সময়ত এনে এটা সংস্থাৰ পৰামৰ্শ গ্রহণ কৰিব। আপোনাৰ গাইড অভিজ্ঞ হয় নে নহয় সেই কথা স্থানীয় লোকে জানিব। গতিকে গাইড বা স্কুবা ডাইভিং সংস্থা নির্বাচনৰ ক্ষেত্ৰত স্থানীয় লোকৰ পৰামর্শ গ্রহণ কৰিব। তেতিয়া বিপদৰ আশংকা কম থাকে।
গ) শাৰীৰিক সমস্যা: গভীৰ পানীত স্কুবা ডাইভিঙৰ সময়ত অক্সিজেন ব্যৱহাৰ কৰা হয়। কিন্তু বাম পানীত স্কুবা ডাইভিঙৰ সময়ত বহুতে অক্সিজেন ব্যৱহাৰ নকৰে। এই ক্ষেত্রত শ্বাস-প্রশ্বাসৰ ব্যায়াম জনা থাকিলে সহায় হয়। কাৰণ দেহে নির্দিষ্ট পৰিমাণৰ অক্সিজেন ধৰি ৰাখিব পাৰে। তদুপৰি সাঁতুৰি থকাৰ সময়ত কাণত পানী সোমাব পাৰে। শ্বাস-প্রশ্বাসৰ ব্যায়াম জানিলে এই সমস্যা হ্রাস পায়।
ঘ) সাঁতোৰঃ বিশ্বৰ বহু দেশত সাঁতুৰিব নজনা লোকক স্কুবা ডাইভিং কৰিবলৈ দিয়া নহয়। কেৱল সাঁতুৰিব জনাসকলকহে এই দুঃসাহসিক ক্রীড়াত অংশ ল’বলৈ দিয়া হয়।
ঙ) পানীত নমাৰ সময়: সমুদ্ৰৰ নিজা নীতি বা ব্যাকৰণ আছে বুলি কোৱা হয়। সমুদ্রত জোৱাৰভাটা এক স্বাভাৱিক ঘটনা। গতিকে আত্মবিশ্বাস দৃঢ় হ’লেও স্থানীয় লোকৰ পৰামৰ্শ অবিহনে স্কুবা ডাইভিং কৰা অনুচিত। নির্জন স্থানত সমুদ্ৰৰ পানীত নমাটো বিপজ্জনক। কাৰণ বিপদত পৰিলে উদ্ধাৰ কৰিবলৈ কোনো নাথাকে।
আনহাতে, স্কুবা ডাইভিং সম্পর্কত এজন অভিনেতাই কয়, ‘সকলো দুঃসাহসিক ক্রীড়াৰ নিৰ্দিষ্ট কিছুমান নিয়ম থাকে। সেই নিয়মসমূহ মানি চলিলে কোনো সমস্যা নহয়।’
নিয়মিতভাৱে শৰীৰ চৰ্চা কৰিলে স্কুবা ডাইভিঙৰ দৰে অভিযানমূলক তথা দুঃসাহসিক ক্রীড়াত সমস্যাৰ সন্মুখীন হ’ব নালাগে বুলি তেওঁ মতপোষণ কৰে।