Cid Inquiry:
অসমবাসীৰ হিয়াৰ আমঠু জুবিন গাৰ্গৰ ৰহস্যজনক মৃত্যুৰ তদন্ত কৰি থকা চিআইডিৰ এছআইটিয়ে ইতিমধ্যে গোচৰ ৰজু কৰি ক্ষীপ্ৰতাৰে তদন্ত অব্যাহত ৰখাৰ মাজতে ছিংগাপুৰত অনুষ্ঠিত নৰ্থ ইষ্ট ফেষ্টিভেলত অংশ লোৱা দুই সাংবাদিককো তলব কৰা হয় চিআইডি হেড কোৱাৰ্টাৰলৈ। সাংবাদিক দুগৰাকী হ’ল বৈদ্যুতিন সংবাদ সন্থা ‘প্ৰথম খবৰ’ ৰ মুখ্য সম্পাদক প্ৰনয় বৰদলৈ আৰু ডিৱাই ৩৬৫ ৰ দিল্লীত কৰ্মৰত সাংবাদিক স্বাৰম্বত গোস্বামী ৷
শনিবাৰে পুৱাভাগত সাক্ষ্যদানৰ বাবে চিআইডিৰ কাৰ্যালয়ত উপস্থিত হয় ডিৱাই ৩৬৫ ৰ দিল্লীস্থ সাংবাদিক স্বাৰম্বত গোস্বামী ৷ গোস্বামীয়ে জুবিনৰ মৃত্যুৰ খবৰ লাভ কৰি বাতৰি সংগ্ৰহৰ বাবে ছিংগাপুৰলৈ গৈছিল ৷ চিকিৎসালয়ত জুবিনৰ মেনেজাৰ সিদ্ধাৰ্থ শৰ্মাৰ অভব্য আচৰণৰ সন্মুখীন হৈছিল সাংবাদিকজন। জেনেৰেল হাস্পতালত থকা সময়ত কি কি ঘটিছিল সমস্ত বিষয় সন্দৰ্ভত এছ আইটিয়ে সোধাপোচা কৰিব ৷
মনকৰিবলগীয়া যে, জুবিন গাৰ্গৰ মৃত্যুক লৈ অসম উত্তাল হৈ থকাৰ সময়তে গোস্বামীয়ে আত্মপক্ষ সমর্থন কৰিব পৰাকৈ শ্যামকানু মহন্তৰ সাক্ষাৎকাৰ লৈ প্ৰচাৰো কৰিছিল ৷