Guwahati High Court:✒️গুৱাহাটী উচ্চ ন্যায়ালয়ৰ চৌহদ উত্তৰ গুৱাহাটীৰ ৰংমহললৈ স্থানান্তৰৰ চৰকাৰৰ সিদ্ধান্তৰ বিৰুদ্ধে বাৰ এছ’চিয়েছন, অধিবক্তা সমাজ আৰু সচেতন ৰাইজে যুক্তিপূর্ণভাৱে গণতান্ত্রিক প্রতিবাদ সাব্যস্ত কৰি আহিছে; কিন্তু এই প্রতিবাদক কোনো গুৰুত্ব প্ৰদান কৰা নাই।
সেইবাবেই দেওবাৰে ৰাজ্য চৰকাৰৰ কেবিনেট বৈঠকে ৰংমহলত উচ্চ ন্যায়ালয় চৌহদ নিৰ্মাণৰ বাবে প্ৰথম পর্যায়ত ৪৭৮.৭৮ কোটি টকাৰ অনুমোদন দিয়ে। কেবিনেট বৈঠকৰ পাছত এক সংবাদমেলত মুখ্যমন্ত্ৰীয়ে উল্লেখ কৰে যে পুঁজি অনুমোদনৰ পাছত লোকনির্মাণ বিভাগে নিবিদা আহ্বান কৰিব অহা জানুৱাৰীত উচ্চতম ন্যায়ালয়ৰ মুখ্য ন্যায়াধীশে নতুন নিৰ্মাণৰ আধাৰশিলা স্থাপনৰ সম্ভাৱনা আছে বুলি মুখ্যমন্ত্ৰীয়ে সদৰী কৰে।
তেওঁ লগতে কয় যে উচ্চ ন্যায়ালয়ৰ বৰ্তমানৰ গৃহটো পৰৱৰ্তী সময়ত উপযুক্ত কামত ব্যৱহাৰ কৰা হ’ব। বৰ্তমানৰ ব্যৱস্থাটোত আন্তঃগাঁথনিত যথেষ্ট অসুবিধা থকা বুলিও ড° শর্মাই উল্লেখ কৰে। ইয়াৰ বিপৰীতে নতুনকৈ নিৰ্মাণ কৰিবলগীয়া চৌহদত ৩১ গৰাকী ন্যায়াধীশ বহিব পৰা ব্যৱস্থা থাকিব। উচ্চ ন্যায়ালয়ৰ অধিবক্তাসকলৰ বাবে এটা ছয় মহলীয়া গৃহ থাকিব।
একেদৰে কাৰ্যালয়ৰ বাবেও এটা ছয় মহলীয়া গৃহ নিৰ্মাণ কৰা হ’ব বুলি তেওঁ সদৰী কৰে। উল্লেখ্য যে চৰকাৰে গুৱাহাটী উচ্চ ন্যায়ালয় বাৰ এছ’চিয়েছনৰ দৰে সংস্থা তথা ন্যায় ব্যৱস্থাটোৰ অন্যতম অংশীদাৰ অধিবক্তাসকলক আস্থাত নোলোৱাকৈ উচ্চ ন্যায়ালয়ৰ চৌহদ স্থানান্তৰ কৰিবলৈ চৰকাৰে সিদ্ধান্ত লোৱা বুলি সৰৱ হৈ আহিছে।
চৰকাৰৰ এনে সিদ্ধান্তৰ বিৰুদ্ধে নিম্ন আদালতৰ অধিবক্তাসকলেও প্রতিবাদী কাৰ্যসূচী ৰূপায়ণ কৰি আহিছে; কিন্তু তেনে কোনো প্রতিবাদক বিন্দুমাত্রও গুৰুত্ব নিদিয়াকৈ ৰাজ্য চৰকাৰে উচ্চ ন্যায়ালয়ৰ চৌহদ স্থানান্তৰৰ বাবে তৎপৰতাহে বৃদ্ধি কৰিছে। সেইবাবেই নিৰ্মাণ কাৰ্যৰ প্ৰথম পৰ্যায়ৰ পুঁজিত অনুমোদন জনোৱা হয়।
ইপিনে, কেবিনেটত কালি বহু বিবাহ, কলেজ শিক্ষকৰ পদোন্নতি, অসমত ষ্টার্টআপৰ বিকাশ আদিকে ধৰি কে’বাটাও সিদ্ধান্ত গ্রহণ কৰা হয়। মুখ্যমন্ত্ৰীয়ে সদৰী কৰা অনুসৰি, কেবিনেটত আজি ‘দ্য আছাম প্রহিবিছন অব পলিগেমী বিল, ২০২৫’ গ্রহণ কৰা হয়। আগন্তুক বিধানসভা অধিবেশনত বিধেয়কখন উত্থাপন কৰা হ’ব আৰু বিধানসভাত পাৰিত হোৱাৰ লগে লগে কার্যকৰীও হ’ব।
মুখ্যমন্ত্রীয়ে কয়, ‘এই বিধেয়কখন জনজাতীয় লোক আৰু ষষ্ঠ অনুসূচীৰ অন্তৰ্গত অঞ্চলত প্রযোজ্য নহ’ব। আনকি ষষ্ঠ অনুসূচীৰ অন্তৰ্গত অঞ্চলত ২০০৫ৰ আগৰে পৰা বসবাস কৰি থকা মুছলমান লোকৰ ক্ষেত্রতো আইনখন প্রযোজ্য নহ’ব। তাৰ বাদে আন সকলো অঞ্চলত প্রযোজ্য হ’বলগীয়া আইনখন অনুসৰি, প্রথমা পত্নী থকাৰ পাছতো দ্বিতীয় আৰু তৃতীয়বাৰলৈ বিবাহপাশত আবদ্ধ হোৱা লোকৰ সাত বছৰ সশ্ৰম কাৰাদণ্ড হ’ব। আমি ইয়াৰ লগতে এটা ক্ষতিপূৰণ পুঁজিও গঠন কৰিম। স্বামীয়ে দ্বিতীয়বাৰ বিয়া পতাৰ পাছত প্রথমা পত্নীক সাহায্য প্রদান কৰিব পৰাকৈ এই পুঁজি আমি তৈয়াৰ কৰিম।’
কেবিনেটত দেওবাৰে কলেজ শিক্ষকৰ পদোন্নতিৰ ক্ষেত্ৰত যোগ্যতাৰ মাপকাঠি জ্যেষ্ঠতাৰ ভিত্তিত বিবেচনালৈ আহিব বুলি এক প্রস্তাব লোৱা হয়। আন এক প্রস্তাৱত কালি ‘আছাম স্টার্টআপ ইন’ভেছন পলিচী, ২০২৫-৩৫’ত অনুমোদন জনোৱা হয়। এই কেবিনেটতে মহিলা ক্রিকেটৰ বিশ্বকাপ বিজয়ী দলৰ ভাৰতীয় খেলুৱৈ অসমকন্যা উমা ছেত্রীক অভিনন্দন জনোৱাৰ লগতে ২৫ লাখ টকাৰ অনুদান প্রদানৰ সিদ্ধান্ত গ্রহণ কৰা হয়।প্রসংগক্রমে মুখ্যমন্ত্রীয়ে সদৰী কৰে যে সুৰক্ষাৰ বাবে মাৰণাস্ত্ৰ প্ৰদানৰ আঁচনিখন ফেব্ৰুৱাৰীত আৰম্ভ কৰা হ’ব।
অসমীয়া মানুহৰ আত্মসমর্পণ আৰম্ভ!
কেবিনেটৰ সিদ্ধান্ত সদৰী কৰাৰ পাছত মুখ্যমন্ত্রী ড° শৰ্মাই মন্তব্য কৰে যে অসমত অসমীয়া মানুহৰ আত্মসমর্পণৰ অধ্যায় আৰম্ভ হৈছে। এই আত্মসমর্পণ মুছলমান লোকৰ ওচৰত বুলিও মুখ্যমন্ত্রীয়ে স্পষ্ট কৰে। ড° শৰ্মাই কয়, ‘আমি লক্ষ্য কৰিছো যে সৰ্বদিশত মুছলমানতকৈ অৱনমিত হৈ আহিছে। হিন্দুৱে মুছলমানক বিক্ৰী কৰা মাটিৰ পৰিমাণ অধিক। ইয়াৰ বিপৰীতে মুছলমানৰ পৰা হিন্দুৱে মাটি ক্রয় কৰা পৰিমাণ একেবাৰে কম। তিনিচুকীয়াৰ দৰে ঠাইতেই হিন্দুরে মুছলমানক অধিক মাটি বিক্ৰী কৰিছে। আমাৰ এই হিচাপত খিলঞ্জীয়া অসমীয়া মুছলমানৰ কথা ধৰা হোৱা নাই। মুছলমানৰ সংখ্যাৰ লগতে সম্পদো বৃদ্ধি হৈছে। এয়া ধ্বংসৰ লক্ষণ। অসমীয়া মানুহৰ আত্মসমর্পণৰ অধ্যায় আৰম্ভ হৈছে। সাংবাদিকৰ মাজতেই তেওঁলোকৰ হোৱাটছএপ গ্রুপ বেলেগ। আমাৰ হোৱাটছএপ গ্রুপত সকলোৱেই আছে। কাকো পৃথক কৰা নাই; কিন্তু তেওঁলোকে নিজৰ মাজত গ্রুপ খুলি তাত কিন্তু আমাক ৰখা নাই।’