Sribhumi Masjid:
মানৱতাৰ নাই কোনো ধৰ্ম ৷ এইষাৰ কথা সচাঁ অৰ্থত প্ৰমাণিত কৰিলে মছজিদৰ এজন ইমামে ৷ তেওঁৰ উপস্থিত বুদ্ধিৰ বাবে ৰক্ষা পৰিল সাতজন হিন্দু লোকৰ। শ্রীভূমিৰ বাহাদুৰপুৰ-বড়বাড়ি জামে মছজিদৰ কাষত পুৱতি নিশা চাৰি বজাত সংঘটিত হয় এক ভয়ংকৰ দুৰ্ঘটনা ৷ মছজিদৰ কাষতে থকা এটা পুখুৰীত পৰে এখন বাহন ৷ বাহন খনত আছিল সাতজনলোক ৷
পুৱাৰ নামাজ পঢ়িবলৈ টোপনিৰ পৰা উঠা মছজিদৰ ইমাম মৌলানা আব্দুল বাছিতে
দেখা পাইছিল সেই দৃশ্য ৷ তেওঁ এক মিনিট সময়ো বিলম্ব নকৰি উপস্থিত বুদ্ধিৰে মছজিদৰ মাইকযোগে উদ্ধাৰৰ বাবে মাতিছিল ৰাইজক ৷ মাইকত এই বাৰ্তা পাই তৎক্ষণাত ৰাইজ আহি পুখুৰীত পৰা দুৰ্ঘটনাগ্ৰস্ত বাহনখন খনৰ পৰা নিৰাপদে উদ্ধাৰ কৰে লোককেইজনক ৷ ইতিমধ্যে ঘটনাস্থলীত উপস্থিত হয় আৰক্ষী ৷ আৰক্ষীয়ে ক্ৰেনৰ সহায়ত আজি পুৱা পুখুৰীৰ পৰা উঠাই বাহন খন ৷
ইমাম মৌলানা আব্দুল বাছিতৰ এই মহানুভৱতাত সকলোৱে কৰিছে উচ্চ প্ৰশংসা ৷ ইমামজনৰ বাবে এটা নতুন জীৱন পোৱা বাহন খনৰ সাতোজন লোকে হাঁহিমুখে মছজিদত দান দি গ’ল কিছু টকা।