Silghat Jute mill:
যি সময়ত অসম চৰকাৰে বাহিৰৰ উদ্যোগপতিক আকৰ্ষণৰ উদ্দেশ্যে পানীৰ দৰত মাটি দিছে, সেই সময় তে ৰাজ্যৰ ৰাজহুৱা খণ্ডৰ অধীনৰ শিলঘাটস্থিত অসম মৰাপাট কল ধ্বংসৰ দিশে অগ্ৰসৰ হোৱাৰ তথ্য পোহৰলৈ আহিছে। আজি ছদিন ধৰি এই মৰাপাট কলৰ দ্বিতীয় গোটৰ কাম বন্ধ হৈ আছে। অভিযোগ অনুসৰি, ৰাজ্য চৰকাৰৰ -ভুল নীতি, পৰিচালনা মণ্ডলী সদস্যৰ মইমতালি তথা ক্ষমতাৰ অপব্যৱহাৰ, পৰিচালন সঞ্চালকৰ দুর্বল প্রশাসনীয় ব্যৱস্থাৰ ফলত মৰাপাট কলটোৰ নতুন তথা দ্বিতীয়টো গোট বন্ধ হৈ পৰিছে।
চৰকাৰৰ গুৰুত্বহীনতাৰ সুযোগ লৈ উদ্যোগ-প্রতিষ্ঠানটোৰ দ্বিতীয়টো গোট ঠিকাভিত্তিকভাবে পৰিচালনা কৰি থকা কলকাতাৰ চনু এণ্টাৰপ্ৰাইজ নামৰ ঠিকাদাৰী প্রতিষ্ঠানটোৱে মৰাপাট যোগনীয়াৰসকলক প্রাপ্য ছয় কোটি টকা আদায় নিদি প্রতিষ্ঠানটোৰ বিষয়া-কর্মচাৰীসকল নিশাটোৰ ভিতৰতে উধাও হৈছে। ফলত মৰাপাট কলটোৰ তিনি শতাধিক শ্রমিক-কর্মচাৰী তথা যোগনীয়াৰসকলৰ মাজত হাহাকাৰৰ সৃষ্টি হৈছে। একাংশই অভিযোগ কৰা অনুসৰি, অসম চৰকাৰ তথা পৰিচালনা সমিতিৰ ভুল নীতিৰ পৰিণতিত মৰাপাট কলটোত এই অচলাৱস্থান সৃষ্টি হৈছে।
উল্লেখ্য যে এই উদ্যোগ প্রতিষ্ঠানত অসম চৰকাৰৰ ৯৮ শতাংশ শ্বেয়াৰ আছে। ঠিকাদাৰী প্রতিষ্ঠানটো উধাও হোৱাৰ পাছত সম্প্রতি প্রতিষ্ঠানটোৰ বিষয়া শশী প্রকাশ পুৰোহিতৰ কাৰ্যালয়ত তলা ওলমি আছে। সূত্রই জনোৱা মতে, অলপতে অনুষ্ঠিত কল পৰিচালনা মণ্ডলীৰ জৰুৰী সভাত পুৰোহিতে অংশগ্রহণ কৰে যদিও তেওঁ কাম-কাজ পৰিচালনাৰ ক্ষেত্ৰত কোনো অসুবিধাৰ সম্মুখীন হৈছে নেকি তেনে কোনো তথ্য প্রকাশ কৰা নাছিল। গতিকে কলিকতীয়া প্রতিষ্ঠানটোৰ পলায়নক লৈ ৰহস্যৰ সৃষ্টি হৈছে। এনে অৱস্থাতে একাংশই অভিযোগ কৰা অনুসৰি, দৰাচলতে কলকাতাৰ বণিক গোষ্ঠীৰ ন্যস্ত স্বাৰ্থ পূৰণৰ উদ্দেশ্যে পুৰোহিতৰ এক ঘনিষ্ঠ শক্তিশালী চক্ৰই মৰাপাট কলটো শ’লঠেকত পেলোৱাৰ অংকৰে বহিৰাগত প্রতিষ্ঠানটোৰ বিষয়া-কর্মচাৰীসকলক পলুৱাই পঠিয়ায়।
উল্লেখ্য যে দুবছৰ পূৰ্বে ৰাষ্ট্ৰীয় সমবায় উন্নয়ন নিগম আৰু মুখ্যমন্ত্ৰীৰ আর্থিক অনুদানেৰে স্থাপন কৰা হয় শিলঘাট মৰাপাট কলৰ দ্বিতীয়টো গোট। কলৰ উৎপাদন বৃদ্ধিৰ লক্ষ্যৰে স্থাপন কৰা এই গোট ঠিকাভিত্তিকভাৱে পৰিচালনাৰ দায়িত্ব প্রদান কৰা হয় চনু এণ্টাৰপ্ৰাইজক। বহিৰাগত বণিয়াৰ স্বাৰ্থত কলত নতুন পদ সৃষ্টি কৰি শশী প্রকাশ পুৰোহিতক কলৰ উপ-পৰিচালন সঞ্চালকৰূপে নিযুক্তি দিয়া হয়। প্রতিষ্ঠানটোরে কিছুদিন কলৰ নতুন গোটটো চলোৱাৰ পাছতে মৰাপাট যোগনীয়াৰক ধন দিবলৈ বাকী থকাত আহুকালৰ সৃষ্টি হয়। সূত্ৰই প্ৰকাশ কৰা অনুসৰি, মৰাপাট যোগনীয়াৰসকলে কমেও ছয় কোটি টকা পাবলৈ বাকী আছে।
উল্লেখ্য যে মৰাপাট যোগানৰ বাবদ প্রাপ্য ধন নোপোৱাত যোৱা দুই ডিচেম্বৰত কলৰ চৌহদতে বিহপান কৰি আত্মহত্যাৰ অপচেষ্টা চলায় হাৰাধন চক্ৰৱৰ্তী নামৰ এজন ব্যৱসায়ীয়ে। ইয়াৰ পাছতে নিশাৰ ভিতৰতে চনু এণ্টাৰপ্ৰাইজৰ ১৫ বিষয়া কৰ্মচাৰীয়ে পলায়ন কৰে। এই বিষয়া কৰ্মচাৰীসকল হ’ল কলকাতাৰ। তেওঁলোকক পুৰোহিতে লগত লৈ যায় বুলি অভিযোগ উত্থাপন হৈছে।
ইপিনে, পূৰ্বৰ মৰাপাট যোগানৰ বাবদ পাবলগা ধন নোপোৱা পর্যন্ত মৰাপাট যোগান নধৰে বুলি যোগনীয়াৰসকলে স্পষ্ট কৰি দিছে। ইয়াৰ স’তে মৰাপাট যোগনীয়াৰসকলৰ অনাদেয় ধন মোকলাই দিয়াৰ ক্ষেত্ৰত কল কর্তৃপক্ষ দায়বদ্ধ নহয় বুলি স্পষ্ট কৰি দিছে কলৰ পৰিচালন সঞ্চালক গুণমনি গগৈয়ে। গগৈয়ে কয় যে কলটোৰ দ্বিতীয়টো গোটৰ মৰাপাট ক্ৰয়ৰ পৰা উৎপাদন তথা বিক্ৰীলৈকে চনু এণ্টাৰপ্ৰাইজৰ শশী প্রকাশ পুৰোহিতৰ হাতত ন্যস্ত আছিল। আনহাতে, প্রতিষ্ঠানটোৱে পলায়ন কৰাৰ পাছত তিনিশ শ্রমিক-কর্মচাৰীয়ে দিনতে আন্ধাৰ দেখিছে। এই শ্রমিক-কৰ্মচাৰীসকলৰ মাজত দুই শতাধিক মহিলা কৰ্মচাৰীও আছে।
উল্লেখ্য যে ২০২০ৰ অন্তিম ফালে ব্যাপক লোকচানৰ সন্মুখীন হৈ এই মৰাপাট প্রায় তিনিমাহ ধৰি বন্ধ হৈ আছিল। তাৰ পাছতে কল পৰিচালনা মণ্ডলীৰ অধ্যক্ষ তথা মন্ত্রী কেশৱ মহন্তৰ তৎপৰতাত ৰাষ্ট্ৰীয় সমবায় উন্নয়ন নিগম আৰু মুখ্যমন্ত্ৰীৰ আৰ্থিক অনুদানেৰে পুনৰ আৰম্ভ হৈছিল কলটোৰ উৎপাদনী কাম-কাজ কিন্তু এয়া পূৰ্বৰ দৰে এক নাটকৰ নামান্তৰ বুলি বিভিন্নজনে আখ্যা দিছে।