Tezpur:
এক সোণালী ইতিহাস সম্বলিত কোচ ৰাজবংশী এক পৰিয়ালৰ এটা পাঁচশ বছৰীয়া ইতিহাসৰ এক দলিল পৰিয়ালটোৰ উত্তৰ পুৰুষৰ দুজন সদস্যৰ হাতত তুলি দিয়া হয় ।
উল্লেখ্য যে মান্দাই কোচ হিচাপে স্বকীয় ভাষা-সংস্কৃতিৰে সমৃদ্ধ ৰাজ্যৰ অন্যতম ভূমিপুত্র এই জনগোষ্ঠীটোৱে কৰি অতিজৰে পৰা দেৱাদিদেৱ শিৱ আৰু কামাখ্যাক পূজা কৰি আহিছে। এইবাৰ শাৰদীয় দুর্গা পূজাৰ স’তে সংগতি ৰাখি অল মান্দাই পিপলছ এছ’চিয়েছনৰ সভাপতি প্রতাপ বর্মন উপস্থিত হয়হি তেজপুৰত। তেজপুৰৰ মহাজাতি চৌহদত উপস্থিত হৈ তেওঁ প্রয়াত সাংসদ ড:পূর্ণ নাৰায়ণ সিংহৰ ৰাজনৈতিক, সামাজিক তথা মহাজাতিৰ দৰে এখন জনপ্ৰিয় কাকতৰ জৰিয়তে ৰাজ্যৰ ভাষা- সাহিত্য ক্ষেত্রলৈ আগবঢ়োৱা অৱদানৰ বিষয়ে স্মৰণ কৰাৰ লগতে কাকতখনৰ জৰিয়তে বহু সংখ্যক সাংবাদিক-লেখক জন্ম দিয়াত কেনে গুৰুত্বপূৰ্ণ ভূমিকা পালন কৰিছিল সেই বিষয়েও আলোচনা কৰে। তেওঁ প্রয়াত ড° সিংহক এগৰাকী কিংবদন্তি পুৰুষ আখ্যা দি তেওঁৰ পৰিয়ালৰ বৰ্তমানৰ সদস্যসকলো সমাজ জীৱনৰ স’তে জড়িত থাকি বিভিন্ন কামত ব্যস্ত থকাটো আশাৰ বতৰা বুলিও কয়।
উল্লেখ্য যে বিশেষ সংগঠনটোৱে সম্প্রতি দেশৰ উত্তৰ-পূৰ্বাঞ্চলত জনগোষ্ঠীটোৰ অৱস্থিতি সন্দৰ্ভত কৰি থকা কামৰ বিষয়ে উল্লেখ কৰাৰ লগতে প্রয়াত সাংসদজনৰ কন্যা ৰঞ্জিতা সিংহ দত্ত আৰু পুত্ৰ ড:পৰশমণি সিংহক তেওঁলোকৰ পৰিয়ালৰ পাঁচশ বছৰীয়া তথা ১০টা প্ৰজন্মৰ এখন নথি প্ৰমাণপত্ৰ পৰিয়ালটোক এক সন্মান হিচাপে প্ৰদান কৰে।
উল্লেখ্য যে এই নথিত ১৫২৬ৰ পৰা হৰি নাৰায়ণ আৰু পৰৱৰ্তী সময়ত কীর্তি নাৰায়ণ, প্রতাপ নাৰায়ণ, বল নাৰায়ণ, কমল নাৰায়ণ, হংস নাৰায়ণ, ৰীতিমন সিংহ, কিৰীটিমন সিংহ, কামান সিংহ আৰু ড° পূর্ণ নাৰায়ণ সিংহৰ নাম উল্লেখ আছে। এই ঐতিহাসিক বংশ বৃক্ষৰ নাম সম্বলিত প্ৰমাপত্ৰখন লাভ কৰি প্ৰয়াত সাংসদ সিংহৰ পুত্ৰ আৰু কন্যাই কয় যে প্ৰতিটো পৰিয়ালে নিজা বংশবৃক্ষৰ ঐতিহ্য তথা ইতিহাস জনাটো প্রয়োজন যদিও বহু লোকেই এই বিষয়ে সচেতন নহয়। এনে অৱস্থাত তেওঁলোকৰ হাতত তেওঁলোকৰ উপৰি পুৰুষৰ ১০জনকৈ ব্যক্তিৰ নাম প্রায় পাঁচশ বছৰৰ অধিক পূৰ্বৰ পৰিচয়ৰ প্ৰমাণপত্ৰই মন প্রফুল্লিত কৰাৰ লগতে শিহৰিত কৰা বুলিও দুই ভ্রাতৃ-ভগ্নীয়ে মন্তব্য কৰে।
