Udalguri:
জনজাতিকৰণৰ দাবীত ছয় জনগোষ্ঠীয়ে উজনি আৰু নামনি অসমত উত্তাল প্ৰতিবাদী কাৰ্যসূচী ৰূপায়ণ কৰি অহাৰ মাজতে সোমবাৰে সদৌ চাওঁতাল ছাত্ৰ সন্থাই ওদালগুৰিত উলিয়ালে এক বৃহৎ প্ৰতিবাদী সমদল ৷
চাওঁতাল সকলক জনজাতিকৰণৰ মৰ্যাদা প্ৰদান, চাওঁতাল সকলক চাহজনজাতি হিচাপে পৰিগণিত নকৰি জাতিগত প্ৰমাণপত্ৰত চাওঁতাল হিচাপে দিয়া, ভূমিৰ পট্টা প্ৰদানৰ দাবীত কেইবা সহশ্ৰাধিক চাওঁতাল জনগোষ্ঠীৰ লোক ওদালগুৰি চহৰত সমদল কৰি বিভিন্ন চৰকাৰ বিৰোধী শ্ল’গানেৰে আকাশ বতাহ কপাই তোলে৷
প্ৰতিবাদী সমদলত অংশ লোৱা সদৌ চাওঁতাল ছাত্ৰ সন্থাৰ নেতৃবৰ্গই কয়, দুশ বছৰৰো অধিক দিন অসমত বসবাস কৰি চাহ উদ্যোগলৈ অশেষ বৰঙনি আগবঢ়াই অহাৰ পিছতো অবহেলিত হৈ আহিছে শ্ৰমজীৱী চাওঁতাল জনগোষ্ঠীয়ে ৷ ভূমি অধিকাৰৰ পৰা বঞ্চিত কৰি ৰখা হৈছে জনগোষ্ঠীটোক ৷ আনহাতে জনজাতিকৰণৰ দাবীত দীৰ্ঘদিন ধৰি সংগ্ৰাম কৰি অহা চাওঁতাল সকলক চাহ জনজাতি বুলি পৰিগণিত নকৰি জাতিগত প্ৰমাণপত্ৰত চাওঁতাল হিচাপে দিয়াৰ দাবী কৰে চাওঁতাল ছাত্ৰ সন্থাই ৷
চাওঁতাল সকলৰ বহু বীৰ মুক্তি যুজাঁৰুৱে নিজৰ জীৱনকো তুচ্ছ কৰি ভাৰতৰ স্বাধীনতা সংগ্ৰামত জপিয়াই পৰি ছহিদ হয় অলেখজন ৷
এনেক্ষেত্ৰত চাওঁতাল সকলক তেওঁলোকৰ প্ৰাপ্যৰ পৰা চৰকাৰে যদি বঞ্চিত কৰে তেন্তে ইয়াৰ পৰিণাম ভয়ংকৰ হ’ব বুলি হুংকাৰ কৰি সন্মুখৰ পৰা যুদ্ধ কৰাৰ অংগীকাৰ কৰে ৷ চৰকাৰে অচিৰেই জনগোষ্ঠীটোক জনজাতিকৰণ আৰু ভূমিৰ অধিকাৰ দিয়াৰ দাবী কৰে চাওঁতাল ছাত্ৰ সন্থাৰ নেতা কেইজনে ৷
