Chinmay Ranjan Dutta Memorial Artist Award-2025 has been announced :
ঘোষণা হ’ল ২০২৫ বৰ্ষৰ চিন্ময় ৰঞ্জন দত্ত সোঁৱৰণি শিল্পী বঁটা-২০২৫। প্ৰবীণ অভিনেতা প্ৰাঞ্জল শইকীয়ালৈ এই বৰ্ষৰ চিন্ময় ৰঞ্জন দত্ত সোঁৱৰণি শিল্পী বঁটা প্ৰদান কৰা হ’ব বুলি সদৰি কৰিছে বঁটা প্ৰাপক বাচনিৰ বাবে বহুকেইগৰাকী জ্যেষ্ঠ শিল্পী, শিক্ষাবিদ তথা বিশিষ্ট সাংস্কৃতিক কৰ্মীৰে গঠিত জুৰীয়ে। গোলাঘাট জিলাৰ পূব কমাৰবন্ধা সাংস্কৃতিক চৰ্চাকেন্দ্ৰৰ অনুষ্ঠিত হ’বলগীয়া ৰাস মহোৎসৱত ৫ নৱেম্বৰত প্ৰবীণ অভিনেতা গৰাকীক প্ৰদান কৰা হ’ব এই বঁটা।
উল্লেখ্য যে, প্ৰতিবছৰে শিল্প-সংস্কৃতি তথা বিভিন্ন ক্ষেত্ৰলৈ বৰঙণি আগবঢ়োৱা একো একোগৰাকী বৰেণ্য ব্যক্তিক চিন্ময় ৰঞ্জন দত্ত সোঁৱৰণি শিল্পী বঁটা প্ৰদান কৰি অহা হৈছে। ইতিমধ্যে বিশিষ্ট অভিনেতা মৃদুলা বৰুৱা, অৰুণ হাজৰিকা, আউনিআটী সত্ৰৰ সত্ৰাধিকাৰ ড০ পীতাম্বৰ দেৱ গোস্বামী, অতুল পাচনি, মাধুৰিমা চৌধুৰীৰ লগতে মলয়া গোস্বামীক এই বঁটা প্ৰদান কৰা হৈছে। এইবৰ্ষও পূৰ্বৰ দৰেই পূব কমাৰবন্ধা সাংস্কৃতিক চৰ্চাকেন্দ্ৰৰ ৰাস মহোৎসৱত চিন্ময় ৰঞ্জন দত্ত সোঁৱৰণি শিল্পী বঁটা প্ৰদানৰ দিহা কৰিছে।
প্ৰতিভাৱান চিন্ময় ৰঞ্জন দত্ত ONGCৰ জিঅ’লজিষ্ট হোৱাৰ সমান্তৰালকৈ গোলাঘাট জিলাৰ কানুগাঁও অঞ্চলৰ এগৰাকী উদীয়মান যুৱক আছিল। যিয়ে অঞ্চলটোৰ বিভিন্ন কামকাজত আগৰণুৱা আছিল। এটা পথ দুৰ্ঘটনাত এইগৰাকী মেধাৱী তথা সংস্কৃতিৱান যুৱক চিন্ময় ৰঞ্জন দত্তৰ মৃত্যু হৈছিল। একেদৰে ১৯৮৪ চনতে আৰম্ভ হোৱা ঐতিহ্যমণ্ডিত পূব কমাৰবন্ধা সাংস্কৃতিক চৰ্চাকেন্দ্ৰৰ ৰাসৰ সময়তে প্ৰয়াত চিন্ময় দত্তৰ জন্ম হৈছিল।
সেই অনুসৰিয়ে প্ৰতিবছৰে এই ৰাস মহোৎসৱৰ পৱিত্ৰ বাকৰিতে তেখেতৰ সোঁৱৰণত এই বঁটা প্ৰদান কৰি অহা হৈছে। বঁটা প্ৰদানৰ ক্ষেত্ৰত পৰিয়ালৰ হৈ তেখেতৰ জ্যেষ্ঠ ভাতৃ তথা সমাজকৰ্মী, অসম ক্ৰিকেট সন্থাৰ প্ৰাক্তন উপ-সভাপতি পৰিক্ষীত দত্তই বিশেষভাৱে আগভাগ লৈ আহিছে।