AASU Protest : জুবিন গাৰ্গৰ ৰহস্যজনক মৃত্যুৰ ন্যায় প্ৰদানৰ দাবীত দীঘলীপুখুৰীপাৰত সদৌ কামৰূপ মহানগৰ জিলা ছাত্ৰ সন্থাৰ বিক্ষোভ কার্যসূচী

অসমীয়াৰ হিয়াৰ আমঠু জুবিন গাৰ্গৰ ৰহস্যজনক মৃত্যুৰ ন্যায় বিচাৰি আছুৱে আহ্বান জনোৱা অৱস্থান বিক্ষোভ কাৰ্যসূচী আজি মহানগৰীৰ দীঘলীপুখুৰীপাৰত সদৌ কামৰূপ মহানগৰ জিলা ছাত্ৰ সন্থাই ৰূপায়ন কৰে ৷ হাতে হাতে প্লে কাৰ্ডলৈ কে’বা শতাধিক আছু কৰ্মী সহ আছুৰ মুখ্য উপদেষ্টা ড:সমুজ্জ্বল কুমাৰ ভট্টাচার্য,সভাপতি উৎপল শৰ্মা ,সাধাৰণ সম্পাদক সমীৰণ ফুকনে বিক্ষোভ কাৰ্যসূচীত অংশ লয় ৷ আছুৰ মুখ্য উপদেষ্টা ড: ভট্টাচাৰ্যই কয়, জুবিন গাৰ্গৰ ৰহস্যজনক মৃত্যু ঘটনাৰ তদন্ত ক্ষিপ্ৰ আৰু পানী নসৰকা হোৱাৰ লগতে এখন কটকটীয়া চার্জশীট দিব লাগে ৷ আইনৰ সুৰুঙাৰে দোষীয়ে যাতে কোনোপধ্যেই সাৰি যাব নোৱাৰে ৷ একেদৰে জুবিন গার্গে ন্যায় পাব লাগিব, দোষীয়ে কঠোৰ শাস্তি পাব লাগিব৷ অসমীয়াৰ হিয়াৰ আমঠু গৰাকীয়ে ন্যায় নোপোৱালৈকে ক্ষান্ত নহয় আছু ৷

আনহাতে,আছুৰ বিক্ষোভত অংশগ্ৰহণ কৰা আছুৰ সভাপতিয়ে কয়,জুবিনক লৈ ৰাজনীতি কৰিলে সেইসকল ধ্বংস হৈ যাব’। জুবিন গাৰ্গ জীৱিত অৱস্থাত যিমান শক্তিশালী আছিল, বৰঞ্চ মৃত অৱস্থাত বেছি শক্তিশালী’। ‘আগ্নেয়গিৰিৰ লগত শাসক- বিৰোধীয়ে ৰাজনীতিৰ খেল নেখেলাটো ভাল’।