HIV:✒️হিউমেন ইমিউন’ডেফিচিয়েন্সি ভাইৰাছ (এইচ আই ভি)ৰ সংক্ৰমণ ৰোধৰ দিশত ভাৰত চৰকাৰে গ্ৰহণ কৰিছে এক বৃহৎ পদক্ষেপ । কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ে দেওবাৰে বিশ্ব এইডছ দিৱস ২০২৫ উপলক্ষে এক প্ৰতিবেদন প্ৰকাশ কৰে।
য’ত দেখিবলৈ পোৱা গৈছে ২০১০ চনৰ পৰা ২০২৪ চনৰ ভিতৰত এইচ আই ভি সংক্ৰমণ যথেষ্ট হ্ৰাস পাইছে।এই ১৪ বছৰত সংক্ৰমণৰ হাৰ ৪৯ শতাংশ হ্ৰাস পাইছে। তদুপৰি এইডছ সংক্ৰান্তীয় মৃত্যুৰ সংখ্যা ৮১ শতাংশ হ্ৰাস পাইছে।
স্বাস্থ্য মন্ত্ৰালয়ৰ প্ৰতিবেদন অনুসৰি ব্যাপক প্ৰচাৰৰ লগতে গৰ্ভৱতী মহিলাৰ স্ক্ৰীনিং বৃদ্ধি আৰু আগতীয়াকৈ চিকিৎসা আৰম্ভ কৰাই এইডছৰ দৰে মাৰাত্মক ৰোগ নিয়ন্ত্ৰণলৈ আনিছে।
২০২০-২১ চনত এইচ আই ভি পৰীক্ষাৰ সংখ্যা চাৰি কোটি ১৩ লাখ আছিল, যিটো ২০২৪-২৫ চনত ছয়কোটি ৬২ লাখলৈ বৃদ্ধি পাইছিল।ইয়াৰ ফলত আগতীয়াকৈ ৰোগ নিৰ্ণয়ৰ হাৰ বৃদ্ধি পাইছে আৰু এন্টিৰেট্ৰ’ভাইৰেল থেৰাপী (ART) ব্যাপকভাৱে বৃদ্ধি পাইছে।
এই সময়ছোৱাত চিকিৎসাধীন লোকৰ সংখ্যা ১৪.৯ লাখৰ পৰা ১৮.৬ লাখলৈ বৃদ্ধি পাইছে। যাৰ বাবে যোৱা ১৪ বছৰত সংক্ৰমণৰ হাৰ ৪৯ শতাংশ হ্ৰাস পাইছে। মৃত্যুৰ হাৰো ৮১ শতাংশ হ্ৰাস পাইছে।মাতৃৰ পৰা সন্তানলৈ সংক্ৰমণৰ হাৰ ৭৫ শতাংশ হ্ৰাস পাইছে।
বিশ্ব স্বাস্থ্য সংস্থাৰ তথ্য অনুসৰি এইচ আই ভি প্ৰাথমিক পৰ্যায়ত ধৰা পৰিলেই বেছি নিয়ন্ত্ৰণযোগ্য হয়।
এই ৰোগৰ বিৰুদ্ধে যুঁজ দিয়াৰ একমাত্ৰ উপায় হ’ল ব্যাপক পৰীক্ষা, আগতীয়াকৈ ৰোগ নিৰ্ণয়, এন্টিৰেট্ৰ’ভাইৰেল থেৰাপী আৰম্ভ কৰা।