Guwahati :
ড:হিমন্ত বিশ্ব শৰ্মা নেতৃত্বাধীন ৰাজ্য চৰকাৰ গভীৰ বিত্তীয় নাটনিৰ সম্মুখীন হোৱাটো পুনৰ স্পষ্ট হৈছে। আনকি বিত্তীয় নাটনিৰ জোৰা মৰাৰ স্বাৰ্থত বিভিন্ন বিভাগৰ বহু পদ অতিৰিক্ত বুলি গণ্য কৰি চৰকাৰে এই পদসমূহ বিলুপ্তিকৰণৰ দিশে অগ্ৰসৰ হোৱাৰ তথ্য পোহবলৈ আহিছে।
দিছপুৰৰ উচ্চস্তৰীয় সূত্রই জনোৱা মতে, সম্প্রতি ৰাজ্য চৰকাৰে ইয়াৰ প্রশাসনীয় বিভাগবোৰত থকা বৃহৎ সংখ্যক পদ বিলুপ্তিৰ প্রক্রিয়া আৰম্ভ কৰিছে। ইয়াৰ বাবে বিত্ত বিভাগে শেহতীয়াকৈ এক ‘কার্যবাহী নির্দেশনা’ত অনুমোদন জনাইছে। মানৱ সম্পদৰ পূৰ্ণ বাৱহাৰ আৰু প্ৰশাসনীয় দক্ষতা বৃদ্ধিব অজুহাত দিও চবকাবে এই সিদ্ধান্তগ্রহণ কৰিহে বুলি সূত্রই জনায়। তদুপৰি অতিৰিক্ত ব্যয় হ্রাসৰো অজুহাত লৈছে চৰকাৰে। চৰকাৰৰ এই নির্দেশনাৰ জৰিয়তে প্রশাসনিক বিভাগবোৰত প্রয়োজনীয় পদৰ সমবিতৰণো কৰিব বিচৰা হৈছে বুলি দিছপুৰৰ সূত্ৰই সদৰী কৰে।
এই নির্দেশনা ৰাজ্য চৰকাৰৰ সকলো প্ৰশাসনিক বিভাগৰ উপৰি ষষ্ঠ অনুসূচীৰ অঞ্চলতো প্রযোজ্য হ’ব। সূত্ৰত প্রকাশ যে পদ বিলুপ্তিকৰণৰ সিদ্ধান্ত হ’লেও অতি প্রয়োজনীয় বুলি বিবেচিত হোৱা অতি সীমিত সংখ্যক নতুন পদৰো সৃষ্টি কৰা হ’ব। নতুন পদ সৃষ্টি নকৰিলে বিভাগীয় কাম-কাজত বাধাৰ সৃষ্টি হ’ব বুলি নিশ্চিত হ’লেহে পদ সৃষ্টিৰ বিষয়টো বিবেচনালৈ আহিব আৰু সম্পর্কিত সকলো বিভাগৰ অনুমোদনৰ ভিত্তিত নতুন পদ সৃষ্টিৰ সিদ্ধান্ত লোৱা হ’ব। গতিকে নতুন পদ সৃষ্টিৰ দিশটো চৰকাৰৰ শেহতীয়া সিদ্ধান্তটোৰ এটা অতি গৌণ বিষয় বুলি চর্চিত হৈছে; অর্থাৎ মূল গুৰুত্ব আৰোপ কৰা হৈছে পদ বিলুপ্তিকৰণতহে।
পদ বিলুপ্তি আৰু নতুন পদ সৃষ্টিত মুখ্য ভূমিকা গ্রহণ কৰিব প্রশাসনিক বিভাগবোৰৰ আটাইতকৈ জ্যেষ্ঠ সচিবসকলে। ষষ্ঠ অনুসূচীৰ ক্ষেত্ৰত এই দায়িত্ব অর্পণ কৰা হৈছে অঞ্চলকেইটাৰ দায়িত্বত থকা প্রধান সচিবসকলক। তেওঁলোকে সংশ্লিষ্ট বিভাগত কোনবোৰ পদ অতিৰিক্ত হিচাপে আছে সেইবোৰ চিনাক্ত কৰি বিলুপ্তিকৰণৰ কাৰণসহ প্ৰস্তাৱ গ্ৰহণ কৰিব। একে কাৰ্য সম্পাদন কৰিব লাগিব ষষ্ঠ অনুসূচীৰ দায়িত্বত থকা প্রধান সচিবসকলে। প্ৰস্তাৱ সাজু কৰি জ্যেষ্ঠ সচিব আৰু প্রধান সচিবে বিত্ত বিভাগলৈ প্ৰেৰণ কৰিব। একেধৰণে নতুন পদ সৃষ্টিৰ প্রস্তাৱো কাৰণৰ ব্যাখ্যাসহ বিত্ত বিভাগলৈকেই প্ৰেৰণ কৰিব লাগিব।
চৰকাৰৰ এনে সিদ্ধান্তৰ সন্দৰ্ভত সূত্ৰটোৱে উল্লেখ কৰে যে ইয়াৰ জৰিয়তে অতিৰিক্ত ব্যয় কৰ্তনৰো কৌশল গ্রহণ কৰা হৈছে। সূত্ৰটোৱে উল্লেখ কৰা অনুসৰি, ৰাজ্য চৰকাৰৰ বিভিন্ন বিভাগত যথেষ্ট সংখ্যক অতিৰিক্ত পদ থকা বুলি শেহতীয়াকৈ বিত্ত বিভাগে এক প্ৰস্তাৱ চৰকাৰ তথা মুখ্যমন্ত্ৰীৰ ওচৰত দাখিল কৰে। তেনে অতিৰিক্ত পদৰ বিপৰীতে একাংশ বিভাগত নতুন পদ সৃষ্টিৰ প্রয়োজনীয়তা থকা বুলিও পৰামৰ্শ দিয়া হয়। বিত্ত বিভাগে লগতে এই বুলিও সম্ভাৱনা ব্যক্ত কৰে যে সম্ভাব্য নতুন পদৰ বিপৰীতে অতিৰিক্ত পদৰ সংখ্যা যথেষ্ট পৰিমাণে আছে। বছৰ বছৰ ধৰি সেই পদবোৰ অতিৰিক্ত হিচাপেই আছে।
ফলত পদৰ বিপৰীতে দিয়া নিযুক্তিৰ নামত চৰকাৰেও অতিৰিক্ত ব্যয় বহন কৰি থাকিবলগীয়া হৈছে। তেনে পদসমূহ বিলুপ্ত কৰি চৰকাৰে মানৱ সম্পদৰ সৰ্বোচ্চ ব্যৱহাৰতহে গুৰুত্ব দিব লাগে। অতিৰিক্ত পদে একোটা বিভাগৰ কৰ্মতৎপৰতাতো সামগ্রিক প্রভাৱ পেলায় বুলিও বিত্ত বিভাগে মন্তব্য কৰিছে। গতিকে মানৱ সম্পদৰ পূৰ্ণ ব্যৱহাৰ আৰু বিভাগবোৰত কৰ্মদক্ষতা বৃদ্ধিৰ বাবে অতিৰিক্ত পদ বিলুপ্তিকৰণৰ বিত্ত বিভাগে সিদ্ধান্ত গ্রহণ কৰিছে।
ইয়াৰ সমান্তৰালকৈ প্রয়োজন সাপেক্ষে নতুন পদ সৃষ্টিৰ দুৱাৰো মুকলি ৰাখিছে। এই পর্যন্ত বিলুপ্ত হ’বলগীয়া পদৰ সংখ্যা নিৰূপণ হোৱা নাই যদিও প্রশাসনীয় বিভাগবোৰত শ শ এনে পদ আছে বুলি প্ৰাৰম্ভিক জৰীপত কোৱা হৈছে। এনে ধৰণৰ বিভিন্ন অজুহাতেৰে এই প্ৰক্ৰিয়াৰ যুক্তিযুক্ততা প্রতিষ্ঠাৰ চেষ্টা কৰা হৈছে।