Zubeenkhetro:✒️সোণাপুৰস্থিত জুবিন গাৰ্গৰ সমাধিক্ষেত্ৰৰ গাতে লাগি থকা ২৯ বিঘা ভূমি মন্ত্রী অশোক সিংহলে বেদখল কৰাক লৈ ৰাজ্যজুৰি তীব্র প্রতিক্রিয়া অব্যাহত আছে। এই ভূখণ্ড বেআইনীভাবে মন্ত্রী সিংহলে নিজৰ নামলৈ হস্তান্তৰ কৰা বিষয়টোক লৈ বৃহত্তৰ ডিমৰীয়া নাগৰিক সুৰক্ষা সমিতিৰ লগতে অঞ্চলটোৰ ভূমি সুৰক্ষা সমিতি সৰৰ হৈ আহিছে আৰু স্ব-ইচ্ছাই এই ভূমি জুবিনক্ষেত্রলৈ এৰি দিবলৈ মন্ত্রী সিংহলৰ প্ৰতি আহ্বান জনাইছে; কিন্তু যোৱা এসপ্তাহে এন প্রতিক্রিয়া সত্ত্বেও বিতর্ক অব্যাহত আছে যদিও এই প্রসংগত মুখ্যমন্ত্রী ড° হিমন্ত বিশ্ব শর্মাই মৌনতা অবলম্বন কৰিছে।
বৰঞ্চ মুখ্যমন্ত্রী ড° শর্মাই জুবিন ক্ষেত্ৰৰ আশে-পাশে কাৰ মাটি আছে সেই বিষয়ে তেওঁ অবগত নহয় বুলি গা এৰা দিয়া মন্তব্যহে কৰে। ইয়াৰ পাছতে মন্ত্রী সিংহলে ট্রাইবেল বেল্ট আৰু ব্লকত তেওঁৰ মাটি নাই বুলি ক’বলৈ সাহস পায়। ইয়াৰ বিপৰীতে বৃহত্তৰ ডিমৰীয়া নাগৰিক সুৰক্ষা সমিতিয়ে বাৰম্বাৰ স্পষ্ট কৰি দিছে যে জুবিনক্ষেত্ৰৰ পাছফালে ট্রাইবেল বেল্ট আৰু ব্লকৰ অধীনৰ ১১২ নম্বৰ দাগত মন্ত্রী সিংহলৰ নামত ২৯ বিঘা ১৪ লেচা মাটি আছে।
লগতে সমিতিয়ে নতুন জৰীপৰ জৰিয়তে এই বৃহৎ ভূমি মন্ত্রী সিংহলে নিজৰ নামলৈ হস্তান্তৰ কৰাৰ লগতে মাটিখিনি ট্রাইবেল বেল্ট আৰু ব্লকৰ আওতাৰ পৰা বাহিৰলৈ নিয়া বুলিও সন্দেহ প্রকাশ কৰিছে।
এনে চৰ্চা আৰু বিতৰ্কৰ মাজতে কৃষক মুক্তি সংগ্ৰাম সমিতিৰ সাধাৰণ সম্পাদক বিদ্যুৎ শইকীয়াই হকে-বিহকে মাত মতা বহুবন্ধী মুখ্যমন্ত্রীয়ে মন্ত্রী সিংহলৰ মাটি বেদখলৰ সন্দৰ্ভত কিয় মৌনব্রত ধাৰণ কৰিছে বুলি প্রশ্ন কৰে। তেওঁ কয় যে জুবিনক্ষেত্ৰৰ কাষত থকা বৃহৎ খালী ভূমিখিনি প্রকৃততে কাৰ সেই কথা চৰকাৰে ৰাজহুৱা কৰক।
স্থানীয় লোকৰ ভাষ্য অনুসৰি, এই মাটি মুখ্যমন্ত্ৰীৰ ঘনিষ্ঠ মন্ত্রী সিংহলৰ নামত আছে। যদি প্রকৃততে সেয়াই হয়, তেন্তে ট্রাইবেল বেল্ট আৰু ব্লকৰ অধীনৰ মাটি কিদৰে সিংহলে ল’ব পাৰিলে বুলি প্রশ্ন কৰি বিষয়টো চৰকাৰে স্পষ্ট কৰক বুলি কৃষক নেতাজনে দাবী কৰে।
উল্লেখ্য যে জুবিনক্ষেত্ৰৰ কাষৰ বৃহৎ চৰকাৰী ভূমি মন্ত্রী সিংহলৰ বেদখলৰ অভিযোগ উত্থাপন কৰি আহিছে বৃহত্তৰ ডিমৰীয়া নাগৰিক সুৰক্ষা সমিতিয়ে। প্রথমে মন্ত্রী সিংহলৰ ব্যৱসায়িক সহযোগী মনোজ জালানে মাটি কটাৰ অনুমতি লাভকৰা নন কেডেস্ট্রেল চৰকাৰী ভূমিখিনি ৰহস্যজনকভাবে মন্ত্রী সিংহলৰ নামলৈ হস্তান্তৰ হোৱা বুলি সমিতিয়ে দাবী কৰি আহিছে।
এই সন্দর্ভত সমিতিৰ সম্পাদক ৰাজু তাঁতীয়ে কয় যে মন্ত্রী সিংহলে সোণাপুৰত তেওঁৰ মাটি নাই বুলি কোৱা নাই। তেওঁ কৈছে যে য’ত তেওঁৰ মাটি আছে, সেই স্থান ট্রাইবেল বেল্ট আৰু ব্লকৰ অধীনত নাই। তেওঁ কয়, ‘আমি এশ শতাংশ নিশ্চিত যে জুবিনক্ষেত্ৰৰ কাষৰ মাটিখিনি মন্ত্রী সিংহলৰ নামত আছে। হয়তো নতুন জৰীপত এই মাটিখিন ট্রাইবেল বেল্ট আৰু ব্লকৰ আওতাৰ পৰা উলিয়াই দিয়া হৈছে। যদি এনে হৈছে, তেন্তে এক বৃহৎ কেলেংকাৰি পোহৰলৈ অহাৰ সম্ভাৱনা প্রকট হৈ পৰিছে।’
ট্রাইবেল বেল্ট আৰু ব্লকত থাকক বা নাথাকক জুবিনক্ষেত্ৰৰ কাষৰ মাটিখিনি নন কেডেস্ট্রেল চৰকাৰী ভূমি বুলি দাবী কৰি এই চৰকাৰী ভূমি কাৰ আশীৰ্বাদত ব্যক্তিগতকৰণ হ’ল বুলি তাঁতীয়ে প্রশ্ন কৰে। লগতে তেওঁ কয় যে বহল পৰিসৰত জুবিনক্ষেত্ৰ নিৰ্মাণ কৰিবলৈ ৰাইজে দাবী জনাইছে। কেৱল ১০ বিঘা মাটিত প্ৰাণৰ শিল্পীজনৰ সমাধিক্ষেত্র আটকধুনীয়াকৈ সাজি উলিওৱাটো সম্ভৱ নহয়। সেয়ে কাষত থকা চৰকাৰী মাটিখিনি সমাধিক্ষেত্ৰৰ লগত সংযুক্ত কৰিবলৈ ৰাইজে দাবী জনাই আহিছে। এই সন্দর্ভত সোমবাৰে সংশ্লিষ্ট কর্তৃপক্ষলৈ ডিমৰীয়াবাসী ৰাইজে পত্ৰ প্ৰেৰণ কৰিব বুলি সমিতিৰ সম্পাদকজনে সদৰী কৰে।
সোণাপুৰ ৰাজহ চক্ৰ কাৰ্যালয়ৰ তথ্য অনুসৰি, ট্রাইবেল বেল্ট আৰু ব্লকৰ অধীনৰ মন্ত্ৰী সিংহলৰ দখলত থকা উল্লিখিত ভূমিখিনিৰ দাগ নম্বৰ হৈছে ১১২। এই ভূমিখিনি সিংহলৰ নামলৈ অহাৰ পূৰ্বে মনোজ জালানৰ নামত আছিল। নন কেডেস্ট্রেল এই চৰকাৰী ভূমিখিনি জালানে ক’ৰ পৰা কেনৈকে কুক্ষিগত কৰিছিল তাৰ কোনো তথ্য ৰাজহ চক্ৰৰ কাৰ্যালয়ত নাই।
উল্লেখ্য যে এই মনোজ জালান হৈছে মন্ত্রী সিংহলৰ মালিকানাধীন প্রট্রেক গ্ৰুপৰ সঞ্চালক। লগতে মন্ত্রী সিংহলৰ পৰিয়ালৰ নামত থকা কে’বাটাও কোম্পানীতো গুৰুত্বপূর্ণ পদত হৈ আছে জালান। ইয়াৰ পৰাই স্পষ্ট হৈছে যে প্রথমে জালানৰ নামত চৰকাৰী মাটিখিনি দখল কৰি পৰৱৰ্তী সময়ত ৰাজনৈতিক প্ৰভাৱ খটুৱাই সিংহলে নিজৰ দখললৈ নিছিল। ট্রাইবেল বেল্ট আৰু ব্লকত মন্ত্রী সিংহলে কিদৰে ২৯ বিঘাৰো অধিক মাটি বেদখল কৰি নিজৰ নামলৈ নিবলৈ সক্ষম হ’ল, তাকে লৈ সমগ্র ডিমৰীয়া অঞ্চলত ব্যাপক প্রতিক্ৰিয়াৰ সৃষ্টি হৈছে।
সিংহলে এই চৰকাৰী মাটি কিদৰে আৰু কাৰ বলত কুক্ষিগত কৰিছিল, তাৰ ব্যাখ্যা আগবঢ়াই বৃহত্তৰ ডিমৰীয়া নাগৰিক সুৰক্ষা সমিতিয়ে কয় যে তিনি বছৰৰ পূর্বে এতিয়া যি স্থানত জুবিন গাৰ্গৰ সমাধিক্ষেত্র আছে, সেই স্থানত এখন প্রকাণ্ড পাহাৰ আছিল। তেতিয়া এই পাহাৰ খননৰ বাবে বন বিভাগ আৰু ৰাজহ চক্ৰৰ কাৰ্যালয়ৰ পৰা মনোজ জালান নামৰ লোকজনে অনুমতি আদায় কৰিছিল।
পাহাৰৰ মাটি খনন কৰা স্থানীয় লোকে প্রত্যক্ষ কৰাৰ পাছতে বৃহত্তৰ ডিমৰীয়া নাগৰিক সুৰক্ষা সমিতি বন বিভাগৰ কাষ চাপিছিল। কিয়নো যি স্থানত মাটি কটা হৈছিল, সেই ভূমি নন কেডেস্ট্রেল আৰু নন কেডেস্ট্রেলত মাটি কটাৰ আদেশ দিব নোৱাৰে। বন বিভাগৰ কাৰ্যালয়ৰ তৰফৰ পৰা সমিতিৰ বিষয়ববীয়াক জনোৱা হৈছিল যে ৰাজহ চক্ৰ কাৰ্যালয়ে ইয়াৰ সকলো ব্যৱস্থা কৰি দিছে। ইয়াৰ পাছতে সমিতিয়ে ইয়াৰ বিৰোধিতাৰে ৰাজহ চক্ৰৰ লগতে জিলা আযুক্তলৈ পত্ৰ প্ৰেৰণ কৰিছিল।
যোৱা দুই-তিনি বছৰ এইদৰে যোৱাৰ পাছত শেহতীয়াকৈ জুবিন গাৰ্গৰ সমাধিক্ষেত্ৰ নিৰ্মাণৰ সময়ছোৱাতহে সেই জালানৰ নামত মাটি কটাৰ নিৰ্দেশনা ওলোৱা মাটিখিনি মন্ত্রী সিংহলৰ নামলৈ স্থানান্তৰ হোৱাৰ বিষয়টো পোহৰলৈ আহে বুলি সমিতিয়ে সদৰী কৰিছে। এই মাটি কিদৰে কুক্ষিগত কৰা হৈছিল ইয়াৰ ব্যাখ্যা আগবঢ়াই সমিতিৰ বিষয়ববীয়াই কয় যে দুষ্ট প্রকৃতিৰ লোকসকলে প্রথমে কোনো এটা স্থানৰ পট্টা এখন ক্ৰয় কৰি লয়।
ন কেডেস্ট্রেল ভূমিৰ পূৰ্বতে ম্যাদীপট্টা আছিল, তেওঁলোকে পট্টা এখন ক্ৰয় কৰি লৈ সুবিধাজনক স্থান নির্বাচন কৰি ৰাজহ চক্ৰৰ কাৰ্যালয়ক হাত কৰি সেই স্থানত পট্টাখন বহুৱাই দিয়ে। কাৰণ নন কেডেষ্ট্ৰল ভূমিৰ মেপ নাথাকে। ফলত পট্টাখন বহুৱাই এইখিনি মাটি তেওঁলোকৰ বুলি ৰাজহ চক্র কার্যালয়ে দেখুৱাই দিয়ে। পাছত কেইদিনমান দখলত ৰাখি বাকী নথিপত্ৰৰ কাম আগবঢ়াই নিয়ে।