Zubeen Garg:✒️অহা ১৫ ডিচেম্বৰত প্ৰাণৰ শিল্পী জুবিন গার্গে ন্যায় লাভ কৰিব। জুবিনক হত্যাৰ গোচৰটোৰ তদন্ত সন্দৰ্ভত কালি গুৱাহাটীত মুখ্যমন্ত্রী ড° হিমন্ত বিশ্ব শর্মাই সাংবাদিকৰ আগত উক্ত সময়সীমা ঘোষণা কৰে। ইয়াৰ লগতে মুখ্যমন্ত্ৰীয়ে কয় যে ১৭ডিচেম্বৰত সকলো তথ্য ৰাইজৰ সম্মুখলৈ অনা হ’ব।
তাৎপর্যপূর্ণভাৱে মুখ্যমন্ত্রীয়ে স্পষ্ট ইংগিত দিয়ে যে জুবিন গাৰ্গ হত্যাৰ বলি হৈছিল; কিয়নো মুখ্যমন্ত্রীয়ে কালি কয় যে শিল্পীগৰাকীক হত্যা কৰা বুলি তেওঁ প্রথমেই মন্তব্য কৰিছিল। শুকুৰবাৰে মুখ্যমন্ত্রীয়ে কয় যে তেওঁ এনেয়ে সেই কথা কোৱা নাছিল। জুবিন গাৰ্গক সম্পূর্ণ ন্যায় দিবলৈ সক্ষম হ’ব বুলি এছআইটি সম্পূর্ণ আত্মবিশ্বাসী হৈ আছে বুলি শর্মাই মন্তব্য কৰে। এছআইটিয়ে গৃহমন্ত্রী হিচাপে তেওঁক যি কথা সময়ে সময়ে অৱগত কৰি আহিছে, তাৰ ভিত্তিতে এনেবোৰ বক্তব্য কালি আগবঢ়োৱা বুলি উল্লেখ কৰি মুখ্যমন্ত্ৰীয়ে লগতে কয় যে এছআইটিৰ তদন্তই সংঘটিত এই সমগ্র ঘটনাক লৈ এখন বৃহৎ ছবি পোহৰলৈ আনিব।
প্রসংগক্রমে মুখ্যমন্ত্রীয়ে কয়, ‘ন্যায় বিচৰা দুটা গোট আছে। এটাই ন্যায় লাগে বুলি কৈ আছে আৰু আনটোৱে ন্যায় দিবলৈ দিন-ৰাতি একাকাৰ কৰি কাম কৰি আছে। ‘জাষ্টিচ ফৰ জুবিন গাৰ্গ’ লিখিলেও কোনেও ন্যায় নাপায়। ন্যায় দিবলৈ কোনোবাই কাম কৰিব লাগিব। এছআইটিয়ে যোৱা এমাহে এই কষ্ট কৰি আছে। ১৫ ডিচেম্বৰত সকলো কথা স্পষ্ট হ’ব। অখিল গগৈৰ দৰে যিসকল ৰাজনৈতিক নেতাই আমি জুবিন গাৰ্গক ন্যায় দিব নোৱাৰিম বুলি ভাবে, তেওঁলোকৰ বক্তব্য কিমান সঁচা নে মিছা, সেয়া সোনকালে প্রমাণ হ’ব। আমি আকৌ এবাৰ প্ৰমাণ কৰিবলৈ সক্ষম হ’ম যে আমি কিমান দায়বদ্ধতাৰে কাম কৰিছো। জুবিনক আমি এশ শতাংশ ন্যায় দিম। এতিয়া ভুৱা ন্যায় বিচৰা পার্টি ওলাইছে। লুৰীণজ্যোতি গগৈয়ে কৈ দিয়কচোন- জুবিন গাৰ্গৰ দুখত তেওঁ এইবাৰ নিৰ্বাচন নেখেলে। অখিল গগৈয়েও এইবাৰ নিৰ্বাচন নেখেলে বুলি কৈ দিয়ক। এইসকলৰ বিপৰীতে আমি প্রকৃতার্থত ন্যায় পার্টি। জুবিন গাৰ্গক ন্যায় দিয়া হ’ব বুলি মই আত্মবিশ্বাসী হৈ আছো। অসমীয়া মানুহে বহু নজনা কথা জুবিন ন্যায়ৰ জৰিয়তে গম পাব। মই ঘটনাটো হত্যা বুলি কৈছিলো আৰু মুখ্যমন্ত্রীয়ে ভাবি-চিন্তিহে কথা কয়।’
জুবিন গাৰ্গৰ মৃত্যুৰ বিষয়টো আন বিষয় উত্থাপনৰে চৰকাৰে বেলেগে দিশলৈ ঢাল খুৱাব বিচাৰিছে বুলি ব্যাপকভাবে চর্চা চলি আহিছে। এই প্রসংগত মুখ্যমন্ত্রীয়ে কয় যে প্রত্যেকটো বিষয় নিজৰ নিজৰ স্থানত চলি আহিছে। জুবিন গাৰ্গৰ লগত আন কোনো বিষয় জড়িত হ’বই নোৱাৰে। গতিকে বিষয় সলনিৰ চেষ্টা বুলি চৰকাৰক কোনো কোনো ক্ষেত্রত একাংশই সমালোচনা কৰিব বিচৰাটো অর্থহীন বুলি তেওঁ দাবী কৰো।
এই প্ৰসংগতে কংগ্ৰেছৰ নাম উল্লেখ কৰি শৰ্মাই কয়, ‘সৰ্বভাৰতত কংগ্ৰেছ আৰু আমাৰ ইয়াত যি মিএল পার্টি আছে, সেইসকলে অসমক বাংলাদেশৰ লগত লগ কৰিব বিচাৰে। সেই কাৰণে কংগ্ৰেছৰ সভাত বাংলাদেশৰ গীত গায়। কংগ্রেছে আকৌ সেইটো কথাকে আইনসিদ্ধ কৰিব বিচাৰে। অসমৰ ভবিষ্যৎ বহুত ভাল নহয়। মিঞাসকলে অসমক শেষ কৰি পেলাব। সত্ৰৰ মাটি দখল কৰিছে, ছোৱালী উঠাই নিছে, লাভজেহাদ কৰিছে। জুবিন গাৰ্গৰ লগত এইবোৰ বিষয়ৰ কোনো সম্পৰ্ক নাই। জুবিনৰ ক্ষেত্ৰত আমাৰ লক্ষ্য হ’ল ন্যায় প্রদান কৰা আৰু ন্যায় প্রদান কৰিবলৈ এছআইটিয়ে দিন-ৰাতি একাকাৰ কৰি কাম কৰিছে।’
ছিংগাপুৰে দিলে প্রতিবেদন
ইপিনে, শুকুৰবাৰে ছিংগাপুৰ প্ৰশাসনে অসম চৰকাৰক জুবিন গাৰ্গৰ মৰণোত্তৰ পৰীক্ষাৰ প্ৰতিবেদন প্রদান কৰে। এই কথাও আজি সদৰী কৰে ড° শৰ্মাই। তেওঁ লগতে কয় যে ছিংগাপুৰে ‘বিহ বিজ্ঞান’ৰ প্রতিবেদনো একেলগে দাখিল কৰিছে। এই সম্পর্কত মুখ্যমন্ত্রীয়ে কয়, ‘অসমতো জুবিন গাৰ্গৰ দ্বিতীয়টো মৰণোত্তৰ পৰীক্ষা কৰা হৈছিল। সেই সময়ত মৃতদেহটোৰ পাঁচ-ছদিন পাৰ হৈ গৈছিল। ছিংগাপুৰত জুবিনৰ বিনৰ মৃত্যুৰ পাঁচ-ছয় মিনিট পাছতে তেজৰ নমুনা লোৱা হৈছিল। গতিকে ছিংগাপুৰে আজি টক্সিক’লজীৰ যি প্রতিবেদন দাখিল কৰে, সেয়া বেছি উপযুক্ত। কালি ছিংগাপুৰে সাগৰত থকা নীতি-নিয়মৰ তথ্যও আমাক দিয়ে; অর্থাৎ আজি এই তথ্যৰ লগতে জুবিন গাৰ্গৰ মৰণোত্তৰ পৰীক্ষাৰ প্ৰতিবেদন আৰু টক্সিক’লজী প্রতিবেদন আমাৰ হাতত পৰিছে। এই প্রতিবেদনে তদন্ত প্রক্রিয়াক যথেষ্ট সহায় কৰিব।’
বিত্তীয় কেলেংকাৰিতো জড়িত সিদ্ধার্থ
জুবিন গাৰ্গক হত্যাৰ অভিযোগত গ্ৰেপ্তাৰ হোৱা তেওঁৰ মেনেজাৰ সিদ্ধার্থ শৰ্মাৰ বিৰুদ্ধে বিত্তীয় অনিয়মৰ তদন্তও ক্ষিপ্ৰ কৰিছে এছআইটিয়ে। জুবিন গাৰ্গক ব্যৱহাৰ কৰি সিদ্ধার্থই ব্যাপক বিত্তীয় অনিয়ম সংঘটিত কৰিছিল বুলি এছআইটিয়ে সন্দেহ কৰিছে। জুবিনৰ এটা অনুষ্ঠানৰ বিনিময়ত সিদ্ধার্থই কিমান পৰিমাণৰ ধন আদায় কৰিছিল, তাৰ কোনো নীতি-নিয়ম অথবা সীমা নাছিল। একে ধৰণৰ অনুষ্ঠানৰ বাবেই কাৰোবাৰ পৰা যদি ১২-১৩ লাখ টকা আদায় কৰিছিল, আকৌ কাৰোবাৰ পৰা সাত লাখ টকা লৈছিল। এনেদৰে জুবিনৰ ধনৰ লুণ্ঠন চলাই অতি কম দিনৰ ভিতৰত বৃহৎ সম্পত্তিৰ গৰাকী হৈছিল সিদ্ধার্থ। জুবিন গাৰ্গৰ কে’বাগৰাকী সহ শিল্পীৰ পৰা এনে তথ্য লাভ কৰি এছআইটিয়ে কে’বাখনো বিহু উদ্যাপন সমিতিৰ ভাষ্য যোৱা তিনি দিনত সংগ্ৰহ কৰে। এই সমিতিবোৰৰ ভাষ্যতে সহ শিল্পীয়ে কৰা অভিযোগৰ সত্যতা স্পষ্ট হয়। এনেদৰে জুবিনক ব্যৱহাৰ কৰি সিদ্ধার্থই আয় বহির্ভূত বৃহৎ সম্পত্তি আহৰণৰ তথ্যও উদ্ধাৰ হৈছে। সেয়েহে সিদ্ধার্থক অর্থনৈতিক অপৰাধ সংঘটিত কৰাৰ গোচৰতো গ্ৰেপ্তাৰৰ সম্ভাৱনা বৃদ্ধি হৈছে।
ইপিনে, কালি এছআইটিয়ে জুবিনৰ একালৰ সহ কণ্ঠশিল্পী ভানুপ্রিয়া ডেকাৰ ভাষ্য সংগ্ৰহ কৰে। বিগত ২০১৯ৰ পৰা সহ কণ্ঠশিল্পী আছিল ভানুপ্রিয়া। ২০২২ পর্যন্ত তেওঁ জুবিনৰ লগত অনুষ্ঠান পৰিবেশন কৰিছিল। ভাষ্য প্ৰদানৰ পাছত শিল্পীগৰাকীয়ে কয়, ‘আমি সঁচা কথাটো জানিব লাগে। ন্যায় ব্যৱস্থাৰ ওপৰত আমাৰ আস্থা আছে। আজি এছআইটিয়ে মোক জুবিন গাৰ্গৰ লগত অনুষ্ঠান পৰিবেশন কৰা সন্দৰ্ভত সোধপোছ কৰে। সিদ্ধার্থ শৰ্মাৰ লগত মোৰ পেছাগত সম্পর্ক আছিল। মই গীত গাইছিলো আৰু সিদ্ধার্থই তাৰ বিনিময়ত পাৰিশ্রমিক হিচাপে নগদ ধন দিছিল। আমাৰ সেই সময়ৰ সহ শিল্পীসকলৰ বিষয়েও এছআইটিয়ে মোক প্রশ্ন কৰে।’
ইপিনে, এছআইটিয়ে বহু বিতর্কিত নর্থ-ইষ্ট ফেষ্টিভেলৰ ফটোগ্ৰাফাৰ কুলজিৎ দেউৰী, অভিনাশ দাস, অভিষেক দাসৰো ভাষ্য সংগ্ৰহ কৰে। জুবিনৰ চিকিৎসা পৰামৰ্শদাতা ডাঃ হিতেশ বৰুৱাই আজি তেওঁৰ ভাষ্য ন্যায়িক তদন্ত আয়োগৰ আগত দিয়ে।