Rajen Gohain:
সকলো জল্পনাকল্পনা ওৰ পেলাই বুধবাৰে আনুষ্ঠানিকভাৱে অসম জাতীয় পৰিষদত যোগদান কৰিব প্ৰাক্তন কেন্দ্ৰীয় মন্ত্ৰী ৰাজেন গোঁহাইয়ে ৷
নগাঁও সংসদীয় সমষ্টিৰ পৰা চাৰিবাৰকৈ বিজয়ী প্ৰাক্তন বিজেপি সাংসদজনে বুধবাৰে ১০ বজাত মহানগৰীৰ দিছপুৰস্থিত লোকনিৰ্মাণ ভৱনত অসম জাতীয় পৰিষদৰ দ্বাৰা আয়োজিত এক যোগদান কাৰ্যসূচীত আনুষ্ঠানিকভাৱে জাতীয় পৰিষদত যোগদান কৰিব ৷ এই যোগদান কাৰ্যসূচীতে কে’বা গৰাকী প্রাক্তন আছু কর্মীয়েও যোগদান কৰাৰ কথা ৷
উল্লেখ্য যে বিগত মাহত বিজেপিৰ প্ৰাক্তন সভাপতি গৰাকীয়ে বিজেপি ত্যাগ কৰিছিল। এসময়ত ৰাজ্যত বিজেপিৰ কোনো সংগঠন নথকাৰ সময়ত ৰাজ্যিক বিজেপিক সন্মুখৰ পৰা নেতৃত্ব দি সাংগাঠনিক তৎপৰ বৃদ্ধি কৰাৰ লগতে নগাঁও সংসদীয় সমষ্টিৰ পৰা একেৰাহে বিজয়ী হৈছিল চাৰিবাৰকৈ I আনকি ২০১৪ ত মোদী মন্ত্ৰীসভাত ৰে’ল ৰাজ্যমন্ত্ৰী ৰূপে কাৰ্যনিৰ্বাহ কৰিছিল । ড:হিমন্ত বিশ্ব শৰ্মাই মুখ্যমন্ত্ৰীৰ দায়িত্ব লোৱাৰ পিছত গোঁহাইক কেবিনেট মৰ্যাদা দি খাদ্য আৰু অসামৰিক নিগমৰ অধ্যক্ষৰ দায়িত্ব অৰ্পণ কৰা হৈছিল ৷ কিন্ত একাদিক্ৰমে ২০১৯ আৰু ২০২৪ ৰ লোকসভা নিৰ্বাচনত দলীয় টিকট লাভৰ পৰা বঞ্চিত হৈছিল ৰাজেন গোঁহাই ৷ একেদৰে ৰাজ্যসভাৰ সদস্যৰ পদৰ পৰাও হৈছিল বঞ্চিত। যাৰবাবে মনে মনে ক্ষোভিত হৈ থাকি সময়ে সময়ে দলৰ ভিতৰত থাকিও কেতবোৰ মন্তব্য দি দলৰ ৰোষত পৰি ক্ৰমাৎ দলৰ মজিয়াত হৈ পৰিছিত একাষৰীয়া।
অৱশ্যে দিলীপ শইকীয়াই ৰাজ্যিক বিজেপিৰ সভাপতি হোৱাৰ পিছত ৰাজেন গোঁহাইক দলৰ মজিয়াত উচিত আসন দিয়া হৈছিল যদিও গোঁহায়ে দলৰ ভিতৰত থাকি ডিব্ৰুগড়ত অসম জাতীয় পৰিষদৰ সভাপতি লুৰিণজ্যোতি গগৈ সহ নেতৃবৰ্গৰে এক মিলিত হৈছিল চলিত বৰ্ষৰ মাজভাগত । তেতিয়াৰে পৰা ৰাজ্যৰ ৰাজনীতিত এক চৰ্চা চলি আছিল ৷ অচিৰেই বিজেপি ত্যাগ কৰি ৰাজেন গোঁহাই জাতীয় পৰিষদত যোগদান কৰিব আনকি দলটোত যোগদান কৰিলে তেওঁক দিয়া হ’ব কাৰ্যকৰী সভাপতি পদ ৷
অৱশেষত সকলো জল্পনাকল্পনাৰ অন্তত বুধবাৰে আনুষ্ঠানিকভাৱে আঞ্চলিকতাবাদৰ পোচাক পিন্ধিব বৰ্ষীয়ান ৰাজনীতিকজনে ৷ উল্লেখ্য যে অসম জাতীয় পৰিষদত যোগদান কৰাৰ পিছত গোঁহাই হ’ব পাৰে আগন্তুক ২৬ ৰ বিধানসভা নিৰ্বাচনৰ নগাঁও সদৰ সমষ্টিৰ প্ৰাৰ্থী ৷ সমষ্টিটোত তেওঁৰ প্ৰধান প্ৰতিদ্বন্দ্বী হ’ব তেওঁৰ আঙুলিত ধৰি গেৰুৱাবসন পিন্ধি দুবাৰকৈ বিধায়ক হোৱা ৰূপক শৰ্মা ৷
