মই নথকাৰ অনুভৱ যিদিনা হ’ব তোমাৰ…!

Zubeen Garg:✒️যোৱা ৯০ দশকৰ পৰাই স্বকীয় প্রতিভাৰে অসমীয়া সংগীত জগতত এটা নতুন ধাৰা সৃষ্টি কৰি সকলো শ্রেণীৰ জনতাৰ নয়নৰ মণি হৈ পৰা সংগীতৰ ৰাজপুত্র, অসমীয়াৰ হিয়াৰ আমঠু জুবিন গার্গে গীতেৰে তেওঁৰ কোটি কোটি অনুৰাগীক প্রশ্ন কৰিছিল-‘মই নথকাৰ অনুভৱ যিদিনা হ’ব তোমাৰ/সিদিনা অশ্রু নিগৰিবনে কোৱা?’ আজি জুবিন গাৰ্গ নাই আৰু তেওঁ নথকাৰ অনুভৱ প্রত্যেক অনুৰাগীয়ে হৃদয়গম কৰিছে।

তাৰ মাজতে কালি জুবিন গাৰ্গৰ অবর্তমানত লক্ষ লক্ষ অনুৰাগীয়ে প্রিয় শিল্পজনৰ ৫৩ সংখ্যক জন্মদিন উদ্যাপন কৰি আৱেগিক হৈ পৰিল। ৰাজ্যৰ প্রান্তে প্রান্তে আজি জুবিন গাৰ্গৰ জন্মদিন উদ্যাপন কৰা হয়। জন্মদিন উপলক্ষে কাহিলিপাৰাস্থিত জুবিন গাৰ্গৰ বাসগৃহৰ চৌহদতো সৃষ্টি হয় এক সুকীয়া পৰিৱেশ। সোমবাৰে নিশাৰে পৰা অজস্র অনুৰাগীয়ে আহি ভিৰ কৰে ‘ছিনাৰ্জী ইম্পেৰিয়েল’ চৌহদ। প্রিয় শিল্পীজনৰ জন্মদিন উপলক্ষে বিগত বৰ্ষসমূহৰ দৰে এইবাৰো অনুৰাগীসকলে হাতে হাতে লৈ আহিছিল একোটি মৰমৰ উপহাৰ; কিন্তু এই উপহাৰ নিজ হাতেৰে দি ‘জুবিন দা’ক এবাৰ ছুই চোৱাৰ সপোন যেন এইবাৰ পূৰণ নহ’ল।

ফটোৰ সম্মুখতে অশ্রুসিক্ত নয়নৰে মৰমৰ উপহাৰ আগবঢ়াই আবেগিক হৈ পৰিল বহুজন।

সমান্তৰালভাৱে বহু কেইজন অনুৰাগীয়ে লগত লৈ আহিছিল জন্মদিনৰ কেক। ইয়াৰে ২০ কিলোগ্রাম ওজনৰ এটা কেক কাটি অশ্রুসিক্ত নয়নেৰে প্রিয় মানুহজনক জন্মদিনৰ শুভেচ্ছা জ্ঞাপন কৰে পত্নী গৰিমা গার্গে। শোকাকুল পৰিৱেশত সম্পন্ন হোৱা এই কাৰ্যসূচীৰ মাজতে চৌদিশে গুঞ্জৰিত হ’ল ‘জয় জুবিন দা’, ‘জুবিন দা অমৰ হওক’ ধ্বনি। ইয়াৰ পাছতে আবাসিক অট্টালিকাটোৰ চৌহদত থকা জুবিন গাৰ্গৰ প্ৰিয় বকুল গছজোপাৰ তলতে স্থাপন কৰা হয় জুবিন গাৰ্গৰ এটা আৱক্ষ মূর্তি। পিতৃ কপিল বৰঠাকুৰে এই আৱক্ষ মূর্তি উন্মোচন কৰে। চকু মেলি থকা আবক্ষ মূৰ্তিটোৰ পৰা চাই যেন জুবিন গার্গে কৈছে-‘মই নথকাৰ অনুভৱ আজি তোমালোকে কৰিছা, মোৰ কবিতাৰ ছন্দ গানৰ সুৰ বুজি উঠিছা।’

ন্যায় কেতিয়া। ইমান মানুহৰ প্ৰাৰ্থনা অথলে যাব নেকি: প্রশ্ন অনুৰাগীৰ

জন্মদিন উদ্যাপনৰ সমান্তৰালভাৱে অনুৰাগীসকলে তুলিলে ন্যায়ৰ দাবী। উল্লেখ্য যে ছিংগাপুৰত অনুষ্ঠিত নর্থ-ইষ্ট ফেষ্টিভেলত অংশগ্রহণ কৰিবলৈ গৈ যোৱা ১৯ ছেপ্টেম্বৰত ৰহস্যজনক মৃত্যুক আঁকোৱালি লৈছিল জুবিন গার্গে। মুখ্যমন্ত্রী ড° হিমন্ত বিশ্ব শর্মাই এয়া এক হত্যাকাণ্ড বুলি উল্লেখ কৰাৰ পাছতে প্রিয় শিল্পীজনৰ ন্যায়ৰ দাবীত আজিও প্রতিবাদ অব্যাহত আছে।

জুবিন গাৰ্গৰ ৰহস্যজনক মৃত্যুৰ স’তে জড়িতসকলে কঠোৰ শাস্তি পাব লাগে বুলি প্রত্যেকে দাবী কৰি আহিছে যদিও প্রত্যেক দিনাই সলনি হোৱা দৃশ্যপটে বহু প্ৰশ্নৰ উদ্ৰেক হৈছে। ফলত জুবিন গার্গে প্রকৃততে ন্যায় লাভ কৰিব নে নাই বহুজনৰ মাজত প্ৰশ্নৰ উদয় হৈছে। তাৰ মাজতে আজিও কাহিলিপাৰা বাসগৃহত জন্মদিনৰ কাৰ্যসূচীত অংশগ্রহণ কৰি বহু অনুৰাগীয়ে ন্যায়ৰ দাবী তোলে।

কে’বাগৰাকী অনুৰাগীয়ে সংবাদ মাধ্যমৰ আগত কয় যে ইমান সোনকালে জুবিন গার্গবিহীন জন্মদিন পাব বুলি তেওঁলোকে আশা কৰা নাছিল। প্রিয় শিল্পীজনক ইমান সোনকালে হেৰুৱাই পেলাব বুলি কেতিয়াও সপোনতো দেখা নাছিল বুলি উল্লেখ কৰি কয়, ‘আমি নিয়তিৰ ওচৰত হাৰ মানিবই লাগিব; কিন্তু জুবিন দাক আমি বিদায় দিব নোৱাৰো। আজিলৈকে মই জুবিন দাৰ নামত এগছি বস্তি, এডাল ধূপও জুলাই পোৱা নাই; কাৰণ জুবিন দা আমাৰ মাজৰ পৰা হেৰাই যোৱা নাই, আমাৰ হৃদয়ত আছে তেওঁ।’

লগতে তেওঁলোকে কয়, ‘ইমান মানুহৰ প্রার্থনা অথলে যাব নেকি? কিয় আজি আমি জুবিন দাৰ কাৰণে ন্যায় বিচাৰিবলগীয়া হৈছে? জুবিন দাৰ কাৰণে আমি ন্যায় বিচাৰিব লাগে নেকি? অসমৰ সম্রাট, অসমীয়াৰ সত্তা, অসমৰ সম্পদ আছিল তেওঁ। অসমৰ সম্পদৰ কাৰণে আমি ন্যায় বিচাৰিব লাগে? আমাক ন্যায় দিব লাগিব। কোনে কি কৰিলে, ১৯ ছেপ্টেম্বৰত কি হৈছিল আমি সকলোৱে জানিব বিচাৰো।’